Ногазон фынгыл фæзындзæн нæхи рауадзгæ сæн

РХИ-йы Хицауады Сæрдар Пухаты Эрик æмæ йæ хæдивæг Бекъойты Геннади бабæрæг кодтой нæ горæты Консерваразæн заводы, кæцыйы баконд æрцыдис сæнуадзæн куыстуат «Винодельня Иронсан», зæгъгæ.

Хицауады Сæрдар цымыдис кодта, кондады цæттæдзинад  цахæм уавæры ис, уымæ.

«Фыццаджыдæр, мæн цымыдис кæны, цал адæймаджы æрцыдис ифтонг куысты бынæттæй, куыстуат йæ фыццаг продукци кæд рауадздзæнис, компани йæ хæстæ куыд æххæст кæны арендæдæттæджы æмæ паддзахады раз, стæй дæр мæ лæмбынæг базонгæ фæнды ацы кондады архайдимæ», – загъта Пухаты Эрик.

Заводы генералон директоры хæстæ æххæстгæнæг Алексей Цапаев куыд фехъусын кодта, афтæмæй завод цæттæ у продукци рауадзынмæ. «Ног азмæ мах рауадздзыстæм фыццаг парти 40 000 авджы бæрц. Уыцы сæн арæзт æрцæудзæнис сæнæфсиры ахæм сортæй, куыд, «Совиньон» æмæ «Шираз». Сæн уагъд цæудзæнис «Аланский резерв» номимæ æмæ реализаци цæудзæнис, куыд бынаты, афтæ нæ республикæйæн æддейæ дæр», – загъта Алексей.

Уый ма банысан кодта, зæгъгæ, бадзырдмæ гæсгæ куыстуат йæ хæстæ æххæст кæны æппæт гуырахстæй. Йæ ныхæстæм гæсгæ ныртæккæ куысты бынæттæй ифтонг æрцыдысты 20 адæймаджы бæрц. Ног азæй фæстæмæ та куыстуаты кусджытæ фæфылдæр уыдзысты 30-35 адæймаджы онг. Дарддæр заводы хъомысад куыд тынгдæр кæна, афтæ фылдæр кæндзæнис кусджыты нымæц дæр. Уыдон æрвылмæй дæр фæнд кæнынц 150 000 сæны авджы бæрц рауадзын æмæ уæд кусджыты нымæц бауыдзæнис 100 бæрц.

Заводы генералон директоры хæстæ æххæстгæнæг куыд банысан кодта, афтæмæй кусджытæ уыдзысты бынæттон цæрджытæ, кæцыты куысты техникæимæ æмæ сæн аразыны технологиимæ зонгæ кæндзысты сæхæдæг. Специалисттæ та ам, нæхимæ кæй нæй, уымæ гæсгæ сæ æрхондзысты нæ республикæйæн æддейæ. Бекъойты Геннади куыд банысан кодта, афтæмæй Хуссар Ирыстоны сæнæфсиргуыст кæддæриддæр традицион уыд æмæ ацы хъуыддаг сног кæныныл ныртæккæ куыст цæуы. Геннади куыд зæгъы, афтæмæй Хуссар Ирыстоны хорз перспективæ уыдис сæнаразыны хъуыддаджы. Уымæ гæсгæ уал æр-баконд æрцыд фыццаг ахæм куыстуат, кæцы цæттæ у йæ фыццаг продукци рауадзынмæ.

«Æхсызгон хъуыддаг у, ног кусæн бынæттæ нæм кæй фæзындзæнис ноджыдæр, уый, стæй дæр бынæттон цæрджытæй сæнæфсиры куыст чи кæнынц, уыдонæн фадат уыдзæн сæ уæлдай продукци уырдæм радтынæн. Хорз хъуыддаг у, нæхи бренд «Аланский резерв» нæм кæй фæзындзæнис, уый. Уымæн дæр, ис хорз нысаниуæг», – загъта уый.

Зæгъын хъæуы уый æмæ арæнгонд бæрндзинады æхсæнад «Винодельня Иронсан» куыстуаты бынат арендæйы кæй райста аивгъуыйгæ азы консерваразæн заводæй. Куыстуат сæн уадзы бынæттон сæнæфсирæй, уыдон сагъд сты 10 гектары фæзуатыл Цхинвалы районы территорийыл. Цапаевы ныхæстæм гæсгæ, ма уыдон фидæн аз ноджыдæр ныссадздзысты 30 гектары бæрц сæнæфсиры бынтæ. Ныртæккæ завод йæ куыст кæны æрласгæ продукцийæ дæр, фæлæ сæ ныфс ис, 5 азы æмгъуыдмæ куыстуат йæхæдæг æххæст гуырахстæй кæй кусдзæнис æрмæстдæр бынаты æркæнгæ продукцийæ.

Бестауты Валя