Ахуыргæндты хъуыдымæ гæсгæ, июлы мæйы зæххыл уыдзæн иууыл карздæр магнитон тымыгътæ. Уыдонæй аирвæзæн нæй, фæлæ хъæуы бацæттæ кæнын æмæ сæ хи бахъахъхъæнын.
Магнитон тымыгъты æндæвдад адæмыл
Алчидæр æй зоны, магнитон тымыгътæ адæмæн сæ фылдæры кæй хъыгдарынц. Адæймаг цас фылдæр низтæй рынчын у, уыйас йе ‘нæниздзинадыл боныгъæд æндавы тынгдæр. Ахæм стыр æндæвдадмæ та æркæнынц тугдадзинты атеросклероз, улæфæн органты низтæ, аллерги, неврастени, афтæ ма æрхæгты кæцыфæнды низтæ дæр. Уымæй дарддæр ма тамако дымын æмæ наркотикты зиан уый мидæг дæр ис, æмæ кæй фæтынгдæр вæййы метеоæнкъарындзинад.
Боныгъæды æндæвдад адæймаджы æнæниздзинадыл кæддæриддæр у индивидуалон.
Бирæтæ уый æппындæр ницæмæ æрдарынц. Ис ахæмтæ, кæцытæн боныгъæды фæивдимæ фæивы сæ зæрдæйы уаг дæр, чидæртæ та бынтондæр нæ фæхатынц атмосферон æлхъывдад æмæ температурæйы фæивд. Вæййы афтæ, æмæ, хæдзарæй рахизгæйæ, бирæтæ рынчын кæнын райдайынц, атмосферæйы чысыл ивындзинæдтæ куы ‘рцæуынц, уæд дæр. Ахæм бæрзонд æнкъарынады хонынц метеодæлбардзинад. Ахæм адæймæгтæм, куыд фæтк, афтæ хауынц зæрдæ-дадзинты низтæй рынчынтæ, бирæ чи кусы æмæ цъус чи улæфынц, афтæ ма æдзух чи фæллайынц, ахæмтæ.
Магнитон тымыгътæ июлы
Мæйы райдианы магнитон тымыгъ уыд лæмæгъдæр (3 баллы).
Дыккаг магнитон тымыгъ уыдзæн 12-13 июлы æмæ уыцы бонты уæлдай хъусдард аздахут уе ‘нæниздзинадмæ. Пик – 13-æм июлы. Развæлгъау бæрæггæнæнтæм гæсгæ, магнитон тымыгъ уыдзæн иууыл карздæр æрмæст июлы мæйы нæ, фæлæ азы æрцæугæ магнитон тымыгътæй дæр. Ахуыргæндтæ нымайынц, зæгъгæ, пикы рæстæджы уый уыдзæн 6 баллы онг æмæ, æгæрыстæмæй, бандавдзæн æнæниз адæймæгтыл дæр.
Радон магнитон тымыгъ уыдзæн иууыл дæргъвæтиндæр – 15-æй 22 июлмæ – аст боны дæргъы йæ тых уыдзæн 3 баллы онг. Хи бахизын хъæуы, куыд физикон, афтæ эмоционалон уæз райсынæй.
Куыд фервæзæн ис метеоæндæвдадæй?
Ис фервæзæн боныгъæды раив-баивæй? Кæй зæгъын æй хъæуы, æмæ хъæугæ дæр кæны. Алы адæймаджы дæр фæнды, цæмæй уа йæ хиæнкъарынады, йæ зæрдæйы равджы хицау. Боныгъæды æндæвдад ын ма хъуамæ хала йæ плæнттæ. Уый тыххæй та хъæуы спортивон цыд æмæ спорты æндæр хуызтæй архайын. Уыдон бирæ тых хардз кæнын нæ домынц. Хорз у фылдæр сыгъдæг уæлдæфмæ тезгъо кæнын, афтæ ма фаг фынæй кæнын дæр.
фылдæр хъусдард аздахын хъæуы психологион уавæрмæ дæр. Боныгъæд кæуыл æндавы, уыдоны хъæуы эмоционалон коррекци. Боныгъæд цæхгæр куы фæива, уæд бирæ хæрын нæ хъæуы, хи хизын хъæуы эмоционалон æмæ физикон уæззау фæлварæнтæй, аразын хъæуы хи лæмæгъгæнæн массажтæ.
Хорз зæрдæйы уаг у æвзонгад бахъахъхъæныны хуыздæр фæрæз. Уæдæ боныгъæдæн фадат ма дæттут уæ хиæнкъарынад æвзæрдæр кæнынæн. Адæймаджы æнæниздзинадыл боныгъæды æндæвдад бирæбæрцæй æвдисы йæ мидæнкъарæнтæ æмæ царды активондзинадæй.
Медикты фæдзæхстытæ:
– Организм бахизут æгæр сой, адджын æмæ уæззау хæринæгтæй.
– Хæрут ныллæгкалорион хæринæгтæ.
– Уæхи бахизут карз цай æмæ кофейæ.
– Фылдæр пайда кæнут сыгъдæг дон æмæ кæрдæджыты цайтæй.
– Ацы бонты уæхи бахизут физикон æмæ, хъуыды кæнын кæуыл хъæуы, ахæм æндæр куыстытæй.
– Фылдæр тезгъо кæнут сыгъдæг уæлдæфмæ.
– Бирæ адæм кæм æмбырд кæны, уыцы бынæттæм æввахс ма цæут.
– Уæхи бахизут уæлдай эмоцитæ æмæ стресстæй.
Æнæниз цард кæнут!
