9-æм декабры Уæрæсейы Федерацийы банысан кодтой Фыдыбæстæйы Хъайтарты бон. Уыцы бон, куыд æндæр хъайтартæн, афтæ кад кодтой УФ-йы Хъайтар Юрий Яковлевæн дæр, кæцы стыр хъайтардзинад равдыста 2008 азы августы Хуссар Ирыстоны ныхмæ Гуырдзыстоны агрессийы рæстæджы. 2008 азы 9-æм августы 15 уæрæсейаг танкисты сæ хæстон машинæтыл цы хъайтардзинад равдыстой, уый ссис æгæрон сгуыхтдзинад æмæ хаст æрцыд нырыккон ахуыргæнæн чингуытæм.
2008 азы 8-æм августы батальонон тактикон къорды сæргълæудæй, Яковлев фыццæгтæй сæ иу бацыд Хуссар Ирыстонмæ ирон адæмы геноцид æруромыны тыххæй. 8-æм августæй 9-æм августмæ Къостайыхъæуы районæй Юрий Яковлевы танкæты колоннæйы ныццавтой гуырдзиаг БМП-тæ. Номхуындæй, Яковлевы æнæххæст танкон ротæ абырста размæ, гуырдзиæгты ‘хсæн фæрæзты ныппырх кæнгæйæ, æмæ сын се ‘фсæдты бæстонæй бацæттæгонд фидаргонд пункт фæстæмæ аппаргæйæ. Æмæ уый фæстæ 9-æм августы райсомæй раджы 19-æм мотоæхсæг дивизийы колоннæ цыд Цхинвалмæ, гуырдзиаг артиллерийы тыхджын æхстыты бын бахаугæйæ. Уæдмæ уæрæсейаг фидауынгæнджыты батальон йæ туджы мæцыд æмæ йын хъуыд æвæстиатæй баххуыс кæнын. Яковлевы Т-72 бахъуыд таранæй размæ ацæуын. Уыдон тыхджын размæбырстæй басастой гуырдзиаг позициты, знаджы дыууæ танкæйы скуынæг кæнгæйæ. Фидауынгæнджыты лагермæ батыдтой лейтенант Алексей Ухватовы развæдсгарæн взводимæ иумæ. Уыцы бон 15 уæрæсейаг танкисты цы сгуыхтдзинад равдыстой, уый диссагæн дзуринаг фæцис.
Танкисттæн сæ бон ссис фидауынгæнджытæм бацæуын, фæлæ сæ фæстæ цæуæг мотоæхсджытæ гуырдзиæгты тыхджын æхстыты бын бахаудтой. Уымæ гæсгæ 9-æм августы капитан Яковлевы къорд æнæрлæугæйæ, цалдæр сахаты дæргъы хæцыд знаджы ныхмæ. Сæ хæстон æрмæджытæ куы бахардз кодтой æмæ ныхмæлæу-уæджы дæлхæйттæ æмæ танкæтæ æхстыты фæстæ хæрзæввахс куы бацыдысты, уæд сæ Яковлев, маневртæ аразгæйæ, йæ танкæй æхста 50 метры дæрддзæджы дистанцийæ. Сифтонг кодта 135-æм мотоæхсæг полчы батальонон тактикон къорды æхстыты бынæй ракæнын æмæ ныхмæлæууæджы сатакæ кæныны тыххæй æдасдæр позици бацахсын.
