Абоны бонмæ республикæйы нæй коронавирусæй фæрынчынуæвыны иунæг цау дæр. Инфекцион хайады цы цалдæр адæймагмæ зæрдæ æхсайы, уыдон сты, Хуссар Ирыстонмæ æндæр бæстæтæй чи æрцыд, ахæмтæ. Уыдон сæхи æвзæр нæ хатынц, фæлæ æдасдзинады нысанæн изоляци æрцыдысты æхсæнадæй. Хæдзармæ æрвыст цы пациенттæ æрцыдысты, уыдонæн та лæвæрд æрцыд инструкцитæ, цæмæй æххæст кæной санитарон-эпидемиологон домæнтæ. Карзæй хъусдард цæуы, арæны сæрты нæм Цæгат Ирыстон-Аланийы территорийæ чи рахизы, уыцы æмбæстæгтæм. Уыдон хъуамæ барой сæ тæвд, æххæст кæной «Югосетпотребнадзор»-ы амындтытæ.
Мах бацымыдис кодтам, республикон рынчындоны реанимацион хайад куыд цæттæ у коронавирусы инфекци COVID-19-ы эпидеми куы сытынг уа, уæд рынчынтæ райсынмæ.
Уый фæдыл нын республикæйы сæйраг реаниматолог Плиты Александр загъта: «Фыццаг рады уал мæ фæнды нæ республикæйы цæрджытæм бахатын, цæмæй хъахъхъæной сæхи, хиизоляцийы режим æххæст кæной, архайой, цæмæй хæдзæрттæй ма хизой æнæхъуаджы. Анестезиологи, реанимаци æмæ интенсивон терапийы хайадты цæттæ кæнæм, цы медицинон ифтонгæдтæ нæм ис, уыдон. Бæрæг куыд у, афтæмæй реанимацимæ æрбахауы, иууыл уæззаудæр уавæры цы рынчынтæ вæййынц, уыдон. Ахæм рынчынтæн хатт сæ бон нæ вæййы улæфын æмæ сæ уæд бахъæуы рæуджыты вентиляцийы аппаратмæ баиу кæнын. Республикæйы ныртæккæ ахæм аппараттæ ис 26. Уыдонæй ис зæрæдтæ дæр, кæцытæ сты советон дугæй, фæлæ уæддæр кæнынц сæ куыст. Ис нæм, нырыккон домæнтæн дзуапп чи дæтты, бирæ функцитæ чи æххæст кæны, ахæмтæ. Ацы аппаратыл кусын чи зоны, уыдон сты цыппар. Хъæуæг медицинон æрмæджытæй кæд абон цух не стæм, уæддæр эпидемийы рæстæджы гæнæн ис фæцух уæм. Фæлæ уыцы проблемæйыл ныртæккæ куыст цæуы, Уæрæсейы Федераци ныфс æвæры, кæй нæ сифтонг кæндзæнис æппæтхъæуæг æрмæджытæй дæр. Ныфс нын бавæрдтой рæуджыты вентиляцийы аппараттæй дæр.
Уый ма загъта, реанимацийы хайад цæттæ кæй у, уыцы иурæстæджы дæсгай рынчынтæ райсынмæ, фæлæ куы бахъæуа, фæрынчынуæвджыты нымæц æгæр куы схиза, уæд спайда кæндзысты рынчындоны иннæ хайадты палатæтæй дæр.
Ныртæккæ рынчындоны рынчынты нымæц у цъус. Цалдæр боны размæ, уыдонæн сæ фылдæр æрвыст æрцыдысты хæдзæрттæм, медицинон амындтытæ сын ратгæйæ.
Нæ уацх.
Comments are closed, but trackbacks and pingbacks are open.