Хуссар Ирыстоны делегаци РХИ-йы Президент Бибылты Анатолийы сæргълæудæй уыдысты Дзæуджыхъæуы, цæмæй фæстаг хæрзбон загътаиккой уæгъдибар хъæбысхæстæй дыууæ хатты Олимпион чемпион, бирæ хæттыты дунейы, Европæйы æмæ ССРЦ-йы чемпион Андиаты Сосланæн. Делегацийы сконды уыдысты РХИ-йы Президенты Администрацийы къухдариуæггæнæг Козаты Игорь, РХИ-йы фыццаг Президент Цыбырты Людвиг, республикæйы спортивон æхсæнады æмæ интеллигенцийы минæвæрттæ.
Траурон мадзæлтты ма хайад райстой РЦИ-Аланийы Сæргълæууæг Битарты Вячеслав, цæ-гаткавказаг республикæты делегациты минæвæрттæ. Ирыстоны номдзыд хъæбулы тыххæй бирæ хорз ныхæстæ загъд æрцыд.
«Зын ссарæн сты ахæм ныхæстæ, кæцытæ Сослан Петры фырты бинонтæн æмæ æввахс хиуæттæн сæ рыст фæрогдæр кæной. Æппæт Ирыстон хъынцъым кæны. Уый уыд стыр, куыд йæ асæй, афтæ йæ адæймагдзинадæй, намысдзинадæй, патриотондзинадæй æмæ Райгуырæн бæстæмæ уарзондзинадæй дæр. Сослан Петры фырт уыд политик дæр, кæцыйæ мах кæддæриддæр сæрыстыр уыдзыстæм», – загъта Бибылты Анатоли фыдохы митинджы.
Уый ма æрымысыд, Хуссар Ирыстоны зын рæстæджыты тренертæ сæ куыстмызд куынæ истой, уæд Андиаты Сослан йæхимæ кæй райста ахæм хæс, цæмæй сын сæ куыстмызд æхца фыстаид.
«Уый у, йæ адæммæ æмæ спортмæ уарзондзинады æвдисæн. Сослан Петры фырт йæхицæн сарæзта цыртдзæвæн, кæцы-мæ цæрæнбонты фæндаг никуы скæрдæг уыдзæн. Йæ ном æнустæм нæ зæрдæты баззайдзæн», – загъта хуссарирыстойнаг паддзахады сæргълæууæг.
Ирон спорты легендæ, Хæлардзинады æмæ Фæллойадон Сырх тырысайы орденты кавалер Ан-диаты Сослан бирæ азты дæргъы куыста Цæгат Ирыстоны спорты министрæй, уыд РЦИ-Аланийы æртæ æрсидты депутат. Уый йæ цардæй ахицæн уæззау æмæ дæргъвæтин рынчыны фæстæ 67- аздзыдæй. Хæрзбон зæгъыны церемони уагъд æрцыд Цæгат Ирыстоны Тæбæхсæуты Владимиры номыл паддзахадон академион театры.
РХИ-йы Хицауады æмæ
Президенты пресс-службæ
Comments are closed, but trackbacks and pingbacks are open.