ДЗАУЫ АСТÆУККАГ СКЪОЛА – КАРАНТИНЫ

Нæ республикæйы фæстаг цалдæр боны сытынг сты коронавирусон инфекци, æмæ ма уыимæ иумæ, фæззæджы райдиан уазæлттæ кæй хæссы, уымæ гæсгæ сезонон респираторон инфекцион низтæ дæр. Дзауы районы ахуырдзау фæсивæдæй æмæ ахуыргæнджытæй дæр бирæтæ кæй фæрынчын сты, уый тыххæй рæстæгмæ æхгæд æрцыдис Дзауы астæуккаг скъола. Уый тыххæй нын фехъусын кодтой районы администрацийы ахуыры хайад.

Дзауы районы администрацийы ахуыры хайады гæс Битеты Мария нын куыд радзырдта, афтæмæй уæлдæрбанысангонд скъола 5-æм октябрæй 15-æм октябрмæ уыдзæнис карантины æмæ сывæллæттæ сæ ахуыр адарддæр кæндзысты дистанцион æгъдауæй. 225 ахуыргæнинагæй къуырисæры сæ ахуырмæ æрбацыдысты æрмæстдæр 60 сывæллоны. Уый та у тынг цъус. Кæд санитарон домæнтæ ног ахуыры азæй æххæст цæуынц, дезинфекци кæнæм кълæсты, уæддæр сывæллæттæй бирæ ис рынчын. Иуæй сезонон респираторон инфекцитæ дæр сытынг сты, иннæмæй та бирæтæн рабæрæг тесты руаджы коронавирусон инфекци. Знон бахæс кодтам Дзауы астæуккаг скъолайы ахуыргæнджытæн, цæмæй 15-æм октябрмæ сывæллæттæн уадзой дистанцион ахуыртæ. Сывæллæттæ æнæуыйдæр фæстейæ зайынц сæ ахуырæй æмæ тæригъæд сты, куы нæ ахуыр кæной, уæд. Скъола-интернаты дæр 9-æм кълас нырмадæр у æхгæд. Уыцы къласы иу чызгæн радон хатт анализты сбæрæг кодтой коронавирусæй рынчын кæй у, уый æмæ уайтагъд кълас æхгæд æрцыд. Районы иннæ скъолаты ахуыр цæуы, нырма сæм, хуыцауы фæрцы, рынчынтæ нæй. Къуайсайы астæуккаг скъолайы дæр нын дыууæ къласы уыдысты æхгæд. Сæ иуы уыдис дыууæ рынчыны, иннæ къласы та – иу, фæлæ ныр рахызтысты сæ ахуырмæ. Иудзырдæй, къаддæр нымæц ахуыргæнинæгтæ кæм ис, уыцы скъолаты ахуыр цæуы. Уымæй дарддæр ма нæм æрæджыйы онг æхгæд уыдис районы сывæллæтты цæхæрадон. Уыдон дæр карантины уыдысты дыууæ къуырийы бæрц.

Ацы вирусæн фесæфæн кæй нæй æмæ рæстæгæй-рæстæгмæ кæй сытынг вæййы, уый тыххæй, мæнмæ гæсгæ, æнæмæнгдæр хъæуы саразын коронавирусы ныхмæ вакцинæ. Æвæццæгæн афтæ уыдзæнис хуыздæр æмæ растдæр, уымæн æмæ дунейы фылдæр адæм цæуынц вакцинаци. Кæй зæгъын æй хъæуы, куыд æппæт дунейы, афтæ махмæ дæр вакцинацимæ нæ адæмы ахаст у алыгъуызон. Мах ахуырадон уагдæтты кусджытимæ арæх дзурæм ууыл, цæмæй саразой ацы тæссаг вирусы ныхмæ вакцинæ, фæлæ йæ тыххæй никæмæн саразын кæндзынæ. Алкæмæн дæр йæ бар у йæхи», – зæгъы Дзауы районы ахуыры хайады гæс Битеты Мария.

Уый ма нын куыд радзырдта, афтæмæй районы скъолаты иууылдæр развæлгъау бацæттæ кодтой зымæгон сезонмæ æмæ 30-æм сентябрæй та хъарм кæнын райдыдтой кълæсты. Рæхджы æгас Ирыстоны дæр нысан цæудзæнис ирон æвзаг æмæ литературæйы бындурæвæрæг Хетæгкаты Къостайы райгуырæн бон. Ацы бæрæгбонмæ районы скъолатæ дæр бацæттæ кæндзысты æмбæлон мадзæлттæ æмæ афтæмæй бнысан кæндзысты Къостайы бон. «Куыд æндæр азты, афтæ та ныр дæр нæ районы ахуырадон уагдæтты банысан кæндзыстæм Хетæгкаты Къостайы райгуырæн бон. Кæй зæгъын æй хъæуы, ацы бæрæгбон Дзауы астæуккаг скъолайы фæфæстæдæр уыдзæн бæрæг аххосæгтæм гæсгæ», – загъта Битеты Мария.

ЦХУЫРБАТЫ Ларисæ