Хуссарирыстойнаг æрыгон театрдзаутæн ныр та нæ паддзахадон драмон театры æмбæрзæн цытджын æгъдауæй байгом кодтой Мæскуыйаг театр «Фирс»-ы артисттæ. Уыдон дыууæ боны æмгъуыдмæ фæуазæг сты Цхинвалмæ æмæ сæ репертуарæй равдыстой цалдæр спектаклы.
Фыццаг изæр уал театры труппæ сывæллæттæн равдыстой спектакль «Потерянное время», кæцыйы æвæрæг режиссер у Евгений Безбог. Ацы спектаклмæ æрыгон театрдзаутæ фыццаг хатт кæй бакастысты, уымæ гæсгæ сын уыдис цымыдисон, нæ бамбæхстой сæ эмоцитæ дæр æмæ артисттыл æмбæлдысты цины хъæртæ æмæ къухæмдзæгъдимæ.
Мæскуыйаг театры режиссер Александр Мурити журналисттæн куыд загъта, афтæмæй уыдон фыццаг хатт гастролон балцы сты Хуссар Ирыстоны æмæ семæ æрхастой цыппар спектаклы. Уый ма куыд банысан кодта, афтæмæй сæ театр нырма у æрыгон, фæлæ сын сæ аивадæн кæддæриддæр стыр аргъ скæнынц театрдзаутæ. Хуссарирыстойнаг сценæмæкæсджыты зæрдæмæ дæр кæй фæцæудзæнис артистты хъазт, ууыл нæ дызæрдыг кодта.
«Мах уал фыццаг нæ фæндаг ракодтам Цæгат Ирыстонмæ. Дзæуджыхъæуы равдыстам фондз спектаклы. Нæ артисттæ кæд бафæлладысты, уæддæр Ирыстоны диссаджы æрдз æмæ хæхты уындæй тынг сæ зæрдæ барухс, уæлдæф та ныл цыма тыхтæ бафтыдта, уыйау нæ фæллад не ‘ппæтæй дæр айрох. Æвæдза, диссаджы бынаты цæрут!», – йæ ныхасмæ бафтыдта уырыссаг режиссер.
Цыппæрæмы изæры уырыссаг артисттæ адæмы рæгъмæ рахастой Александр Островскийы уацмысмæ гæсгæ æвæрд спектакль «Гроза». Театры режиссер куыд банысан кодта, афтæмæй ацы спектакль авд азы дæргъы ис сæ репертуары, театрдзаутæн у уарзон æмæ йæм адæм цæуынц æхсызгонæй. «Антон Чеховы уацмысмæ гæсгæ æвæрд спектакль «Чайка» та нын у ног сæвæргæ. Нырма йæ Мæскуыйы бæр-цæй равдыстам цыппар хатты. Махæн нæ театр бынтон æвзонг у. Йæ сырæзтыл цæуы аст азы бæрц, коллектив æй хонынц иу режиссеры театр. Нæ коллективы тыххæй мæ фæнды зæгъын, курдиатджын кæй сты æмæ нæ спектаклтæ дæр кæй рауайынц цымыдисон. Махæн нæ репертуары фылдæр ис классикæ, уыдоныл афтæ бакусæм, цæмæй фæсивæдæн дæр уой цымыдисон æмæ сæ сæрибар рæстæг соцхызæгты ма æрвитой, фæлæ-иу фæндаг агурой нæ театрмæ», – загъта Александр Мурити.
Уæрæсейаг уазæг ма тынг бадис кодта ирон уазæгуарзондзинады тыххæй æмæ йыл сæ гастролон балц цы тæлмæнтæ ныууагъта, уый раргом кодта стыр цины æнкъарæнтимæ. Арфæ ракодта нæ республикæйы къухдариуæгадæн, хорз сæ кæй суазæг кодтой æмæ сыл кæй узæлынц, уый сæраппонд. «Нæ коллективимæ тынг райгондæй баззадтæн уæ ног театрæй. Уæрæсейы бирæ театртæ батæхуды кæндзысты уæ театрмæ, афтæ хæрзарæзт у. Кусынæн дзы æппæт уавæртæ дæр ис, сценæ та техникон æгъдауæй æппæтæй дæр у ифтонг. Сæрмагондæй ма мæ бузныджы ныхæстæ фæнды зæгъын Хуссар Ирыстоны Культурæйы министрад, театры директор æмæ аивадон къухдариуæггæнæгæн. Куыддæр театры къæсæрæй бахызтыстæм æмæ æввахсдæр базонгæ стæм нæ коллегæтимæ, афтæ аныгъуылдыстæм нæ театралон дунейы. Сфæлдыстадон кусджытæн та кæддæриддæр разыны цæуыл аныхæстæ кæной, уый», – загъта режиссер.
Нæ уацх.
