Йæ чысыл кæсджыты зæрдæтæ та барухс кæндзæн журнал «Ногдзау»-ы ацы азы фæстаг, æхсæзæм номыр. Журналы фыццаг фарсыл уац «Зынаргъ сабитæ, ныййарджытæ, нанатæ æмæ бабатæ!»-йы арфæ кæны æрцæугæ Ног азы цытæн, йæ зæрдæ сын зæгъы, цæмæй сын æрхæсса бирæ хæрзтæ æмæ амонд. Фенæн дзы ис редакцийы кусджыты къамтæ иумæ истæй. Сæххæст 105 азы зындгонд ирон адæмон поэт Цæрукъаты Алыксандры райгуырдыл æмæ Журнал мыхуыр кæны йæ цыбыр биографи æд къам æмæ æмдзæвгæ «Мады къухты рæвдыд». Журналы ацы номыры мыхуыр æрцыдысты Алагиры 3-æм скъолайы ахуыргæнинаг Гогаты Аминæт æмæ Цхинвалы 7-æм къласы ахуыргæнинаг Гуыбиаты Сосланы æмдзæвгæтæ «Ног аз» æмæ «Рог систæ». «Зымæгон равдыст»-ы сæргонды бын та æвзонг кæсджытæ базонгæ уыдзысты «Нывгæнæн студи «София»-йы цыппар нывгæнджыты куыстытимæ. 2023 азы «Ногдзау» æмæ «Агентство «Минск-новости» бафыстой бадзырд æмæ уымæ гæсгæ райдыдтой æмгуыст белорусаг сывæллæтты журнал «Качели»-имæ. Ацы номыры сты белорусаг æвзонг скъоладзауы къаннæг уацмыстæ æмæ æмдзæвгæйы. Æрыгон кæсджытæ дарддæр ам базонгæ уыдзысты, æндæр æмæ æндæр бæстæты Ног аз куыд бæрæг кæнынц, уыдæттимæ.
Редакци дарддæр йæ кæсджыты зонгæ кæны «Нарты кадджыты» персонажтимæ, ацы номыры дзы ныммыхуыр кодтой уац «Сырдоны райгуырд» иронау æмæ уырыссаг æвзагыл та «Сырдон». Ног азы цытæн та дзы журналкæсджытæ бакæсдзысты Сæлбиты Аланы зарæг-æмдзæвгæ «Ног аз».
Редакци нæ ферох кодта æвзонг прозæуарзджыты дæр æмæ дзы æхсызгонæй бакæсæн ис Уæллаг Фиййагдоны 10-æм къласы ахуыргæнинаг Кудзиты Азæмæты эссе «Амонды фæндагыл», стæй ма «Чи скомдзаг кодта Ног азы гуылæй?». Сабитæ æхсызгонæй базонгæ уыдзысты Бызыккаты Земфирæйы æмдзæвгæ «Ног азы бон»-имæ æмæ Сечъынаты Майæйы æмдзæвгæ «Нæуæг азы бæрæгбон»-имæ дыгуронау. Рубрикæ «Нæ хурты хуртæн»-ы бын мыхуыр æрцыд аргъау «Уæркойы Ног аз»-ы райдиан. Ацы номыры ма кæсджытæ базонгæ уыдзысты «Ахуыр кæнæм мадæлон æвзаг», «Базон-базонтæ», «Ногдзау»-ы конкурсы уæлахиздзаутæ», æмбисæндтæ, сканворд, дзырдбыд æмæ æндæр ахæмтимæ.
Радон номыр сфæлгонц кæныныл зæрдиагæй бакуыстой нывгæнджытæ Абайты Аркади, Гаппуаты Наталья æмæ Айларты Владимир.
ХУЫБИАТЫ Никъала
