Цæрджыæн лæггадгæнæг организацитæй сæ иу у нæ республикæйы транспортон управлени. Шофыртæ графикмæ гæсгæ кусынц æмæ алы бæлццонæн дæр бакæнынц æмбæлон лæггад. Уыимæ ма цæрджытæн стыр ахъаз сты, автобус кæм хъуамæ баурома, уыцы рæтты æнхъæлмæкæсæн бынæттæ арæзт кæй æрцыдысты. Ахæмтæ ис куыд горæты, афтæ хъæууон бынæтты дæр. Фаг у зæгъынæн уый, æмæ Къостайыхъæуæй Ногхъæумæ ахæм сæрмагонд бынæттæ кæй ис фондз раны.
Фæлæ банысан кæнын хъæуы, Цхинвалæй Знауырмæ фæстаг автобус кæй ацæуы 16 сахатыл æмæ уыцы афонæй изæрмæ та нырма дзæвгар рæстæг ис, уæлдайдæр сæрды мæйты. Цæрджыты иу хай сæ бакæнинаг хъуыддæгтæ кæронмæ нæ бакæнынц горæты æмæ бафæстиат вæййынц суанг изæрмилтæм. Уæд ма сæ иунæг ныфс вæййы, Цхинвалæй Знауырмæ цы фæндаг ис, уый райдиан æмæ ацы ран фенхъæлмæ кæсынц, хисæрмагонд транспорты хицæуттæй сын сæ къух чи фæрог кæндзæн. Кæй зæгъын æй хъæуы, алы шофыр не ʻмбары бæлццоны тыхст уавæр æмæ бафæстиат вæййынц хатт талынгмæ дæр. Тыхсгæ та фылдæр уый тыххæй кæнынц æмæ дзы нæй, кæм балæууой, ахæм бынат æмæ зындзинæдтæ æвзарынц уæлдайдæр та хур æмæ къæвдабонты. Хорз уаид, æмбæлон органтæ куы бахынциккой бæлцæтты рæстагон домæн æмæ дзы арæзт куы æрцæуид балæууæн бынат.
Хуыбиаты Никъала
Comments are closed, but trackbacks and pingbacks are open.