Республикæ Хуссар Ирыстоны Парламент æмæ Луганскы Адæмон Республикæйы Адæмон Совет сæ къухтæ æрфысдзысты æмгуысткæнынады тыххæй сразыдзинадыл.
РХИ-йы Парламенты спикер Гасситы Петр куыд радзырдта, афтæмæй къухтæ æрфысдзысты 7-æм февралы Луганскы.
«Амæйразмæ нæ республикæты лидертæ сæ къухтæ æрфыстой æхсæнпаддзахадон сразыдзинадыл, кæй зæгъын æй хъæуы, уый фæстæ та къухтæ хъуамæ æрфыстæуа уæрæхмасштабон æхсæн-парламентон сразыдзинадыл», – загъта Гасситы Петр.
Парламенты спикер банысан кодта, зæгъгæ, хицауиуæгады æппæт къабæзтæ алы хъуыддаджы дæр хъуамæ æххуыс кæной кæрæдзийæн.
«Мæнмæ гæсгæ, хицауиуæгады къабæзтæ алы хъуыддаджы дæр кæрæдзийы æвварс хъуамæ хæцой. Махмæ уыд ахæм цæвиттонтæ, закъондæттынадон, æххæстгæнæн æмæ тæрхондонон хицауиуæгадты ‘хсæн иумиаг æмбарынад куынæ уыд. Уый тынг негативонæй æндæвта æппæт республикæйыл дæр. Ныртæккæ афтæ нал у, хицауиуæгады æппæт къабæзтæ дæр кусынц иууон здæхты, практикон æгъдауæй кæронмæ кæрæдзи æмбарынц, æмæ уый, кæй зæгъын æй хъæуы, хорзæрдæм æндавы нæ республикæйы цардархайдыл», – загъта спикер.
Йæ ныхæстæм гæсгæ, æхсæнпарламентон бадзырды рауæрæхгонд ахастытæ нысан æрцыдысты дыууæ республикæйы парламентты архайды æппæт фадгуыты, уыцы нымæцы экономикон æмæ политикон фадгуыты дæр.
«Бадзырдыл къухтæ æрфыссыны фæстæ уæрæх фадæттæ байгом уыдзæн дыууæ Парламенты депутаттæн, æмархайды æмæ экономикон æмæ æндæр проектты агурыны тыххæй, кæцытæ, мæн ныфс ис, æмæ хорзæрдæм бандавдзысты нæ республикæты цæрджыты фæрныгадыл. Кæй зæгъын æй хъæуы, уый ноджы тынгдæр баввахс кæндзæн не ‘фсымæрон адæмты. Мах алы хъуыддаджы дæр хъуамæ уæм кæрæдзийы фарсмæ», – банысан кодта уый.
Луганскы Адæмон Республикæйы Адæмон Советы Сæрдар Денис Мирошниченко æрæджы йæ комментарийы банысан кодта, зæгъгæ, бадзырдыл къухтæ æрфыссыны фæстæ парламенттæ æмгуыст кæндзысты закъондæттынады æмвæзадыл.
Уый ма банысан кодта, зæгъгæ, æмкуысткæнынады фæрцы зонгæ кæндзысты кæрæдзийы фæлтæрддзинадимæ.
«Нæ ирон коллегæтæм цы фæлтæрддзинад ис, æмæ махæн нæ ирон коллегæты тыххæй цы фæлтæрддзинад ис, уый мах уадзын райдайдзыстæм официалон æмвæзадыл. Æмбæрстгонд у уый, æмæ раздæр махæн уыд æнæофициалон æмкуысткæнынад, фæлæ ныр мах хизæм æндæр æмвæзадмæ», – банысан кодта Мирошниченко.
Республикæ Хуссар Ирыстоны Парламенты
Информацион-аналитикон службæ
Comments are closed, but trackbacks and pingbacks are open.