Нæ республикæйы столицæ Цхинвал æмæ районты хицæн иумиагахуырадон скъолаты грипп кæй сытынг æмæ дзы ахуырдзау фæсивæдæй бирæтæ кæй фæрынчын сты, уый тыххæй ныртæккæ сты рæстæгмæ æхгæд. Ацафон карз респираторон вирусон инфекцитæ кæй апарахат вæййынц æмæ адæмы æнæниздзинадыл æппæрццагæй кæй бандавынц, уый хынцгæйæ, нæ республикæйы Æнæниздзинад хъахъхъæныны министрад æмæ Фæлхасгæнджыты бартæ  æмæ адæймаджы фæрныгад хъахъхъæныны фæдыл комитет райсынц æмбæлон мадзæлттæ. Уыдон хъæуæгыл банымадтой, цæмæй нæ республикæйы скъолаты æмæ сывæллæтты рæвдауæндæтты конд æрцæуа карантин. РХИ-йы Ахуырад æмæ зонады министры хæдивæг Гаглойты Элиса нын бæстондæрæй радзырдта, республикæйы скъолаты æмæ рæвдауæндæттæй карантин кæцыты бакодтой, уый фæдыл. «Ацы азимæ абаргæйæ, ивгъуыд аз махмæ карантин афтæ уæрæхæй конд не ‘рцыд, фæлæ ныр бæрæг аххосæгтæм гæсгæ, алы бинонтæ дæр сæхи хизынц. Нæ республикæйы иумиагахуырадон уагдæтты сывæллæттæн фæрынчын сты сæ 20 проценты бæрц, æмæ уый та у нормæйæ фылдæр. Уымæ гæсгæ санэпидемстанцы амындмæ гæсгæ иумиагахуырадон уагдæттæ æхгæд æрцыдысты æмæ бакодтам карантин 18-æм февралмæ. Афтæ ма æхгæд æрцыдысты сывæллæтты рæвдауæндæттæ дæр дæс боны æмгъуыдмæ. Ахæм уавæр æрмæст нæ горæты нæй, ныртæккæ Дзауы районы дæр æхгæд æрцыдысты иумиаг ахуырадон уагдæттæ, уыцы нымæцы сты Къуайса æмæ Кировы хъæуы скъолатæ дæр. Цхинвалы районы та æрмæстдæр æхгæд æрцыдис Дменисы хъæуы астæуккаг скъола, иннæтæ сæ ахуыр дарддæр кæнынц. Ацы уавæр нæ бандæвта Ленингоры æмæ Знауыры районты скъолатыл.

Иумæйагæй цалынмæ ахуыргæнæн уагдæттæ æхгæд сты, уæдмæ уал сæ цæуы дезинфекцигæнæн куыстытæ, цæмæй сывæллæтты æрбацыдмæ уой сыгъдæг», – загъта РХИ-йы Ахуырад æмæ зонады министры хæдивæг Гаглойты Элиса.

Вирусон грипп уæлдæфы тагъд кæй парахат кæны, уымæ гæсгæ алкæцы адæймаг дæр хъуамæ йæ зæрдыл дара уый, рынчынæй цæуæн кæй нæй æхсæнадон бынæттæм, куыстуæттæм, сæрмагонд гигиенæмæ здахой стыр хъусдард, стæй низ куыддæр фæзыны, афтæ æвæстиатæй хъæуы дохтыртæм бацæуын æмæ сын сæ амындмæ гæсгæ хос кæнын. Ныртæккæ уый тыххæй адæммæ сидынц медиктæ дæр æмæ бæрнджындæр ахаст хъæуы дарын хъуыддагмæ.

Цхуырбаты Ларисæ

Comments are closed, but trackbacks and pingbacks are open.