Ирон арæныл хъуамæ ирон тырыса фæйлауа!

     Фæстаг бонты Ирыстоны хуссар хайы цæрæг адæмы сæйраг хъусдард здæхт уыд, Знауыры районы Цънелисы хъæуы сæрмæ гуырдзиаг полици цы æнæзакъонон пост сæвæрдта, уымæ. Уавæр кодта æндыгъдæй æндыгъддæр. Республикæйы къухдариуæгады раз цæлх-дуртæ æвæрын зæрдиагæй кæй фæнды, уыдонæн та фадат фæцис сæхи равдисынæн, сæ риутæ тымбыл къухтæй ныххойынæн: азым æвæрдтой куыд Хуссар Ирыстоны раздæры къухдариуæггæнджытыл, афтæ ныры къухдариуæгадыл дæр. Сæ домæн уыд, кæд гуырдзиаг æнæзакъонон постæн дипломатон амæлттæй сисæн нæй, уæд æй сисын хъæуы тыхы фæрцы. Тыхы фæрцы скъуыддзаггæнгæйæ, ахæм хъуыддæгтæ цæмæ æркæнынц, уый та хорз зонæм не ‘ппæт дæр. Йæ риу тынгдæр чи фæхойы, уыдон Гуфтайы хиды бын раздæр кæй смидæг вæййынц, уый та ноджы хуыздæр зонæм…

Тыхæй спайда кæнын æнцон у, зын зондæй спайда кæнын у. Æмæ, табу Хуыцауæн, фæтыхджындæр зонд! Нæ республикæйы æдасдзинад æмæ арæнтæ хъахъхъæнын кæмæ хауы, уыцы лæппутæ Ирыстон æмæ Гуырдзыстоны æцæг арæныл æмбæлон ран сæвæрдтой закъонон пост, кæцы дыууæ километры бæрц фалдæр у гуырдзиаг æнæзакъонон постæй.

Æмæ сулæфыдысты нæ хæствæллад адæм. Зæрдиаг арфæтæ кæнынц нæ республикæйы Президент, Уæлдæркъомандæгæнæг Бибылты Анатоли æмæ ацы ахсджиаг операцийы æппæт хайадисджытæн.