Зымæджы ӕрлӕудимӕ автомашинӕты хицӕутты бахъӕуы зымӕгон цӕлхытӕ бакӕныны сӕр. Ныссӕлынӕй тӕссаг у, стӕй ӕфцгуытыл дӕр мит ныууарыд ӕмӕ машинæйыл зымæгон цӕлхытӕ куы нӕ уа, уӕд нӕдӕр шофыр у ӕдас, нӕдӕр – бӕлццӕттӕ.
Ис афтӕ хъуыдыгӕнӕг шофыртӕ, ома дард куы нӕ цӕуон, кӕнӕ стыр тагъдадӕй куы нӕ скъӕрон, уӕд мын сӕрдыгон цӕлхытӕ дӕр фаг сты. Фӕлӕ уый мӕнг хъуыды у. Алы аз зымӕджы ӕрлӕудимӕ æвдисӕн вӕййӕм аваритӕн, машинæтыл зымӕгон цӕлхытӕ кӕй нӕ вӕййы, уый аххосагӕй æмæ, хъыгагӕн, уды зиӕнттӕ дӕр ӕрцӕуы. Уымӕ гӕсгӕ паддзахадон автоинспекци сиды шофыртӕм, цӕмӕй сӕ машинæтыл ныридӕгӕн бакӕной зымӕгон цӕлхытӕ.
Уӕлдӕфы хъарм 5-7 градусӕй уӕлӕмӕ куынӕуал хиза, уӕд сӕрдыгон цалхы резинӕ ныхъхъӕбӕр вӕййы ӕмӕ йӕ функцитӕ нал феххӕст кӕны, фӕндаджы уӕлцъарыл дзӕбӕх нал фӕхӕцы ӕмӕ бырын райдайы. Уымӕ гӕсгӕ шофыры бон нӕ вӕййы рæстæгыл йӕ бауромын ӕмӕ авари ӕрцӕуы.
Ацы аз 1 сентябрӕй Уӕрӕсейы территорийыл ивар кӕнын райдыдтой, йӕ цӕлхытӕ афоныл чи нӕ баивы, уыцы шофырты. Фыццаг хатт сӕ фӕивар кӕнынц 500 сомы, дыккаг хатт та – 2000-4000 сомы, кӕнӕ та сӕ ӕрцахсынц 15 суткӕйы ӕмгъуыдмӕ.
Уазал рӕстӕг шофыры хъӕуы арӕхстджындӕр скъӕрын – фылдӕр хъусдард здахын хъӕуы боныгъӕдмӕ, фӕндаджы уавӕрмӕ, фӕндагон нысӕнттӕм, фистӕг бӕлццӕттӕм. Де скъӕрыны тагъдад дӕр хъуамӕ ӕрныллӕг кӕнай. Дӕ разы цӕуӕг автомашинӕимӕ дистанци дӕр хъӕуы фӕфылдӕр кӕнын. Уымӕй уӕлдай ма боныгон дӕр хъӕуы ссудзын рухсытӕ – уый дӕр ахъаз у авари ма ӕруадзынӕн.
Джиоты Алыксандр
