ДÆ ЦÆСТ АХÆСС ДУНЕЙЫЛ

СБÆРÆГ КОДТОЙ ÆФСÆДТЫ ЦÆТТÆДЗИНАД

«Восток-2018»-ы ахуырты рæстæджы бæрæг æрцыд стыр дæрддзæгтæм æфсæдтæ аппарыны фæдыл бæстæйы транспортон инфраструктурæйы цæттæдзинад. Хъахъхъæнынадон-судæджерадон комплекс бафидар кодта хæстон рæстæджы режимы куыстмæ цæттæдзинад. Цæгаттаг флот ацыд цыппар мин милы. Дивизитæ æппæрст цыдысты авд мин километры дистанцийы. УФ-йы Хъахъхъæнынады министрады куыд банысан кодтой, афтæмæй ахæм масштабон ахуыртæ уагъд цæудзысты фондз азы дæргъы иу хатт.

УРÆД  ÆРЦЫД

Донецкы Адæмон Республикæйы сæргълæууæджы хæстæ рæстæгмæ æххæстгæнæг Денис Пушилин радзырдта, Захарченкойы амарыны хайад чи иста, уыдоны тыххæй. Пушилины ныхæстæм гæсгæ, Захарченкойы амарыны тыххæй теракт арæзт æрцыд  Украинæйы  æдасдзинады  службæйы контрфæдагуырды фæндзæм департаменты хайадистæй. Урæд чи æрцыд, уый у Украинæйы æдасдзинады советы кусæг. Уыимæ, Донецкы Адæмон Республикæйы барадхъахъхъæнджытæ рæмудзæн æрмæджы баззайæггæгтæн анализ аразыны рæстæджы сбæрæг кодтой Украинæйы æдасдзинады советæн æнæхарактерон чи сты, ахæм бæрзонд технологитæ. Уый та дзурæг у  ууыл, æмæ ацы теракт арæзт кæй æрцыд ныгуылæйнаг спецслужбæты æмархайды руаджы.

БАКÆНДЗÆН ФИДДОНТÆ

18-æм сентябры АИШ фехъусын кæндзысты Китайæ ластцæуæг товарты уæлæмхас къордтыл 10 проценты фиддонтæ бакæныны тыххæй (раздæр та план кодтой 25 проценты бакæнын). Афтæ ма АИШ-ы президенты администрацийы план кæнынц 27-28 сентябры Вашингтоны Китайы делегациимæ базарадон бадзырдты ног раунд ауадзын. Китайаг товарты уæлæмхас фиддонтæн сæ аргъ уыдзæн 200 миллиард доллары.

КУЫНÆГ ÆРЦЫДЫСТЫ

Дагъыстаны Талгийы хъæуы районы æдасдзинады федералон службæйы спецназ скуынæг кодта æртæ боевикы. Уыцы бон уым баконд æрцыд контртеррористон операцийы режим. Хæххонхъæды бынаты агуæрæн мадзæлтты рæстæджы барадхъахъхъæнæг органты кусджытæ ссардтой бандитты æртæ адæймаджы скондæй, кæцытæ хицауадмæ сæхи радтыны бæсты æхсын райдыдтой автоматон хæцæнгæрзтæй. Дзуаппон æхстæй уыдон куынæг æрцыдысты. Ныхмæлæуды рæстæджы барадхъахъхъæнджытæ æмæ цæрджытæй хъыгдард ничи баййæфта. Дагъыстаны дыууæ районы нырма ис контртеррористон режим, уагъд цæуынц оперативон-фæдагурæн мадзæлттæ.

БАБЫРСТОЙ ТÆРХОНГÆНÆГМÆ

Киевы æбæрæг адæймæгтæ бабырстой Майданы евроактивистты фехсыны тыххæй хъуыддаг чи æвзары, уыцы тæрхонгæнæг Сергей Дячукмæ. Бабырсджыты бауромын къухты нæ бафтыд, тæрхонгæнæг бахауд рынчындонмæ. Дячук æвзары Украинæйаг спецдæлхай «Беркут»-ы фондз кусæджы хъуыддаг, кæцыты аххосджын кæнынц 2014 азы 18 æмæ 20 февралы Майданы змæстыты рæстæджы евроактивистты фехсыны.

