Хъæууонхæдзарадон культурæтæй хъæздыг тыллæг æркæнынæн æрмæст зæх-кусæджы аудгæ æмæ иузæрдион куыст фаг нæу. Уыцы хъуыддагыл лæуд чи у, уыдон фыццæгтæй у механизаторы æвæллайгæ æмæ куыстуарзондзинад дæр.
Дардыл быдырты мæр цыбыр рæстæгмæ чи афæлдахы æмæ дзы гъæдджын куыст чи бакæны, уый у механизатор йæ техникæимæ. Иугæр тауыны рæстæг æрбалæууыд, уæд зæхкусæджы æххуысы сидтмæ фыццагдæр чи фæзыны, уый дæр у, хъæууонхæдзарадон техникæйыл чи фæкусы, уыцы арæхстджын æмæ куыстуарзаг адæймаг. Æмæ уый фæстæ дæр афæдзы дæргъы зæхкусæджы фарсмæ цал хатты балæууы, уыцы æнæаргъæвгæ бакæнинаг куыстытæ дзæвгар вæййынц.
Хоркуыстгæнæджы къух æдзухдæр чи рог кæны йæ æнæзивæг фезмæлд æмæ куыстуарзондзинадæй, уыдоны нымæцмæ бахæссын хъæуы Цхинвалы районы Къостайыхъæуы цæрæг Хуыбиаты Аланы дæр. Кусынæн бæзгæ бонтæ куынæ вæййы, уæддæр Алан иу ран нæ фæбады, йæхицæн ссары хъæугæ куыст.
Уыцы бон дæр быдырон куыстытæ бакæнынæн боныгъæд кæд нæ амыдта, уæддæр куыстæввонг æркодта, цы агрегат æм уыд фидаргонд, уый. Цæвиттон, «Агросервис» амæйразмæ хъæууонхæдзарадон куыстытæ кæнынæн цы техникæ райста, уыдонæй цалдæр иуæджы фæхай кодта Тъбеты хъæуы тракторон бригадæйы дыккæгæм бригадæйæн, йæхи рады та сæ уый бабæрн кодта хицæн механизатортæн. Аланы бæрны цы прессгæнæн агрегат ис, уый уæдмæ нæ уыд куыстæввонг, хъуыд æй сæмбырд æмæ æмбæлон уагмæ æркæнын. Фæлтæрд механизатор æм лæмбынæг æркаст æмæ дзы цыбыр æмгъуыдмæ барухс йæ зæрдæ. Афтæ, æмæ куыстытæ æххæст кæнынæн ныридæгæн у цæттæ æмæ æнæкъуылымпыйæ æххæст кæндзæн фермерон хæдзарадтæ æмæ хицæн æмбæстæгты бакæнинаг куыстытæ.
Алан техникæ йæ чысылæй фæстæмæ бауарзта, йæ фыд Серги дæр æхсæнадон хæдзарады механизаторæй бирæ рæстæг фæкуыста. Хæдзарады разамонджытæ йын йæ бæрны цы куыстытæ кодтой, уыдонмæ уыд æнæзивæг æмæ сæ ахицæн кæнынмæ кæддæриддæр каст бæрндзинады цæстæй. Уæды хæдзарад раззагдæрты рæнхъы кæй уыд, уым йæ аккаг хайбавæрд хаста ацы на-мысджын æмæ куыстуарзаг механизатор дæр. Хъыгагæн, уалдзыгон радон куыстытæ æххæст кæныны рæстæджы Серги æмæ йæ дыууæ æмбалæн сæ рухс фæндтæ фескъуыдтой гуырдзиаг лæгмарджытæ.
Фæстæдæр Алан сбадт тракторыл æмæ 23 азæй фылдæр йæ хайбавæрд хæссы куысты æнтыстмæ. Канд фермерон хæдзарадты куыстытæ нæ бакæны, фæлæ ма æнæзивæг у, хъæууонхæдзарадон куыстытимæ баст чи у, уыцы æмбæстæгтæм фæ-кæсынмæ дæр. Ахæм æнæзивæг æмæ куыстуарзондзинады тыххæй дзы бузныг сты се ‘ппæт дæр.
ХУЫБИАТЫ Никъала
Comments are closed, but trackbacks and pingbacks are open.