Дыууæ столицæйы ‘хсæн хæларадон ахастыты тыххæй сразыдзинадыл къухтæ æрфыстой Сухумы Абхазы Уæлахизы бон æмæ хæдбардзинады бæрæгбон нысан кæныны фæлгæтты. Уый тыххæй хъусын кæны паддзахадон телерадиокомпани «Алани». Ахсджиаг документ ахъаз кæндзæн культурон, базарадон-экономикон, ахуырадон æмæ туристон бастдзинæдтæ сфидар кæнынæн.
Сразыдзинадыл къухтæ æрфыстой Дзæуджыхъæуы муниципалон арæзты сæргълæууæг – Дзæуджыхъæуы минæвæртты æмбырды сæрдар Александр Пациорин æмæ Сухумы горæтон æмбырды сæрдар Дмитри Осия. Сразыдзинад среализаци кæныны нысæнттæн арæзт æрцæудзæн иумæйаг мадзæлтты план æввахсдæр дыууæ азæн. Хæлардзинад арæзт цæудзæн горæтты алыгъуызон къабæзты кæрæдзийæн пайдайы æмгуыстады тыххæй. Уыдон уыдзысты инвестицион проекттæ, сывæллæтты-æвзæнгты, спортивон мадзæлттæ, сфæлдыстадон коллективты ралæудтытæ, туризмы фадыджы иумиаг проекттæ. Кæрæдзийæн сæ фæлтæрддзинад амондзысты хæларадон горæтты скъоладзаутæ, студенттæ, педагогтæ. Уыдзæн сын иумæйаг проекттæ ахуырады æмæ зонады къабазы. Уагъд цæудзысты экспертон æмæ академион мадзæлттæ. Абхазы Цæгат Ирыстон-Аланийы делегацийы сæргъ лæууыд республикæйы Сæргълæууæг Сергей Меняйло.
