8-æм сентябры Хетæгкаты Къостайы номыл Хуссар Ирыстоны паддзахадон драмон театр гастролон балцы уыд Цæгат Ирыстоны горæт Мæздæджы. Нæ театры пресс-службæйы нын куыд фехъусын кодтой, уымæ гæсгæ нæ артисттæ ацы горæты театрдзаутæн равдыстой Николай Эрдманы пьесæмæ гæсгæ æвæрд спектакль «Химарæг» («Самоубийца).
«Ардæм нæ балц у фыццаг хатт. Развæлгъау бадзырдтам Мæздæджы администрацийы къухдариуæгадимæ, цæмæй нæ театры репертуаримæ базонгæ кæнæм бынæттон сценæмæкæсджыты æмæ афтæмæй популяризаци кæнæм Хуссар Ирыстоны паддзахадон драмон театр. Æрæджы нæм æрæрвыстой хонæн æмæ нæхи арæвдз кодтам гастролтæм. Спектакль у цымыдисон æмæ йын театрдзаутæ æнæмæнг саргъ кæндзысты», – банысан кодтой пресс-службæйы.
Спектакль «Химарæг» нæ театры труппæ равдыстой Мæздæджы Культурæйы хæдзары стырдæр сценæйыл æмæ йæм стыр цымыдисимæ бакастысты театрдзаутæ. Николай Эрдманы пьесæмæ гæсгæ æвæрд спектакль «Химарæг» фыццаг хатт нæ театры сценæйыл адæмы рæгъмæ хаст æрцыдис ивгъуыд аз.
ЦХУЫРБАТЫ Ларисæ