Азты сæрты дзырды фарны рухс кад æмæ радимæ чи хæссы, царды уадтымыгътæй чи нæ сæтты, уыцы рæстаг зонды фæндагыл дзыллæты хонæг литературон-аивадон æхсæнадон-политикон журнал «Мах дуг» акаст йæ 85 азы сæрты.
Зын фæндæгтыл рацыд уал азы дæргъы, бындур та йын æрæвæрдтой нæ аивадон интеллигенцийы хуыздæр минæвæрттæ. Йæ редактортæ уыдысты Ирыстоны зындгонд фысджытæ æмæ æхсæнадон архайджытæ: Косираты Сæрмæт, Дзаттиаты Алыксандр, Боциты Барон, Бæдуаты Хъазбег, Епхиты Тæтæри, Дзаттиаты Тотырбег, Плиты Грис, Токаты Асæх, Мæрзойты Сергей, Цæгæраты Максим, Цырыхаты Михал, Богазты Умар, Хъодзаты Æхсар æмæ Мамыкъаты Хъазбег. Хетæгкаты Оксанæ та æрæджы слæууыд «Мах дуг»-ы сæргъы, у йæ фыццаг сылгоймаг-редактор.
85 азы дæргъы «Мах дуг» йæ ном дæр никуы аивта, уымæн æмæ æппæт рæстæджытæн дæр у дзуаппдæттæг. Йæ байгом кæныныл та бирæ бафыдæбон кодта нæ зындгонд прозаик Коцойты Арсен.
Йæ фыццаг номыры рацыдæй фæстæмæ журнал бирæ курдиатджын фæсивæд схъомыл кодта, хæрз стæм ирон фыссæг ис, ууыл йæ фæндаг чи нæ ракодта. Йæ фæрстыл мыхуыр кодта æмæ кæны нæ фысджыты уацмыстæ, æмдзæвгæтæ, пьесæтæ, радзырдтæ, публицистон æмæ æндæр литературон æрмæджытæ. Уыцы уацмыстæ дзыллæты зæрдæтæм арынц уæрæх фæндаг.
Цæгат Ирыстоны Национ зонадон библиотекæйы ауагъдæуыд «Мах дуг»-ы 85 азы юбилейон мадзал. Цы бирæ адæм æм æрбацыд, уыдон уыдысты нæ интеллигенци, зонадон æмæ сфæлдыстадон кусджытæ, ахуыргæнджытæ, артисттæ, æхсæнадон архайджытæ, фæсивæд, журналкæсджытæ.Ирон музыкæйы зæлтимæ мадзал байгом кодта æмæ йæ амыдта Цæгат Ирыстоны адæмон артист Æлбегаты Алан. Райдианы уал мадзалы архайджытæ базонгæ сты экраныл «Мах дуг»-ы рацæугæ фæндагимæ, чи дзы куыста, абон ын рухс чи уынын кæны, уыдонимæ.
Республикæйы хицауады Сæрдары хæдивæг Фадзайты Æхсарбег бакаст журналы номыл Цæгат Ирыстоны Сæргълæууæг Битарты Вячеславы Арфæйы фыстæг.
Уый фæстæ «Мах дуг»-æн раарфæ кодтой æмæ йын хорз фæндиæгтæ загътой: историон зонæдты доктор, профессор, Уæрæсейы Федерацийы ахуырады Академийы уæнг-уацхæссæг, Цæгат Ирыстоны паддзахадон университеты президент, фыссæг, публицист Мæхæмæтты Ахуырбег, Кæсæг-Балхъары Республикæйы адæмон поэт Салих Гуртуев, Хъæрæсе-Черкесты адæмон поэт, журнал «Минги-Тау»-ы сæйраг редактор Аскер Додуев (уый Хетæгкаты Оксанæйы схорзæхджын кодта Хетæгкаты Къостайы майданæй), Мæхъæлы фысджыты Цæдисы сæрдар Раиса Дидигова, газет «Рæстдзинад»-ы сæйраг редактор Хозиты Барис, журнал «Ирæф»-ы сæйраг редактор Скъодтаты Эльбрус, «Иры Стыр Ныхас»-ы Координацион советы сæрдары фыццаг хæдивæг Еналдыты Хъазбег, æхсæнадон змæлд «Иудзинад»-ы уæнг Токты Валодя, Кæсæджы Али Шогенцуковы номыл сфæлдыстадон хъæппæрисы рæзты æххуысæн хæрзаудæн фонды сæрдар Леонид Шогенцуков, Дзæуджыхъæуы центрон библиотекæйы бæстæзонæн хайады сæргълæууæг Дзугаты Риммæ, рауагъдад «Ир»-ы сæйраг редактор Тъехты Тамерлан, Цæгат Ирыстоны культурæйы кусджыты профцæдисты организацийы сæрдары хæдивæг Годжиаты Еленæ, журнал «Мах дуг»-ы активон кæсæг, фæллойы ветеран Кцойты Астемыр, республикæйы мыхуыры æмæ дзыллон коммуникациты комитеты сæрдар Фидараты Юрий, Дзæуджыхъæуы бынæттон администрацийы сæргълæууæджы уынаффæгæнæг Гиоты Хъазыбег. Уыдон се ‘ппæт дæр журналы редакцийæн бакодтой зæрдылдарæн лæвæрттæ.
Кæронбæттæны раныхас кодта æмæ бæрæгбонон мадзалы æппæт архайджытæн бузныг загъта Хетæгкаты Оксанæ.
Мадзалы сæ арæхстдзинад æвдыстой Цæгат Ирыстоны сфæлдыстадон коллективтæ.
Фарны фæндæгтыл цу, нæ уарзон журнал, «Мах дуг»!
ГАССИТЫ Моисей
Comments are closed, but trackbacks and pingbacks are open.