ДЫУУÆ ПРЕЗИДЕНТЫ НЫФСДÆТТÆГ ФЕМБÆЛД

13 марты Кремлы Республикæ Хуссар Ирыстоны Президент Бибылты Анатоли фембæлд Уæрæсейы Федерацийы Президент Владимир Путинимæ.

Фембæлды рæстæджы Владимир Путин «æгас цу» загъта Бибылты Анатолийæн æмæ банысан кодта, тынг æхсызгон ын кæй у йæ уынд. Дарддæр дыууæ паддзахады лидертæ уынаффæ кодтой экономикон æмгуыстады фарстатыл, уыцы нымæцы Инвестицион прграммæйыл дæр.

Владимир Путин банысан кодта, зæгъгæ, дыууæ паддзахады ‘хсæн æмахастытæ æнæхъæнæй дæр рæзынц, хуыздæрæй хуыздæр кæнынц, æмæ уый хорз хъуыддаг у. Ивгъуыд аз хынцыд æрцыд то-варæрзылды рæзт. Инвестицион программæ дæр æххæст æр-цыд 4,2 миллиард сомы гуырахс-тæй. Æппæт уыдæттæ сты зæр-дæрухсгæнæн бæрæггæнæнтæ.

«Зонын æй, дарддæр размæ куыд цæуын хъæуы æмæ республикæйæн приоритетондæр цы у, уый тыххæй дæм кæй ис æндæр хъуыдытæ дæр», – загъта Уæрæсейы Федерацийы Президент.

Йæ рады Бибылты Анатоли бузныджы ныхæстæ загъта Владимир Путинæн дыууæ лидеры традицион æмæ хæларадон фембæлды тыххæй.

РХИ-йы Президент куыд банысан кодта, афтæмæй 2018 æмæ 2019 азты Инвестицион программæ практикон æгъдауæй æххæст æрцыд 100 процентæй.

«Ивгъуыд аз Инвестицион программæ æххæст æрцыд 97 процентæй, 2018 аз та – 100 процентæй. Ацы хъуыддаг нæ къухы бафтыд  Цæгат Кавказы хъуыддæгты фæдыл министрадимæ æнгом æмархайды руаджы, кæцы уæд уыд Инвестпрогаммæ реализацийы тыххæй  бæрнджын, кæй зæгъын æй хъæуы, УФ Президенты Администрациимæ æнгом æмархайды фæрцы дæр», – банысан кодта Бибылты Анатоли.

Хуссарирыстойнаг лидер куыд нымайы, афтæмæй дыууæ паддзахады æнгом бастдзинæдты руаджы бæстонгонд æрцыд Инвестицион программæйы реализацийы куыст.

Дарддæр Бибылты Анатоли куыд загъта, афтæмæй стыр куыст бакондæуыд бюджет аразыны фæдыл дæр.

«Æппæт хæслæвæрдтæ дæр, кæцытæ æвæрд уыдысты нæ разы, республикæйы къухдариуæгады раз, уыдон иууылдæр æххæст æрцыдысты. Кæй зæгъын æй хъæуы, æз бузныг дæн, ацы процессты хайад чи райста, уыдонæй се ‘ппæтæй дæр, сæ хæларадон ахаст æмæ æнгом æмархайды тыххæй. Махæн иумæ нæ къухы бафтыд æппæт уыцы хъуыддæгтæ сæххæст кæнын», – банысан кодта Хуссар Ирыстоны Президент Бибылты Анатоли.

Кæронбæттæны уый бузныг загъта Владимир Путинæн хæла-радон химæрайсты тыххæй. Уыимæ иумæ, уавæрæй спайда кæнгæйæ, Бибылты Анатоли раарфæ кодта Уæрæсейы Федерацийы лидерæн Паддзахадон æдасдзинады комитеты сырæзты боны цытæн.