КУСЫНЦ ГОРÆТ РÆСУГЪД КÆНЫНЫЛ

Цхинвалы мэрийы пресс-службæ куыд хъусын кæны, афтæмæй ацы бонты хæрзарæзтады комбинаты кусджытæ бакодтой егъау куыст. Уыдон алы уалдзæг дæр Куадзæны бæрæгбоны хæдразмæ Згъудеры уæлмæрды бакæнынц сыгъддæггæнæн куыстытæ. Ардыгæй æрвылаз дæр ласт æрцæуы дæсгай машинæтæ брæттæ. Зæронд бæлæстæ бахъæуы ракалын, иннæты та – æхсæдын. Хъыгагæн, нæ адæмæй бирæтæ, сæ хиуæтты ингæнтæм рухскæнинæгтæ схæссыны фæстæ, сæ брæттæ ныууадзынц бынаты. Дымгæ сæ ныффæлгæрон кæны æмæ æвзæрын кæнынц антисанитари. Куадзæны размæ бон уæлмæрды территори сыгъдæг æрцыд. Ныр та хæрзарæзтады комбинаты “Ирдизайн”-ы кусджытæ, 9-æм майы бæрæгбоны цытæн тематикон билбордтæ æмæ баннертæ бакодтой горæты уынгты. Театралон фæзуаты смонтаж кодтой трибунæ æмæ сценæ, бæрæгбонон концерт ауадзыны нысанæн. Уымæй дарддæр ма горæты центры цы административон уагдæттæ æмæ сæрмагонд хæдзæрттæ ис, уыдоны рæзтæ дæр барæсугъд кæндзысты, æрсадздзысты сыл уырыссаг æмæ ирон тырысатæ. Цæрæнуатон-коммуналон хæдзарады хайадæн хæсгонд æрцыд, цæмæй бæрæгбоны хæдразмæ ныхсой æмæ ныссыгъдæг кæной уынгтæ.

Аивгъуыйгæ къуыри та бæлæсты хус цæнгтæ ралыг кодтой горæты сæйраг уынгты, ныххафтой сын сæ зæнгтæ æмæ сæ, зымæджы бонты ам сæхицæн ахстæттæ чи сарæзта, уыцы уырынгонтæй ныссыгъдæг кодтой. Байсæрстой сæ чъырæй. 9-æм майы бæрæгбоны цытæн цъæхвæлыстгæнæн хайады ландшафтон дизайнеры амындмæ гæсгæ, кусджытæ бавнæлдтой газонтыл дидинджытæ садзынмæ дæр. Канд централон уынгтыл нæ, фæлæ фæсвæд цы сквертæ сырæзт, уымыты дæр сагъд æрцыд дидинджытæ. Ныр уыдон адæмы зæрдæтæ рухс кæндзысты цалынмæ уазал бонтæ не ‘рбалæууой, уæдмæ. Дидинтæн сæ фылдæр горæты администраци балхæдта, Цæгат Ирыстоны цы парниктæ ис, уыдонæй. Фæлæ, куыд зæгъынц, афтæмæй нæхимæ дæр ис дыууæ амалиуæггæнæджы, кæцытæ бынаты схъомыл кæнынц дидинджытæ сæрмагондæй 9-æм маймæ æмæ 20-æм сентябры Республикæйы бæрæгбонмæ. Бынæттон дидинджытæ, кæцытæ адаптаци райстой нæхи æрдзон уавæрты, хуыздæр æмæ тагъддæр схæцынц. Уымæ гæсгæ хæрзарæзтады хайад бынаты хъомыл дидинджытæ зæрдиагæйдæр балхæны. Ныр дæр Театралон фæзуат æмæ парчы территорийыл сагъд æрцыд бынæттон розæтæ æмæ петониатæ.