Нæ фæсивæд – нæ фидæн

27 июны бæрæг цæуы Фæсивæды бон. Дзурын æй никæмæн хъæуы, фæсивæд сты, нæ бæстæйы фидæнаразджытæ. Æрыгæттæ кæдфæндыдæр цæттæ сты ногдзинæдтæм.

Цæмæй кæстæртæ хистæртæм хъусой, æфсæрмы сæ кæной, уый тыххæй сæхæдæг дæр хъуамæ уой фæзминаг, æгъдауджын, кадджын. Йæ царды бонты хистæр хъуамæ йæ сæрмæ худинаг макуы æрхæсса, сайгæ æмæ давгæ ма кæна, мæнг æмæ гæды ныхас ма дзура. Хистæртæй ацы хъуыддæгтæ чи хæлдта, уыдон хъуамæ абон нæ кæстæрты цæуыл сахуыр кæной? Стыр хъыгагæн, ис ма нæм ахæм хистæртæ. Чъизийæн сæхсæн ис  рæстæджы, фæлæ мæнгарды, сайæгойы, худинаггæнæджы гакк кæуыл сбады, уымæн йæ цардцæрæнбонты йемæ уыдзæн. Нæ кæстæртæ хъуамæ хъахъхъæной сæхи уыцы гакк райсынæй. Уырыссаг æмбисонд афтæ амоны: «Береги честь смолоду!», ома, дæ кад хъахъхъæн æрыгонæй.

Хуссар Ирыстоны ис курдиатджын фæсивæд, кæцы хицæн кæны патриотизм, хъомылдзинад, хорздзинад, æхсæнады мидæг сæхи æвдисынæй, сфæлдыстады, спорты æнтыстытæй. Республикæйæ æддæмæ ацæугæйæ, конкурсты, фестивалты, форумты, балцыты, конференциты хайад исгæйæ, не ‘взонг минæвæрттæ алы хатт дæр сæхи равдисынц аккагæй, се ‘фсармдзинад, зонындзинæдтæ æмæ хæлардзинадæй хицæн кæнгæйæ.

Æнæнхъæлæджы дунейыл ног хæцгæ низ – коронавирус куы рахæлиу, нæ республикæ тӕссаг уавӕры куы бахауд, уӕд медицинон кусджыты ӕмрӕнхъ размӕ рацыдысты бархионтæй нæ фæсивæд. Хъуыдис æнæкъуылымпы æххуыс, æмæ се ‘ппæт дæр, уæззау уавæрты архайгæйæ, низимæ тохы бацыдысты.

Фæсивæд у нæ зæрдæдарæн, нæ фидæн, æмæ бацархайæм ууыл, цæмæй нæ æрыгон фæлтæр рæза æмæ хъомыл кæна хъаруйæ – фидарæй, зонд æмæ удыхъæдæй – тыхджынæй. Уадз, æмæ ныфсджынæй бахизой нæ кæстæртæ хистæрты бынатмæ.

Æвзонджы бонтæ алы адæймаджы царды æр-мæст рæсугъд рæстæг нæу, фæлæ ма уый у уды уавæр дæр. Уый у агурыны, иууыл уæндондæр плæнтты æмæ стыр ныфсыты реализаци кæныны рæстæг. Уыдонмæ кæсгæйæ, мах уынæм Ирыстоны ног æнтыстытæ æмæ нæ уырны йе ‘нтыстджын сомбон.

Республикæ Хуссар Ирыстоны бирæ арæзтæуы, цæмæй фæсивæдæн уа хорз переспективæтæ.  Бакуыстгонд æрцыд æмæ æххæст цæуы фæсивæдон политикæ. Уæрæх кæнынц астæуккаг, уæлдæр æмæ специалон ахуырад райсыны фадæттæ. Стыр хъусдард здæхт цæуы фæсивæды ‘хсæн æгуыстдзинад фæкъаддæр кæныны фарстмæ.

Нæ республикæйы царды фæсивæдæн ахсджиаг бынат ис. Бирæ паддзахадон организацитæн къухдариуæг кæнынц æвзонг специалисттæ, кæцытæ сæхи равдыстой куыд хорз организатортæ æмæ сæ хъуыддаджы дæснытæ. Ахсджиаг у, нæ чызджытæ æмæ лæппутæ иумæйаг уæрæсейаг æмæ æхсæнадæмон олимпиадæты, сфæлдыстадон конкурсты нæ райгуырæн бæстæйы ном кæй бæрзонд кæнынц, активон æмбæстагон позици кæй ахсынц, сæ принципты æмæ хъуыдыты сæрыл кæй тох кæнынц, волонтерон змæлды хайад кæй исынц.

Курдиатджын фæсивæды разæнгард кæнынæн республикæйы нысан æрцыдысты Президентон, стæй алыгъуызон гуманитарон фондты стипендитæ.