Йæ танчы йын ныхмæлæуджытæ сцæф кодтой цыппар хатты. Фæлæ уæддæр уый тох кодта, цалынмæ гуырдзиæгтæ фæстæмæ нæ алæууыдысты, уæдмæ. Дæлхайыл æнтыстджынæй командæ кæныны фæрцы батальонон тактикон къорд фесæфта æрмæстдæр иу танк æмæ иу хæстон та рог цæф фæцис. Ацы тохы сæрмагондæй Юрий Яковлев йæхæдæг скуынæг кодта ныхмæлæууæджы бронетехникæйы авд иуæджы. Гуырдзиаг уацайраг салдаттæ уый фæстæ басастысты, ацы танкон атынд сæ æгæрон тасы кæй баппæрста, ууыл. Дыууæ гуырдзиаг танчы басыгъдысты фидауынгæнджыты батальоны контролон-уадзæн пункты цур. Фидауынгæнджыты батальоны уæды командир Константин Тимерманы зæрдыл æрлæууыд хъахъхъæнынады скъуыддзаггæнæн моменттæй сæ иу: нæ батальонмæ 100 метры дæрддзæгæн дыууæ гуырдзиаг танчы куы фæзындысты, уæд æз зыдтон, нæ танкисттæн сæ снарядтæ кæй фесты, уыцы хабар, æмæ бахатыдтæн Яковлевмæ, цæмæй сæ фæтæрсын кæна. Юра сгæпп кодта танкмæ æмæ ацыд уыцы ‘рдæм. Змæлынгæнæджы уынæр, рыг, фæздæг, гуыппытæ, срæмыгъдтытæ – афтæмæй сæ тæрсын кодта 15 минуты дæргъы. Ахæм «психикон» атакæйæн нæ бафæрæзтой гуырдзиæгтæ æмæ лидзинаг фесты. Юра та æрбаздæхт хъыгдардбаййафæг машинæйыл, банымадтам ыл цыппар цæфы. Яковлевимæ ацы хатт дзурын хъуыд хъæрæй, уымæн æмæ срæмыгъдтытæй бахъыгдард йæ хъусынад. Афтæмæй рамбылдтам рæстæг æмæ инициативæ. Кæй зæгъын æй хъæуы, ахæм атакæ гæнæн ис схонæн удуæлдай тохы фæстиуæг, фæлæ, растдæр зæгъгæйæ, уым цъус нæ уыд фæлтæрдджын танкисты раст бахыгъд. Ахæм тактикон амалæй спайда кодта Юрий Яковлевы ротæйы танчы командир сержант Сергей Мыльников дæр. Афтид Т-72 уый ныппырх кодта ныхмæлæууæджы дыууæ ‘хсæн бынаты.
Уыимæ гуырдзиæгты танкæтæ уыдысты мах танкæтæй ногдæр. Фæлæ гуырдзиæгты, кæд НАТО-йы инструктортæ маневртыл хорз сахуыр кодтой, уæддæр уыдон тарстысты комкоммæ тохтæй æмæ-иу лидзинаг фесты. Яковлевы танкисттæ скуынæг кодтой ныхмæлæууæджы 19 бронеобъекты æмæ афтæмæй бахъахъхъæдтой дæсгай хæстонты цард. Танкистты сгуыхтдзинæдтæ нысан æрцыдысты Уæрæсейы Хъайтары дыууæ стъалыйæ, Æхсардзинады дыууæ орденæй, «Хъайтардзинады тыххæй» дыууæ майданæй æмæ Суворовы æртæ орденæй. Йæхæдæг, Юрий Яковлев, уыцы бонты тохтæ мысгæйæ, банысан кодта, зæгъгæ, ницахæм сгуыхтдзинæдтыл нæ хъуыды кодта. Мах æххæст кодтам не ‘фсæддон хæс», – фæзæгъы уый, Цхинвалы 9-æм августы цаутæ мысгæйæ.
Уый фæстæ Яковлев дарддæр службæ кодта уæрæсейаг æфсады. 2009 азы майы нысан æрцыд 141-æм хицæн танкон батальоны штабы хистæр – командиры хæдивæгæй. 2011 азы майор Яковлев æрвыст æрцыд организацион-штатон мадзæлтты фæдыл Гарзджын тыхты фæсауæрцмæ. 2015 азы æрбаздæхт уæрæсейаг æфсадмæ. 2015-2017 азты службæ кодта Хуссар Æфсæддон зылды 58-æм иумæйагæфсæддон æфсады штабы хæстон цæттæдзинады хайады. 2019 азы каст фæцис Сурзæххон æфсæдты «Иумæйагæфсæддон академи»-йы Æфсæддон-зонадон ахуырадон центр. 2019 азæй ахуыр кодта А.Серовы номыл тæхджыты Краснодары уæлдæр æфсæддон авиацион ахуыргæнæндоны.
Юрий Яковлев чысылæй фæстæмæ бæллыд æфсæддон суæвынмæ. Каст фæцис Челябинскы уæлдæр танкон ахуыргæнæндон. Йæ хъысмæт ын сбæрæг кодта йæ дада – танкист, кæцы рацыд æнæхъæн Стыр Фыдыбæстæйон хæстыл. Юрий нырма службæ кодта Мæхъæлы, уый фæстæ та – Цæгат Ирыстоны. Цæры Краснодары. Ис ын дыууæ фырты. Кæны активон æфсæддон-патриотон куыст.
2008 азы 19 сентябры УФ-йы Президенты Барамындæй Юрий Павелы фырт Яковлевæн лæвæрд æрцыд Уæрæсейы Федерацийы Хъайтары ном, Цæгат Кавказы регионы йе ‘фсæддон хæс æххæст кæныны рæстæджы стыр хъайтардзинад кæй равдыста, уый тыххæй.
Æрмæгыл бакуыста
ДЖИОТЫ Екатеринæ
Comments are closed, but trackbacks and pingbacks are open.