2023 азы 1-æм октябры Уæрæсейы Федерацийы Хицауады №1538 Уынаффæмæ гæсгæ ивд æрцæудзысты Уæрæсейы Федерацийæ ласт товартыл таможнæйон фиддонты ставкæтæ. Ацы Уынаффæйæн йæ архайд парахат цæуы Хуссар Ирыстоны æмæ Абхазы дæр.
Ацы Уынаффæмæ гæсгæ, товарты хицæн категоритыл таможнæйон фиддонты ставкæ, кæцытæ ласт цæуынц Уæрæсейы Федерацийæ, гæнæн ис æмæ фæфылдæр уой 7 проценты онг. Банысан кæнын хъæуы, ацы уынаффæ кæй нæ бандавдзæн æнæмæнгхъæуæг цардуагон товартыл, растдæр та: фыдызгъæл æмæ фыдызгъæлæй субпродукттæ, æхсыр æмæ æхсыры сæртæ, йогурт, нæлхæ æмæ хурмæзиллæджы сой, цыхт æмæ къæдор, макаронты продукци, ссад-нæмыгон продукци (дзул, ссадæй конд кондитерон продукци æмæ æндæр кондитерон адджинæгтæ), къаннæг сабиты хæринагæн хъæуæг продукттæ, дарæс, дзабыр, хæлцадон хими, фармацевтон продукци, бензин, дизелон æртаг, æрдзон газ, афтæ ма æндæр товартæ.
Таможнæйон фиддонты ног ставкæтæй пайда кæнын гæнæн ис æмæ æркæна негативон фæстиуджытæм, цæрджыты æлхæныны хъомысад фæкъаддæр кæнгæйæ.
Хуссар Ирыстоны товартыл æргътæ фæбæрзонддæр кæнын ма æруадзынæн республикæйы разамынад консультацитæ аразы уæрæсейаг коллегæтимæ æмæ кусынц проблемæ аскъуыддзаг кæныныл.
Ныртæккæ Гаглойты Алан ис кусæгон балцы Абхазы Республикæйы, уыцы нымæцы ацы фарсты фæдыл координацигонд позицийыл бакусыны сæраппонд дæр.
Æмцæдисон æмæ интеграцион ахастыты уæлдæр æмвæзад хынцгæйæ, дызæрдыггаг нæу сæвзæргæ проблемæ æвæрццагæй скъуыддзаг кæй æцæудзæн.
Банысан кæнын хъæуы, уæрæсейаг фарсимæ бадзырдтæм гæсгæ республикæйы кæй æнхъæлмæ кæсынц бензины аргъы фæкъаддæр уæвынмæ.
