Горæт Цхинвалы Æлборты Феликсы номыл музыкалон ахуыргæнæндоны уагъд æрцыд ирон зарæджы республикон фестиваль «Ирон зарæг», зæгъгæ, ахæм номимæ. Мадзалмæ фæуазæг сты Паддзахад Аланийы сæргълæууæг Бибылты Анатоли, Хицауады Сæрдар Пухаты Эрик, Культурæйы министр Зассеты Жаннæ, ирон национ музыкæйæн табугæнджытæ æмæ æндæр уазджытæ. Мадзалы райдианы йæ амонджытæ Дыгъуызты Лианæ æмæ Карсанты Гурам банысан кодтой ирон æвзаджы хъахъхъæнын æмæ размæцыды нысаниуæг, зæгъгæ, алы ирон адæймаг дæр хæсджын у æмæ зона йæ мадæлон æвзаг.

Фестивалы сæ арæхстдзинад равдыстой нæ республикæйы горæттæ æмæ районты фæлтæрд зæрæггæнджытæ, хортæ æмæ сфæлдыстадон коллективтæ. Æххæстгонд дзы æрцыдысты хъайтарон æмæ адæмон зарджытæ, куыд, зæгъæм, «Балойы зарæг», «Хъайтар Остъаты Алексийы зарæг», «Мæ зæрдæ хæхты» æмæ бирæ æндæртæ.

Фыццаг рады уал сценæмæ хуынд æрцыдысты Дзауы районы минæвæрттæ. Музыкалон коллективтæ æмæ хортæ æххæст кодтой ирон зынгæ поэтты æмдзæвгæтыл фыст зарджытæ, зынгæ композицитæ æмæ адæмон зарджытæ. Уыдон фæстæ сæ арæхстдзинад равдыстой иннæ районты минæвæрттæ дæр. Уыдон се ‘ппæт дæр хорзæхджын æрцыдысты дипломтæй.

Паддзахады сæргълæууæг Бибылты Анатоли стыр бузныг загъта фестивалы хайадисджытæн сæ аив зарды тыххæй.

«Мах мадæлон æвзагыл куынæ дзурæм, нæ сывæллæттæ иронау куынæ ныхас кæной, уæд мах ирæттæ не стæм. Ууыл дызæрдыг дæр ничи кæны. Нæ бæстæ нын рæсугъд кæнынц мадæлон æвзаг, национ кæфтытæ æмæ зарджытæ. Хуыцау зæгъæд æмæ алкæцы комæй дæр хъуысæт ирон дзырд æмæ зард», – банысан кодта Бибылты Анатоли.

Уый ма фæндон бахаста, цæмæй нысан цæуа ноджыдæр иу бæрæгбон –  ирон национ дарæсы бæрæгбон. Йæ ныхæстæм гæсгæ, уый гæнæн ис, æмæ нысан цæуа Хетæгкаты Къостайы райгуырæн боны, ома, 15 октябры.

«Махæн ис Ирон æвзаджы бон æмæ æз ахъуыды кодтон, зæгъгæ, саразын хъæуы ирон национ дарæсы бæрæгбон дæр. Ацы фæндоныл дарддæр дæр дзырд цæудзæн нæ хицауады, фæлæ мæ хъуыдымæ гæсгæ ацы бон нысан кæнын хъæуы Хетæгкаты Къостайы райгуырæн боны. Тынг рæсугъд уаид, уыцы бон не ‘ппæт дæр национ дарæсы куы уæм, уæд. Ууыл мах ноджыдæр ахъуыды кæндзыстæм, фæлæ йæ сымах уæ къухæмдзæгъдæй сбæлвырд кодтат йæ ахсджиагдзинад», – загъта Президент.

Бæрæгбоны кæрон та зарыдысты нæ горæты зарæггæнджытæ.

Кокайты Заринæ

Ацы æрмæджытæ дæр бакæс:

Default ThumbnailЗарæг – цардимæ æмдзугæнæг Ресы хъæбыс – йæ сабион авдæн Кад кодтой мадæлон æвзагæн «Ирон æвзаг – нæ иугæнæг, нæ хотых» Арфæтæ — Ирон æвзаг æмæ литературæйы боны цытæнАрфæтæ — Ирон æвзаг æмæ литературæйы боны цытæн

Comments are closed, but trackbacks and pingbacks are open.