Спорты галуан «Олимп»-ы уагъд æрцыд аивадон æмæ эстетикон гимнастикæйæ ногазон турнир «Новый год в Олимпе», зæгъгæ. Ерысты хайад райстой республикæйы иууыл цæттæдæр гимнасткæтæ. Æвзонг спортсменкæты архайдмæ бакæсынмæ æрбацыд РХИ-йы Президент Бибылты Анатоли дæр. Ерысты официалонæй байгом кæныны церемонийы раныхас кодта РХИ-йы Аивадон æмæ эстетикон гимнастикæйы федерацийы президент Цхуырбаты Земæ. Уый радзырдта сæ хъомылгæнинæгты æнтыстыты тыххæй æмæ бузныг загъта чи сын æххуыс кæны, уыдонæн.
«Ацы ерыстæ æвдисæн сты æртæ азмæ нын саразын цы бантыст, уымæн. Тренировкæтæ уадзынæн нын ис æппæт уавæртæ дæр. Уымæ гæсгæ нæ хъæуы æрмæстдæр кусын æмæ кусын», – банысан кодта Цхуырбаты Земæ.
Æрбалæугæ Ног Азы цытæн гимнасткæтæн раарфæ кодта паддзахады сæргълæууæг Бибылты Анатоли æмæ сын загъта стыр æнтысты фæндиæг-тæ.
«Сæрыстыр дæн нæ курдиатджын гимнасткæтæй. Стыр аргъ кæнын сæ тренерты куыстæн. Аивадон æмæ эстетикон гимнастикæйы федерацийы эффективон куыст кæныны нысанæн сын Ног азæй фæстæмæ æрвылмæй дæр хицæн цæудзæн 100 мин сомы», – банысан кодта Бибылты Анатоли.
Цытджын церемонийы рæстæджы ма спортивон галуан «Олимп»-ы директор Табуты Роберт УФ-йы спорты дæсныйы кандидаты æвдисæндартæ радта Плиты Виктория æмæ Кокойты Дианæйæн. Банысан кæнын хъæуы уый дæр, æмæ РХИ-йы спортивон историйы республикæйы минæвæрттæ ахæм кадджын нæмттæ кæй райстой фыццаг хатт.
Æрæмбырдуæвджыты раз азарыд популярон зарæггæнæг Тасойты Игорь.
Ерыстæм ма æрбацыдысты Хицауады Сæрдар Пухаты Эрик РХИ-йы раздæры президент Тыбылты Леонид, Ахуырады министр Гасситы Натали, парламентон комитеты сæрдæрттæ Коцты Жаннæ æмæ Къозонты Алан æмæ ХИПУ-йы ректор Тедеты Вадим.
Хуриты батрадз
Comments are closed, but trackbacks and pingbacks are open.