Хуссар Ирыстоны Парламенты уагъд æрцыд социалон политикæ æмæ æнæниздзинад хъахъхъæныны фæдыл комитеты рабадт комитеты сæрдар Къозонты Аланы сæргълæудæй.
Рабадты хайадисджытæ æркастысты «Æнæмæнгхъæуæг пенсион фæдзæхс-тады тыххæй» РХИ-йы закъоны проектмæ.
Къозоны фырт куыд банысан кодта, афтæмæй РХИ-йы пенсион фондимæ иумæ комитет аскъуыддзаг кодта «Æнæмæнгхъæуæг пенсион фæдзæхстады тыххæй» закъонмæ ивындзинад бахæссын, термин «фæллойадон пенси» баивын «фæдзæхстадон пенсийæ». РХИ-йы Пенсион фонды сæрдар Тасойты Азæ йæ рады банысан кодта, зæгъгæ, «Æнæмæнгхъæуæг пенсион фæдзæхстады тыххæй» РХИ-йы закъонмæ ивындзинæдтæ бахæссыны фæстæ пенсион фонд план кæны иу цалдæр закъоны проектыл бакусын.
«Зæгъæм, мах цы закъоны проектыл бакуыстам «Æнæмæнгхъæуæг пенсион фæдзæхстады системæйы сæрмагонд персонификацигонд хыгъды тыххæй» уымæ барадон кусджыты иунæг фиппаинаг уыд дзырдбастытæ «фæллойадон пенситæ» æмæ «фæдзæхстадон пенситы» æнæмбардзинады тыххæй. Уый размæ пенситы тыххæй цы закъон ист æрцыд, уым дæр ис æмбарынад «фæдзæхстадон». Уымæ гæсгæ ма, мах хъæуы закъоны проекты текстмæ æнæмæнгхъæуæг ивындзинæдтæ бахæссын», – загъта Тасойты чызг.
Ацы фарст хаст æрцыд РХИ-йы Парламенты президиумы рабадтмæ.
Ацы фарсты фæдыл депутат Плиты Александр æрæмбырдуæвджыты базонгæ кодта РХИ-йы кусæг æмбæстæгтæн стаж банымайыны тыххæй фарсты фæдыл уынаффæйы хатдзæгтимæ, кæцыйыл уынаффæ кодтой УФ-йы Федерацийы Советы РХИ-йы Парламенты депутатты хайадистæй.
«Мах Федерацийы Советы куы уыдыстæм, уæд уынаффæ кодтам алыгъуызон социалон темæтыл, уыимæ иумæ, цæмæй УФ-йы нымайой, РХИ-йы территорийыл цы уæрæсейаг æмбæстæгтæ цæрынц, уыдоны стаж. Уыдон ацы фарстмæ се ‘ргом раздæхтой. Ныр хъæуы конкретон фыстæг бацæттæ кæнын æмæ йæм ногæй æркæсын», – загъта Плийы фырт.
Уый ма банысан кодта, Хуссар Ирыстоны стажы нæ банымайынæй æвзæрдæр кæй кæндзæн кадрон политикæ дæр.
«Кадрон политикæ æвзæрдæр кæндзæн, уымæн æмæ махæн нæ бон нæу РХИ-мæ фæстæмæ æрбаздахын, УФ-мæ квотатæм гæсгæ ахуыр кæнынмæ чи ацыд, уыдоны. Адæм цæттæ сты кусынмæ, сæ бон æрцæуын уымæн нæу, æмæ тæрсынц, УФ-йы цы стаж бакуыстой, уый фесафынæй», – банысан кодта депутат.
Комитеты ма уынаффæ кодтой «Республикæ Хуссар Ирыстоны Парламенты тыххæй» Конституцион закъоны проект, «Закъæттæ хъахъхъæнын æмæ æххæст кæнынмæ хъусдарды тыххæй» закъоны, «Республикæ Хуссар Ирыстоны парламенты депутатты æвзæрстыты тыххæй» РХИ-йы Конституцион закъонмæ ивындзинæдтæ бахæссыны тыххæй» РХИ-йы конституцион закъоны, «Политикон партиты тыххæй» РХИ-йы закъоны проектыл.
Республикæ Хуссар Ирыстоны Парламенты информацион-аналитикон службæ
Comments are closed, but trackbacks and pingbacks are open.