Ӕрвылаз дӕр сӕрды ӕрлӕудимӕ доны былтӕм цӕуын райдайынц адӕм сӕ фӕллад суадзынмӕ. Ирыстоны къуымты кӕцыфӕнды цӕугӕдоны былтӕ, кӕнӕ та цӕдты цуртӕ йемыдзаг вӕййынц улӕфджытӕй. Ӕмӕ ма алчидӕр йӕхи уагыл куы дарид, уӕд ма йын ницы у, фӕлӕ дзы арӕх ӕрцӕууы бӕллӕхтӕ, халынц ӕхсӕнадон фӕтк ӕмӕ ма ӕрцӕуы фыдбылыз дӕр.
Бирӕтӕ вӕййынц сӕ сывӕллӕттимӕ ӕмӕ уыдон та уӕлдай тӕссагдзинад ӕвзарын кӕнынц, уымӕн ӕмӕ сывӕллонмæ хъӕуы уӕлдай хъусдард здахын. Ныййарджытӕ та сӕ ауадзынц уӕгъдибарӕй, сæ фæдыл нæ акæсынц æмæ цæугæдоны æрра уылæнтæм бахизынц иунæгæй. Хъыгагæн нæм æрцыдис трагикон цаутæ дæр, фæлæ уæддæр сæхи нæ хизынц. Кæцыдæр ныййарджытæ расыг дæр свæййынц æмæ ма ахæм уагæй цæй сывæллонмæ хъуамæ фæдарой сæ хъус, сæхæдæг кæсинаг вæййынц. Фæдзурынц æнаккаг æвзагæй æмæ сын уæлдай свæййы, сæ цуры сывæллон ис æви сылгоймаг.
Цæмæй æхсæнадон фæтк ма халой æмæ доны былтыл уæвгæйæ сæхи куыд æмбæлы, афтæ дарой, уый фæдыл æрвылбон дæр Мидхъуыддæгты æмæ Уæлвæткон уавæрты министрадты кусджытæ уадзынц профилактикон рейдон мадзæлттæ. Семæ æмбæлгæйæ сын æмбарын кæнынц, цæмæй сæ сывæллæттæм сæ хъус дарой, нозтджынтæй донмæ ма хизой, æхсæнадон фæтк ма халой, сæ фæстæ брæттæ ма уадзой æмæ-иу хæдзармæ здæхгæйæ та зынг ма ныууадзой сæ фæстæ.
«Мах фæдзæхсæм не ‘мбæстæгты, цæмæй сæхи ма найой æнæзонгæ, æнæсгæрст хуыдымты. Ахæм бынæттæ сты тæссаг, уымæн æмæ дзы, гæнæн ис, æмæ уа алыхуызон цыргъ предметтæ, æфсæйнаджы гæппæлтæ. Стæй ма цæугæдоны цырд уылæнтæ бынтон рæуæгæй аскъæфынц адæймаджы æмæ цæмæй трагеди ма æрцæуа, уый тыххæй сæхи хъуамæ хизой æмæ хъахъхъæной сæ сывæллæтты дæр», – зæгъы милицийы кусæг Дриаты Алан.
«Ис нæм ахæмтæ æмæ доны былтыл сæ рæстæг арвитыны фæстæ ныууадзынц зынг æмæ нæм уый фæдыл тынг арæх вæййы зынгсирвæзтытæ. Ныр дæр та доны былтыл зилæм æмæ фæдзæхсæм улæфджыты, цæмæй сæ фæстæ зынг дæр ма уадзой æмæ брон дæр», – банысан кодта зынгхуыссынгæнæг Зассеты Альберт.
Алчидæр хъуамæ хæсса бæрндзинад æмæ хъуамæ хъуыды кæна, цы аразы ууыл. Дæхи æдас-дзинадмæ дын уæлæнгай ахаст куы уа, уæд фыдбылызæн æнæрцæугæ нæй. Бынтон æрæджы дæр ма Цхинвалы цады æрцыдис трагеди, – фæмард æрыгон лæппу. Ӕмæ нæм ахæм цаутæ æрцæуы алы аз дæр, фæлæ, хъыгагæн, алкæмæн зондзонæн нæ вæййынц. Фарон сæрд дæр уыдис тынг бирæ зынгсирвæзты цаутæ æмæ сæ сæйраг аххосаг уыди, доны былтыл улæфджытæ сæ фæстæ арт кæй уагътой, уый. Стæй ма сæ фæстæ ныууадзынц тынг бирæ брон. Афтæ зæгъæн нæй æмæ алчидæр йæхи æнæуаг дард кæны, фæлæ фенæн вæййы ахæм нывтæ æмæ зæгъдзынæ, ай кæдæм æрбахаудтæн. Кæмдæрты уыйбæрц брæтты кæритæ вæййы æмæ адæймагæн йæхи цæсгом ссудзы.
Ахæм рейдон мадзæлттæ уагъд цæудзысты суанг фæззæджы онг, куыд горæт Цхинвалы, афтæ ма районты дæр. Фæткхалджытæ ивар цæудзысты карзæй. Уый фæахъаз уыдзæн фыдбылызтæ фæкъаддæр кæнынæн, фæлæ уæддæр алчи дæр йæхæдæг куы нæ тыхса йе ‘дасдзинадыл, сыгъдæгдзинадыл æмæ йæхи хæрзæгъдауæй дарыныл дæр, уæд уавæр бирæбæрцæй нæ фæхуыздæр уыдзæнис.
Джиоты Александр
Comments are closed, but trackbacks and pingbacks are open.