Профилактикон ӕмӕ рейдон мадзӕлттӕ
Ног азы ӕрбаввахсимæ та алырдыгӕй хъуысынц гуыппытӕ – сусӕгӕй та уӕй кӕнын райдыдтой гуыпгӕнӕнтӕ ӕмӕ та цӕрджыты ӕнцойад фехӕлд. Иннӕ азтӕм абаргӕйӕ ныртæккæ къаддӕр, фæлæ ацы сæрниз нырма кӕронмӕ иуварсгонд не ‘рцыд. Уымӕ гӕсгӕ та милицийы кусджытӕ уадзынц рейдон мадзӕлттӕ фӕткхалӕн цаутӕ ӕмӕ фыдбылызтӕ ма ӕруадзыны тыххӕй.
Милицийы фадыгон инспектортӕ ӕмӕ экономикон фыдракӕндтӕ ма ӕруадзыны фӕдыл управленийы кусджытӕ зилынц амалиуӕггӕнджытыл ӕмӕ сӕ фӕдзӕхсынц, цӕмӕй нӕ республикӕмӕ ма ласой уӕй кӕнынмӕ гуыпгӕнӕнтӕ. Ныридӕгӕн уал сконфискаци кодтой 2 минӕй фылдӕр гуыпгӕнӕны, бакодтой административон суагъӕтӕ ӕмӕ сӕ арвитдзысты тӕрхондонмӕ. Горӕт Цхинвалы мидхъуыддӕгты управленийы фадыгон инспектор Хӕбӕлаты Леван куыд зӕгъы, афтӕмӕй ныр къуырийы дӕргъы фӕдзӕхсынц дуканиты ӕмӕ алыгъуызон базарадон объектты хицӕутты, сӕ къухтӕ сын ӕрфыссын кӕнынц, цӕмӕй ма уӕй кӕной ӕнӕзакъонон гуыпгӕнӕнтӕ.
«Гуыпгӕнӕнтӕй иуæй-иутæ тӕссаг сты канд сывӕллӕттӕн нӕ, фӕлӕ ма карджын адӕймӕг-тӕн дӕр. Се срӕмыгъды тых сын абарӕн ис гранат ӕмӕ сармадзаны нӕмыгимӕ, ӕмӕ уымӕ гӕсгӕ сты цӕттӕ фыдбылыз. Ацы хъуыддаг ныййарджытӕй бирæтæ не ‘мбарынц ӕмӕ сӕ сывӕллӕттӕн сусӕгӕй-ӕргомӕй фелхӕнынц гуыпгӕнӕнтӕ. Æмæ арæх уынгты цӕугӕйӕ гуыпгӕнӕнты рӕмыгъдӕй фӕтӕрсынц бӕлццӕттӕ, уӕлдайдӕр та ас кары адӕм. Амалиуӕггӕнджытӕн мах ӕмбарын кӕнӕм, нӕ республикӕйы территорийыл кӕй нӕй гуыпгӕнӕнтӕ уӕй кӕныны бардæттæг лицензи райсӕн. Бафӕдзӕхсӕм сӕ, цӕмӕй ма халой закъон, кӕннод фӕтхалджытӕ ӕййафдзысты ӕфхӕрд. Рейдон мадзӕлтты рӕстӕджы уӕййаг пиротехникӕ барвӕндонӕй чи ратты, уыдоны ивар нал фӕкӕнӕм – ӕрмӕст сын сӕ товар сконфискаци кӕнӕм», – зӕгъы Хӕбӕлаты Леван.
Уымӕй уӕлдай милицийы кусджытӕ скъолаты уадзынц профилактикон мадзӕлттӕ ахуырдзаутимӕ, цӕмӕй семӕ ма хӕссой гуыпгӕнӕнтӕ, уынгты уӕвгӕйӕ ма халой ӕхсӕнадон фӕтк ӕмӕ сӕ уагахастмӕ сӕ хъус дарой. Рейдон ӕмӕ профилактикон мадзӕлттӕ ахӕсдзысты суанг ногазон бӕрӕгбонты фӕудмӕ.
ДЖИОТЫ Алыксандр
