Мадзал Къостайы азы цытæн

Нæ республикæйы цæуынц алыхуызон мадзæлт-тæ Хетæгкаты Къостайы азы цытæн: сфæлдыстадон изæртæ, гом уроктæ, конкурстæ, равдыстытæ…

Иу ахæм мадзал – гом урок уагъд æрцыд Цхинвалы æртыккæгæм астæуккаг скъолайы – уагъта йæ ирон æвзаг æмæ литературæйы ахуыргæнæг Хъуылымбегты Раисæ. Урочы темæ уыд “Хетæгкаты Къоста – фыццаг ирон баснифыссæг”.

Мадзалмæ æрбацыдысты скъолайы ахуыргæнджытæ æмæ горæты адæмон ахуырады управленийы кусджытæ.

Сывæллæттæ мадзалмæ сæхи бæстонæй бацæттæ кодтой.

 Ирон æвзаг æмæ литерæтурæйы ахуыргæнæг скъоладзаутæн радзырдта, Хетæгкаты Къоста ирон адæмæн стыр лæггад кæй бакодта, уый тыххæй. Ирон литературæйы бындурæвæрæджы сфæлдыстад алы дуджы дæр ахсджиаг кæй у. Йе сфæлдыстады ахсджиаг бынат ахсынц баснитæ дæр, кæцыты аллегорийы хуызы хурмæ калы адæймаджы æппæрццаг миниуджытæ.  Урокы рæстæджы сывæллæттæ радзырдтой, цы у басни, чи сты йæ архайджытæ, цы сусæгдзинæдтæ æмбæхсы. 

Гом урок уадзыны рæстæджы ахуыргæнæг пайда кодта ахуыры нырыккон техникон фæрæзтæй. Слайдты руаджы ахуыргæнинæгтæ зонгæ кодтой Къостайы цард æмæ сфæлдыстадимæ. Зæрдæмæхъаргæ уыдысты сывæл-лæттæ цы æмдзæвгæтæ æмæ бацæттæгонд баснитæ дзырд-той, уыдон. Афтæмæй Къостамæ æвдыстой сæ зæрдæты хъарм æнкъарæнтæ, се стыр уарзт.

“Къоста… Æрмæстдæр номæй хонынц ирон адæм Хетæгкаты Леуаны фырт Къостайы. Ирон лæгæн уыцы ном йæ чысылæй йæ амæлæты бонмæ вæййы тырысайау. Ацы ном зæгъгæйæ цæстыты раз слæууы, йæ цард æгасæйдæр йæ адæмæн чи радта, уыцы арфæйаг Къостайы цардæгас сурæт”, – загъта Гæбæраты Алик.

“Æз аныгъуылын хъуыдыты, куыд мæгуыр цард кодтой нæ фыдæлтæ… Куыд баууæндын кодта Къоста мæгуыр ирон адæмы фидæны рухс цардыл”, – зæгъы сывæллæттæй æндæр.

«Алы саби, алы ахуырдзау дæр кæны стыр аргъ Къостайæн. Фыццæгæм къласы сывæллæттæ ахуыр кæнын куы райдайынц, уæд махæн зын никуы вæййы, уымæн æмæ йын йе ‘мдзæвгæтæй бирæты фæзонынц, фæзонынц, ирон адæмæн Къоста чи у, уый”, – загъта Хъуылымбегты Раисæ».

Ирыстоны скъолаты сабидæттæй фæстæмæ сывæллæтты зонгæ кæнынц Къостайы æмдзæвгæтæ æмæ уацмыстимæ. Кæй зæгъын æй хъæуы, сабитæн цымыдисаг у йе сфæлдыстад. Хетæгкаты Къостайы уацмыстæ сывæллæттæ бындуронæй ахуыр кæнынц райдайæн кълæсты æмæ уæдæй фæстæмæ алы ирон адæймагæн дæр Къоста свæййы хион.

“Хетæгкаты Къостайы æппæт сфæлдыстад дæр у æнкъаргæ, адæмон, рæстдзинадмæ, сæрибармæ сидæг символ. Ахæм уыд йæхæдæг дæр, æмæ афтæ уыдзæн, цалынмæ ирон адæм «Ирон фæндыр»-имæ цæрой, уæдмæ”, – загъта Æлборты Эммæ.

Дриаты Лейла