Президент Бибылты Анатоли базонгæ арæнхъахъхъæнджыты службæ æххæст кæныны уавæртимæ хуссарирыстойнаг-гуырдзиаг арæнгæрон цæрæгджын пункт Уисты (Цънелисы) районы. Уæлдæр сæйраг командæгæнæг Знауыры районы администрацийы сæргълæууæг Сиукъаты Олег, Паддзахадон æдасдзинады комитеты сæрдар Олег Ширан æмæ Паддзахадон æдасдзинады комитеты Арæнгæрон службæйы хистæры хæстæ æххæстгæнæг Алиханты Валериимæ бабæрæг кодтой Гуырдзыстонимæ арæны арæнгæрон пост.
Ныр ам цалдæр азы дæргъы Паддзахадон æдасдзинады комитеты Арæнгæрон службæйы кусджытæ æхсарджынæй хъахъхъæнынц æмбæстæгты сабырдзинад æмæ Республикæ Хуссар Ирыстоны территориалон æнæхъæндзинад.
Фыццаджы уал, Бибылты Анатоли раарфæ кодта арæнхъахъхъæнджытæн Арæнгæрон службæйыл 17 азы сæххæсты цытæн æмæ сын йæ цæст бауарзта фидар æнæниздзинад, хъæддыхдзинад, сабырад æмæ фæрныгад.
«Æз бузныг дæн уæ удуæлдайдзинад, уæ разылæууæг хæстæ кæй скъуыддзаг кæнут, уый тыххæй», – загъта уый.
Паддзахады сæргълæууæг банысан кодта, провакацион гуырдзиаг посты фарст, кæцы æвæрд æрцыд Хуссар Ирыстоны территорийыл скъуыддзаг кæнын хъæуы дипломатон æгъ-дауæй.
«Иу хатт мæ йæ зæгъон, ацы фарстæн хæсты фæрцы скъуыддзаггæнæн нæй. Уымæн æмæ цыфæнды тыхон уынаффæ дæр у хæст. Мах нæ хъæуы хæст, Республикæ Хуссар Ирыстоны территорийыл æнæзакъонон посты фарст мах скъуыддзаг кæнæм баныхæсты фæрцы. Æз афтæ хъуыды кæнын æмæ ацы фарст скъуыддзаг æрцæудзæн. Иууылдæр æй хорз æмбарынц, нæ европайаг партнертæ дæр, гуырдзиаг фарс æй тынг хорз зоны, ацы пост кæй ис Хуссар Ирыстоны территорийыл. Мах уал сифтонг кодтам не ‘мбæстæгты æдасдзиинад. Арæнгæрон службæйы кусджытæ æппæт дæр аразынц уый тыххæй», – загъта уый.
Бибылты Анатоли банысан кодта, зæгъгæ, æнæзакъонон гуырдзиаг посты йедтæмæ, иннæ хай контрол кæнынц Республикæ Хуссар Ирыстоны арæнхъахъхъæнджытæ.
Уый æрныхас кодта арæнхъахъхъæнджытимæ неформалон уавæры, базонгæ се службæ æххæст кæныны уавæртимæ.
Президент ма фембæлд Уисты хъæуы цæрджытимæ, кæцытæ йæм бахатыдысты сæ проблемæтимæ. Банысангонд æрцыд, хуссарирыстойнаг арæнгæрон пост сæвæрыны фæстæ цæрджытæ сæхи хатынц æдасæй.
Comments are closed, but trackbacks and pingbacks are open.