Знон информацион агентад «Спутник-Хуссар Ирыстон»-ы пресс-центры нæ республикæйы Информаци æмæ мыхуыры паддзахадон комитеты сæрдар Хъотайты Марияйæн радон брифинг уыдис Цæгат Ирыстон-Алани æмæ Кæсæг-Балхъары Республикæты сгуыхт артист, режиссер Уалыты Гиви æмæ Хетæгкаты Къостайы номыл Хуссар Ирыстоны паддзахадон драмон театры директор Уалыты Мадинæимæ.

Брифинджы райдианы Хъотайты Мария банысан кодта, мах амондджыныл кæй нымайæм нæхи, ахæм хорз театр нын кæй сарæзтой æмæ йын йæ фæрнджын сценæйыл театрдзаутæн кæй æвæрдзысты хорз спектакльтæ. Дарддæр Хъотайты чызг бацымыдис кодта, Уалыты Гиви цы спектаклимæ æрцыд Хуссар Ирыстонмæ, ууыл куыд куыста, уымæ.

Уалыты Гиви, фыццаджыдæр, бузныджы ныхæстæ загъта, Хуссар Ирыстонмæ йæ кæй æрхуыдтой æмæ йын кæй уыдзæнис бынæттон театры труппæимæ кусыны фадат, уый тыххæй. «Мах абон Хетæгкаты Къостайы номыл паддзахадон драмон театры сценæйыл равдисдзыстæм Шекспиры «Ромео и Джульетта». Спектаклы архайынц Цæгат Ирыстон-Аланийы фæсивæдон театры артисттæ. Уыдон, мæнмæ гæсгæ, цæрæнбонтæм бахъуыды кæндзыс-ты, ацы спектаклимæ сын диссаджы ногарæзт театры сценæмæ рахизыны фадат кæй фæцис, уый.  Кæцыфæнды артисты бæллиц дæр у, цæмæй ахæм театры хъаза. «Ромео и Джульетта»-йы спектакль мах æрластам Уалыты Мадинæйы фæхуындмæ гæсгæ.

Мæн уырны, æмæ ацы спектаклимæ мах кæй æрзилдзыстæм гастролон балцыты», – загъта Уалыты Гиви. Уый ма банысан кодта, йæ куысты рæстæджы кæй спайда кодта пьесæйы классикон вариантæй. «Тексты иувæрсты ахизын нысан кæны уый, æмæ ды кæй нæ бамбæрстай гениалон драматургы æмæ дæхæдæг æндæр текст кæй аразыс. Æз ацы спектаклы фæнырыккондæр кодтон. Мæнмæ афтæ кæсы, Шекспир ацы пьесæ куы фыста, уæд дæр кæй уыдис нырыккон. Уæд драматург йæ хъайтарты рауагъта æндæр уæлæдарæсы, æндæр интонацитимæ, фæлæ дзырдта развæлгъау цалдæр æнусы проблемæтыл», – банысан кодта режиссер. Йæ хъуыдымæ гæсгæ, Шекспир уæд «Ромео и Джульетта»-йы цы проблемæтыл сдзырдта, уыдон ахсджиаг сты абон дæр.

Уалыты Гиви ма цыбыртæй радзырдта Цæгат Ирыстоны театралон аивады уавæры тыххæй, йæ размæцыды фæндагыл цы ныхдуртæ лæууы, уыдæттæ æмæ æндæртыл. Йæ ныхæстæм гæсгæ, Цæгат Ирыстоны цæмæй хорз актер суай, уый тыххæй сæм практикон æгъдауæй алцы дæр ис. Æрвылаз дæр рауадзынц хорз æрыгон артисттæ. Уалыйы фырт ма банысан кодта, райгонд кæй у, хуссарирыстойнаг театры сценæйыл чи хъаздзысты, уыцы æрыгон артисттæй.

Уымæй дарддæр ма рæхджы Уалыйы фырт цæгатирыстойнаг театры сценæйыл равдисдзæн Н. Гоголы пьесæмæ гæсгæ æвæрд спектакль «Ревизор» æмæ йæм сæхи цæттæ кæнынц зæрдиагæй.

Куыд ма хъусын кодтам, афтæмæй Уалыты Гиви Хуссар Ирыстоны паддзахадон театры труппæимæ апрелы мæйы æрæвналдзæнис французаг драматург Жан Ануйы комедион пьесæ «Генералы в юбках»-мæ гæсгæ спектакль æвæрынмæ.

Брифинджы ма театры директор Уалыты Мадинæ æрдзырдта, сæ куыст æмæ сæм дарддæр цы плæнттæ ис, уыдоны тыххæй. Банысан кодта, нæ театрæн, куыд Цæгат Ирыстоны, афтæ Уæрæсейы театртимæ æмгуыстады фæдыл кæй ис плæнттæ, рæхджы нæм гастролты кæй æрцæудзысты Дзæу-джыхъæуы ирон æмæ уырыссаг театртæ цалдæргай спектаклтимæ, уыдоны нымæцы – сывæллæттæн дæр. Театры директор ма банысан кодта, æппæт дæр кæй аразынц, цæмæй театры цард абуха æмæ дзы кæддæриддæр куыст цæуа. Афтæ куы уа, уæд гæнæн уыдзæнис театры статус фæбæрзонддæр кæнын академионмæ.

Цхуырбаты Ларисæ

Comments are closed, but trackbacks and pingbacks are open.