Ирыстоны истори иу мыггаджы хъысмæты равдисын – ахæм нысан ис Уæрæсейы Федерацийы æрдыгæй Хуссар Ирыстоны хæдбардзинады банымадыл 10 азы сæххæсты æмæ ирон адæмы Х-æм съезды цытæн «Саулаты мыггагон дыккаг сфæлдыстадон равдыстæн». Равдысты организатортæ бацархайдтой равдисын иу мыггаджы цæвиттонæй иу фæлтæр цы зоны, уый иннæмæн куыд амоны, хистæртæ куыд кусынц æмæ сæ фæлтæрддзинад фæсивæдмæ куыд адæттынц, ирон удварн æмæ национ традицитæ бахъахъхъæнгæйæ.
Экспозицийы фæлгæтты равдыстмæ æрбацæуджыты размæ рахастæуыд нывкæнынадон аивады ахæм хуызтæ, куыд хуызфыссынад, графикæ, декоративон-прикладон аивад, архитектурæ, интерьеры дизайн æмæ нывæфтыдон къамтæ.
«Саулаты бинонты экспонаттæй æз кæцыты федтон, уыдон сты ирон зæххы уидаг. Йæ уарзондзинад, йæ ахаст йæ куыстыты чи равдыста, уыцы бинонтæ бахъахъхъæдтой ирон адæмы удварн. Ирон культурæ Хъырымы кадимæ кæй равдыстой, уый тыххæй сын стыр бузныг. Мах сæрыстыр стæм, нæ бæстæйы алы регионты, æмæ фæсарæнты ирон лæджы кад ахæм адæймæгтæ кæй бæрзонд кæнынц, уымæй», – равдыст гом кæныны рæстæджы банысан кодта Цæгат Ирыстоны культурæйы министр Милдзыхты Руслан.
Мадзалы организатортæ уыдысты Саулаты мыггагон совет, Уæрæсейы Федерацийы Хуссар Ирыстоны минæварад, Цæгат Ирыстоны Нывгæнджыты Цæдис РЦИ-Аланийы Культурæйы æмæ Нациты министрадты фарсхæцынадæй, Дунеон æхсæнадон змæлд «Ирæтты Уæлдæр Совет»-ы координацион совет æмæ фонд «Арт-Кавказ».
Comments are closed, but trackbacks and pingbacks are open.