Хетæгкаты Къостайы номыл Хуссар Ирыстоны Паддзахадон драмон театр та радон хатт ис гастролон балцы æмæ цалдæр бонмæ æрзилдзæнис Уæрæсейы Федерацийы горæттыл. Хуссар Ирыстоны Паддзахадон драмон театр Ярославль, Липецк æмæ Воронежы сценæмæкæсджыты зæрдæтæ барухс кæндзæн спектаклтæй, кæцытæ хуыздæрæн æвзæрст æрцыдысты театры аивадон къухдариуæгады уынаффæмæ гæсгæ.
Хетæгкаты Къостайы номыл Хуссар Ирыстоны Паддзахадон драмон театры пресс-службæйы нын фехъусын кодтой: «Фæззæджы нæ театр цы гастролон балцы цæуын, уыдон сты стыр гастролтæ. Уымæн æмæ театр æрзилдзæнис Уæрæсейы Федерацийы цалдæр горæтыл. Уыдоны ‘хсæн – Ярославль, Липецк æмæ Воронеж. Нæ артисттæ сæхи тынг хорз бацæттæ кодтой гастролтæм æмæ нæ хъуыдымæ гæсгæ уыдзысты цымыдисон сценæмæкæсджытæн. Нæ театры труппæ 28-æм октябрæй ралæудзæнис Волковы номыл Ярославлы Уæрæсейаг академион æмæ драмон театры сценæйыл. Уыдон уырыссаг сценæмæкæсджытæн равдисдзысты Роман Габриайы сценаримæ гæсгæ æвæрд спектакль «Къоста». 30-31 октябры та нæ театры труппæ йæ гастролтæ адарддæр кæндзæн Лев Толстойы номыл Липецкы Паддзахадон академион театры. Ам та сценæмæкæсджытæн равдисдзысты французаг драматург æмæ сценарист Жан Ануйы пьесæмæ гæсгæ æвæрд спектакль «Антигона» æмæ литературон-музыкалон спектакль «Къоста». Ацы спектакльтæй ма бахъæлдзæг кæндзысты Воронежы театрдзауты зæрдæтæ дæр. Ацы гастролон балц организацигонд цæуы «Росконцерт»-ы æххуысæй (Уæрæсейы Федерацийы Культурæйы министрады гастролон-концертон планмæ гæсгæ). Хуссар Ирыстоны Паддзахадон драмон театры труппæйæн финансон æххуыс бакодта Республикæ Хуссар Ирыстоны Президент Бибылты Анатоли дæр», – банысан кодтой пресс-службæйы.
Спектакль «Антигона»-йы æвæрæг режиссер у Дзудцаты Тамерлан æмæ фыццаг хатт хуссарирыстойнаг сценæйыл æвæрд æрцыдис 2017 азы. Ацы спектакль уæдæй абоны онг æвдыст цæуы æндæр æмæ æндæр регионты сценæтыл. Æхсæнадæмон фестиваль «Кавказский меловой круг»-ы та йын жюрийы тæрхонмæ гæсгæ радтой цалдæр призы, уыдоны нымæцы – хуыздæр режиссурæйы тыххæй æмæ афтæ дарддæр. Спектакль «Антигона»-йы сæйраг рольтæ æххæст кæнынц Республикæ Хуссар Ирыстоны адæмон артист Бибылты Сослан, Республикæ Хуссар Ирыстоны сгуыхт артисттæ Хуыгаты Альбинæ æмæ Сагирова Миленæ, артисттæ Цоциты Андрей æмæ Бекъойты Зæринæ.
Литературон-музыкалон спектакль «Къоста»-йы та фыццаг хатт адæмы рæгъмæ рахастой 2019 азы, кæцыйы æвæрæг-режиссер у Роман Габриа. Ам сæйраг хъайтары ролтæ æххæст кæнынц æртæ артисты – РХИ-йы адæмон артист Пæррæстаты Дмитри, Гаглойты Эдуард æмæ РХИ-йы сгуыхт артист Куымæриттаты Батрадз. Спектаклы иннæ ролтæ та æххæст кæнынц РХИ-йы адæмон артист Бибылты Сослан, Тъехты Васили, РХИ-йы сгуыхт артисттæ Чохели Натия, Гаглойты Артур, Битарты Бессарион, Бекъойты Зæринæ æмæ Елбачиты Рамаз.
ЦХУЫРБАТЫ Ларисæ
Comments are closed, but trackbacks and pingbacks are open.