Службæйон-хæстон цæттæдзинады программæйы фæлгæтты Мидхъуыддæгты министрады дæлхæйттæн регуляронæй уагъд фæцæуынц алыгъуызон нормативтæ. Физикон цæттæдзинады нормативтæ вæййынц цалдæрхуызон æмæ дзы алкæцы дæлхай дæр фæткмæ гæсгæ сæххæст кæны кæцыдæртæ.
Милицийы сæрмагонд нысаниуæджы къорд нымад у спецкъордыл æмæ сæм ис æндæр домæнтæ, ома сæ физикон цæттæдзинады программæ хицæн кæны хуымæтæг дæлхæйтты программæйæ. Уымæ гæсгæ ОМОН-ы рæнхъон сконд ныр та сарæзтой марш-бросок 14 километры дæрддзæфæн æмæ иууылдæр уыдысты гæрзифтонг. Сæ марш райдыдта Гуфтайы хъæуæй, стæй ахызтысты Хъорсеуыл æмæ ныххæццæ сты Дзауы поселокмæ. Цæмæй ма се ‘рвылбонон службæйон хæстæ дæр æнæкъуылымпыйæ æххæст кæной, уый тыххæй бахъуыдысты 3 боны, ома, рæнхъон сконд дих æрцыд æртæ къордыл æмæ дзы алкæмæн дæр уыд иу бон рæстæг.
Маршмæ цыдысты сæумæрайсом. Развæлгъау-иу рæнхъон скондимæ инструктаж ауагътой сæ командиртæ, бацамыдтой-иу сын маршы ацæуыны уагæвæрд æмæ табелон æхсæнгарзимæ æдасæй архайын. Семæ ма æдзух уыдысты медицинон кусджытæ дæр, цæмæй бахъуыды рæстæджы бакæной фыццаг медицинон æххуыс.
ОМОН-ы кусджытæ равдыстой хорз физикон цæттæдзинад, æнцонтæй бафæрæзтой маршы ацæуын æмæ сæххæст кодтой сæ разылæууæг хæстæ.
Милицийы иннæ дæлхæйтты дæр уагъд цæуынц ахæм мадзæлттæ, фæлæ ам та сæ арæхстдзинад æвдыстой иу километр дæрддзæг рæстæгмæ алидзынæй, турникыл хи исынæй æмæ æндæр фæлтæрæнтæй. Азтæ кæуыл куыд цыдис, уымæ гæсгæ радтой нормативтæ æмæ иууылдæр сарæхстысты иттæг хорз. Сылгоймаг кусджытæ дæр равдыстой сæ физикон цæттæдзинад æмæ райстой æвæрццаг нысæнттæ.
ДЖИОТЫ Александр
Comments are closed, but trackbacks and pingbacks are open.