ФЫДÆЛТÆЙ  НЫН  БАЗЗАД…

Фыдæлтæй нын баззад уазæгæн лæггад кæнын. Кæд æй алчи нал æххæст кæны, уæддæр ма хорз адæм бирæ ис. Йæ цæхх æмæ йæ къæбæр йæ армыл чи дары, уыдон фæрнджын æмæ арфæйаг сты.

Æвæццæгæн æй алчидæр зоны, боныхъæды аххосæй дардмæцæуæг уæзласæн машинæты шофыртæ цы зындзинæдтæ æвзарынц, уый. Зæйтæй тас кæй у, уый аххосæй Арвыкомы  фæндагмæ Ларсы пост арæх æрæхгæнынц æмæ машинæтæн дæр, кæй зæгъын æй хъæуы, ахизæн нал вæййы. Æмæ байдзаг сты республикæйы фæндæгтæ «КамАЗ»-тæй. Иу 2000 машинæйы лæууынц Беслæнмæ бацæуæны, Æрхонкæйы цур, Джызæлмæ фæндагыл сыхаг республикæтæй æмæ Уæрæсейы алы горæттæй. Дзæвгар дзы ис фæсарæнтæй дæр. Лæууынц дыгай, æртыгай къуыритæ.  Уым æввæхсты чи цæры, уыцы хæларзæрдæ адæм сæ рохуаты нæ уадзынц. Кæй йæ къух куыд амоны, афтæ сæм исты хъарм хæринаг бадæтты. Разынд ахæм лæппутæ дæр æмæ сын фæндаджы хъæбæрыл фынгтæ чи равæрдта, кæнæ сæ хæрæндонмæ чи ахуыдта.

Республикæйы разамынд дæр уавæр хынцгæйæ, бахаста йæ лæггады хай. Дзæуджыхъæуы, стæй районты администрацитæ сæхимæ райстой ацы ахсджиаг хъуыддаг. Сæ хъæппæрисæй уым æввахс бынæтты райтыгътой хæринагаразæн æмæ хи схъарм кæнæн пункттæ, цæугæ хинайæн-тæ… Шофыртæ алы бон дæр сихоры хæрдæн райсынц тæвд хæринæгтæ. Уыцы куыстытæ кæнынц  Æнæнхъæлæджы уа-вæрты министрады кусджытæ æмæ волонтертæ. Афтæ уыдзæн, цалынмæ фæндаг байгом уа, уæдмæ.

Махæн нæ къухы бафтыд, Æр-хонкæйы цур чи лæууы, уыдонæй иу, Степан Кириленко, зæгъгæ, уыимæ аныхас кæнын. Уый Украинæйæ Гуырдзыстонмæ ласы продукттæ æмæ кæд сæ фылдæр фесæфт, уæддæр уыдæттыл ничиуал у. Степан дзырдта, ахæм диссаг кæй никуы федта, ууыл: «Æз никуы федтон, æцæгæлон адæмæн афтæ лæггад кæнай, уый. Кæд алыхуызон продукт нæ-химæ дæр ис, уæддæр хъуаг æййафæм хъарм хæринагæй. Ныр нæ уымæй дæр ифтонг кæнынц. Рохуаты нæ нæ уадзынц цæрджытæ дæр. Мæ цæстытыл нæ баууæндын, æцæгæлон адæм мæ фарсмæ продукттимæ  куы æрбалæууынц, уæд. Иу зæронд ус та нын цыхт æмæ нартхоры кæрдзынтæ æрбахаста. Адон æз Украинæйы куы дзурон, уæд никæй бауырндзысты. Стыр бузныг республикæйы разамынд æмæ цæрджытæн. Уæ хорздзинад уын никуы ферох кæндзыстæм».

Хуыцаубоны рабæрæг Ларсы постыл уал рог машинæтæ æмæ автобусты кæй ауагътой, уый. Уæдæ уæзласæн машинæтæ дæр кæд бирæ нал бафæстиат уаик-кой…

Нæ  уацх.