7 августæй 14 августмæ Хуссар Ирыстоны территорийыл æрцыдис дыууæ фыдракæнды æмæ дзы иу раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикæйы фæндæгтыл æрцыдис 4 фæндагон-транспортон цауы. Иу аварийы фæстиуæгæн рынчындонмæ алыгъуызон цæфтимæ бахаудта æнæххæст кары сывæллон.
Алыгъуызон бархалыны фæдыл горæты милицийы уп-равленийы кусджытæ бæрндзинадмæ æркодтой дыууæ адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 353 фæткхалæн цауы. Уыдонæй 24 уыдысты нозтджынæй машинæ скъæрыны цаутæ.
Милицийы экономикон фыдракæндтæ ма æруадзыны фæдыл управленийы кусджытæ рейдон мадзæлттæ уадзыны рæстæджы дыууæ дуканийы баййæфтой энергетикон нозтытæ 46 банкæйы æмæ сæ сконфискаци кодтой. Фæткхалджытыл бакодтой административон суагъæтæ æмæ сын сæ хъуыддаг равзардзæнис тæрхондон.
8 августы Знауыры районы милицийы кусджытæ рейдон мадзæлттæ уадзыны рæстæджы баурæдтой зæрдæхсайгæ автомашинæ «ВАЗ-2106», кæцыйы шофыр разынд Знауыры районы Гобозтыхъæуы 53-аздзыд цæрæг. Шофыр разынд нозтджын æмæ ма спайда кодта марихуанайæ дæр. Уымæй уæлдай ма, ацы фæткхалæджы фарон дæр æрцахстой нозтджынæй æмæ наркотиктæй спайда кæныны тыххæй.
8 августы Цхинвалы районы милицийы хайадмæ фехъусын кодтой, зæгъгæ Сатихъары хъæуы 45-аздзыд цæрæг цады найгæйæ фæхуыдуг ис.
8 августы Цхинвалы районы Арцеуы хъæуы ссыгъд бынæттон 32-аздзыд цæрæджы скъæт. Бынатмæ æвæстиатæй бацыдысты зынгхуыссынгæнæн службæйы кусджытæ, фæлæ скъæт дæр æмæ дзы цы 12 стуры уыд, уыдон дæр басыгъдысты.
12 августы горæт Цхинвалы Заводскаяйы уынджы 4-аз-дзыд сывæллон бахаудта автомашинæйы бын, кæцыйы шофыр разынд нæ горæты 47-аздзыд цæрæг. Куыд рабæрæг, афтæмæй сывæллон хъазыд портийæ æмæ йæ фæстæ ралыгъд фæндагмæ.
Милицийы наркотикты æрзылды контроль кæныны управленийы кусджытæн сæ зæрдæ фехсайдта 45-аздзыд бынæттон цæрæгмæ наркотиктæй спайда кæныны тыххæй. Медицинон басгæрсты фæстиуæгæн рабæрæг, фæткхалæг кæй спайда кодта марихуана æмæ «метадон»-æй. Ацы æмбæстаг ма раздæр дæр æфхæрд æрцыд наркотиктæй спайда кæныны тыххæй æмæ йæ ныр тæрхондон ахæстонмæ арвыста иу мæйы æмгъуыдмæ.
