14-æм октябры нæ горæты микрорайонтæ Нæузæххонты, Царз, Цæрæн массив æмæ Гафезы уынгтыл уагъд цæудзæн экологон акци.
Горæты администраци сиды ацы районы цæрджытæм, цæмæй зиуы хайад райсой се ‘ппæт дæр. Организатортæ куыд хъусын кæнынц, афтæмæй уынгтæ чи æфснайа, уыдонмæ техникæ æнхъæлмæ кæсдзæнис райсомæй.
Администрацийы хæрзарæзтады кусджытæ куыд зæгъынц, афтæмæй бирæуæладзыгон хæдзæртты кæртыты æфснайын нæ хауы коммуналон службæты куыстмæ. Корпусты æхсæнты пластикон æмæ авджы ботлатæ, целлофаны пакеттæ калд вæййынц иууыл фылдæр. Алчидæр бæргæ куы аудид сыгъдæгдзинадыл.Алы ныййарæг дæр йæ сабийæн куы амонид зæхмæ бырон æппарын кæй не ‘мбæлы…
Хæрзæфснайды комбинаты куысты дæр ис иу цухдзинад. Уынгты æвæрд сты быронæм-бырдгæнæн контенертæ, уырдæм цæрджытæ сæ бырæттæ калынц. Сæ сæртæ æхгæд кæй не сты, уый тыххæй сæ, хатт, хæдзарон фос дæр ныббырынц. Дымгæ фæраскъæф-баскъæф кæны бырæтты алы къуымтæм, кæд сæ æрвылбон дæр аласынц, уæддæр.
«Бынтондæр нæ аргъ кæнæм уынгмæрзджыты куыстæн. Уыдон сæ куыстмæ рацæуынц райсомы фондз сахатыл, сæрдæй-зымæгæй, къæвдабон уа æви хурбон, цæмæй нæ горæты цæрджытæ райсомæй рахизой хæрзæфснайд уынгтæм. Фæлæ сахаты фæстæ уынгтæ гæххæтт æмæ пластикон мигæнæнтæй байдзаг вæййынц. Уæлдай фылдæр бырон вæййы бирæуæладзыгон хæдзæртты ‘хсæн сабитæн хиирфæхсæн фæзуæтты. Бирæ рæтты дзы ис бронæмбырдгæнæнтæ, фæлæ сывæллæттæ уæддæр сæ къафетты цæрттæ зæхмæ æрæппарынц. Хистæртæ зиумæ сæ сывæллæтты дæр куы ракæниккой, уæд хуыздæр у. Уадз æмæ сæхи цæстæй уыной, искæй фыдæбонæн аргъ кæнын базоной. Зиуы хайадисджытæм хæрзарæзтады комбинаты быроны машинæтæ æнхъæлмæ кæсдзысты уынгты. Ахæм экологон акцитæ раззаг азты уагътой студентон фæсивæд дæр. Уыдон та-иу бафснайдтой кувæндæттæ æмæ цæугæдæтты былгæрæттæ. Фæлæ иу бафснайдæй æрдз æмæ горæты уынгты быронæй нæ фервæзын кæндзыстæм.
Курæг стæм не ‘мбæстæгтæй, цæмæй алчидæр аргъ кæна нæ иумæйаг хъуыддагæн, горæты сыгъдæгдзинадыл чи кусы, уыдонæн. Æмхуызонæй куынæ аудæм нæ горæты сыгъдæгдзинадыл, уæд нын рæсугъд никуы уыдзæн, цыфæнды хæрзарæзт дæр куы уой уынгтæ, уæддæр», – зæгъы горæты администрацийы пресс-службæ.
Дарддæр зиутæ уадздзысты Цхинвалы æндæр районты дæр. Уый тыххæй цæрджытæн развæлгъау хъусын кæндзысты дзыллон информацийы фæрæзты руаджы. Кæд æмæ цæрджытæм исты зæгъинæтæ уа развæлгъау, уæд бадзурын хъæуы мæнæ ахæм телефонтæм:
8 929 805 09 08; 8 929 805 47 71
Нæ уацх.
