Милицийы æнæведомствойон хъахъхъæнынады управленийæн снысан кодтой ног хистæр – милицийы дæлбулкъон Лалыты Рамины. Æнæведомствойон хъахъхъæнынады управленийы раздæры сæргълæууæг милицийы генерал-майор Тыджыты Амираны æрæджы снысан кодтой Криминалон милицийы хистæрæй æмæ йын уæдæй фæстæмæ йæ хæстæ æххæст кодта йæ хæдивæг Лалыты Рамин. 

Ног хистæримæ йæ дæлбаруæвæг управленийы кусджыты базонгæ кæныны мадзалмæ фæуазæг сты милицийы æхсæнадон хъахъхъæнынады управленийы сæргълæууæг Лалыты Геннади æмæ милицийы рæнхъон скондимæ куысты фæдыл управленийы хистæр Джиоты Созыр. Лалыты Геннади бузныджы ныхæстæ загъта управленийы кусджытæн, сæ службæйон хæстæ иттæг хорз кæй æххæст кæнынц, уый тыххæй, æмæ Лалыты Раминæн та ракодта арфæйы ныхæстæ.

«Сымах хорз зонгæ стут Раминимæ, цалдæр азы дæргъы фæрсæй-фæрстæм хæссут службæ, æмæ уыл ацы факт хъуамæ ноджы хуыздæрырдæм бандава. Ныры онг уыдыстут æнгом коллектив, уæ куысты процесс æвæрд ис бæрзонд æмвæзадыл, æмæ мæ дарддæр дæр ныфс ис, нымад кæй уыдзыстут цæстæвæрæн управленийыл. Уæ ног хистæрæн мæ цæст бауарздзæнис хорз æнтыстытæ йæ куысты, фидар æнæниздзинад æмæ, сæйраджыдæр та, æмбарындзинад йæ коллективы æхсæн», – банысан кодта милицийы æхсæнадон хъахъхъæнынады управленийы сæргълæууæг.

Лалыты Рамин Анатолийы фырт райгуырд  1983 азы 11 июны горæт Цхинвалы. 2004 азы каст фæцис ХИПУ-йы юриспруденцийы факультет. Йæ службæ райдыдта 2002 азы Мидхъуыддæгты министрады. 2003 азы ахызт Паддзахадон хъахъ-хъæнынады службæмæ æмæ дзы бакуыста суанг 2012 азмæ. 2013 азы кæронмæ ма службæ хаста Хъахъхъæнынады министрады. Уый фæстæ 2015 азы бацыд милицийы æнæведомствойон хъахъхъæнынады управленимæ ротæйы командирæй æмæ йæ уыцы аз ахизын кодтой ноджы уæлдæр бынатмæ – хъахъхъæнынады батальоны командирæй. 2021 азы та нысан æрцыдис управленийы хистæры хæдивæгæй. Мидхъуыддæгты министрады кусгæйæ Лалыты Рамин йæхи равдыста аккаг кусæгæй æмæ хорзæхджын æрцыд майдантæй «Защитник Отечества» æмæ «За службу на страже мира в Южной Осетии»-йæ. Ис ын бинонтæ, хъомыл кæны æртæ хъæбулы.

ДЖИОТЫ Алыксандр

Ацы æрмæджытæ дæр бакæс:

Раарфæ сын кодтой сæ профессионалон бæрæгбонæн Иу хъæуы историйæ Адæм æнкъарынц, милицийы куыст кæй хуыздæр кæны, уый Реформæтæ – юстицийы министрады Хъахъхъæнынады министрады хыгъдон æмбырд

Comments are closed, but trackbacks and pingbacks are open.