Хицауады Сæрдары фыццаг хæдивæг Джиоты Алан бабæрæг кодта Дзауы районы Начърепайы хъæуы этнологион лагерь, цыран сывæллæттæн организаци æрцыд æнæаргъæй улæфт.
Уый ныхас кодта улæфджытимæ, лагеры къухдариуæггæнæгимæ æмæ сын федта сæ цæрæн уавæртæ.
Бæрзонд хæххон палатæйон лагерь кусын райдыдта 25 июлы. Ам ныртæккæ улæфынц дыккаг фæлтæр сывæллæттæ. Æдæппæтæй, лагеры уыдысты 14-æй 18-азмæ кары 60 сывæллоны. Ныртæккæ æмбырд цæуы æртыккаг фæлтæр æмæ дзы уыдзысты студентон кары фæсивæд.
Лагерь бæрæг кæнгæйæ, фыццаг вице-премьер банысан кодта, территори кæй у æфснайд, кæй дзы ис хæлцадон æмæ медицинон блок, афтæ ма спортæй архайæн фæзуат. Уымæй уæлдай ма дзы ис хорз хæлцад.
«Æхсызгон мын у, сывæллæттæ æрмæст æрдзы хъæбысы нæ улæфынц, фæлæ ма райгуырæн зæххы истори, традицитæ æмæ культурæйы фæдыл исынц ахсджиаг зонындзинæдтæ. Уый у хорз цæвиттон сæрдыгон рæстæджы фæсивæды сæрибар рæстæг сорганизаци кæнынæн, æмæ улæфты ахæм формат æнæмæнг хъæуы », – загъта Джиоты Алан.
Йæ визиты рæстæджы уый хайад райста сывæллæттæн организацигонд мадзæлтты, бабæрæг кодта хæрæндон, цыран æй суазæг кодтой, афтæ ма байхъуыста сывæллæттæм, кæцытæ дзырдтой лагеры сæ рæстæг æрвитыны фæдыл сæ æвæрццаг тæлмæнтæ.
Кусæгон балцы Джиоты Аланимæ уыд Фæсивæдон политикæ æмæ спорты фæдыл комитеты сæрдар Хуыбежты Руслан.