НЫХКЪУЫРД РАДТОЙ АТАКÆЙÆН

Сирийаг уæлдæфон хъахъхъæнынады тыхтæ ныхкъуырд радтой  Дамаскы дунеон аэропорты алфæмбылайы Израилы уæлдæфон гарзджын тыхты ракетон атакæйæн. Сирийы сæйраг горæты айхъуыстысты цалдæр срæмыгъды, кæцыйы фæстиуæгæн æрæппæрстой цалдæр ракетæйы. Йæ рады, Израиль не сразы Сирийы территорийы атакæйы йæ хайадисты фæдыл комментаритæ саразыныл. Сири æмæ Израиль 1973 азæй фæстæмæ формалонæй сты хæстон  уавæры.

ЦÆТТÆ КÆНЫНЦ ПРОВОКАЦИТÆ

Хайат Тахрир Аш-Шамы къорд Идлибы Басанкулы цæрæн пунктмæ æрбаластой хлоримæ цалдæр боцкъайы провокацитæ саразыны тыххæй. Сирийы уæрæсейаг фидыдады центрмæ Идлибы провинцийы цæрджытæ куыд хъусын кæнынц, уымæ гæсгæ æнæзакъонон гарзджын къордтæ сæхи цæттæ кæнынц хъæстæгæнæн буарадтæй спайда кæнгæйæ ног провокацитæм, кæцытæ здæхт сты сабыр цæрджыты ныхмæ хицауадон тыхты химион хæцæнгарзæй спайда кæныны фæаххосджын кæнынмæ. 9-æм сентябрæй фæстæмæ Хан-Шейхуны цæрæн пункты уагъд цæуынц барæй аразгæ химион атакæты видосценæтæ сисыны фæдыл репетицитæ. Уыимæ «Урс каскæтæ» террористтимæ иумæ сæхи цæттæ кæнынц æцæгæйдæр хлоры бындурыл хъæстæгæнæн буарадтæй спайда кæнынмæ, цæмæй уый фæстæ химион атакæйы фæаххосджын кæной сирийаг æфсады. Уый размæ УФ-йы Хъахъхъæнынады министрады фехъусын кодтой, зæгъгæ, ахæм провокацитæй АИШ фæнд кæнынц Сирийы территори ныццæвын.

ДУНЕОН КОНДАДОН ФОРУМ

Пекины уыд дунеон кондадон форум Уæрæсейы хайадистæй. Уæрæсейæ дзы хайад иста УФ-йы Президенты уынаффæгæнæг Сергей Глазьев. Китайаг-америкæйаг базарады фадыджы чи тынгдæр кæны, уыцы быцæутæм нæ кæсгæйæ, Китайы экономикæ стабилонæй рæзы, – фехъусын кодта Китайы адæмон политикон консультативон æппæткитайаг комитеты сæрдары хæдивæг Ли Цзипн. Йæ рады, Сергей Глазьев  æрæмбырдуæвджытæн арфæйы ныхæстæ загъта УФ-йы Президенты номæй æмæ банысан кодта, зæгъгæ, Евразийаг экономикон цæдис æмæ китайаг инициативæ «Один пояс – один путь»-ы концепциты арæзт цæуынц ахастытæ дунеон барадон нормæтæ хъахъхъæныны принциптыл. Уый ма банысан кодта, зæгъгæ, хæрзвадат барадон æхсæнады уæрæсейаг инвестортæн фадат ис китайаг æмæ æндæр дунеон партнертимæ æппæт перспективон здæхтыты æмархайд кæнынæн. Форумы куысты хайад райстой дунейы 100 бæстæйы æмæ регионты хицауадон уагдæтты, дипломатон, сæудæджерадон, хъуыддагон æмæ экспертон зылдты минæвæрттæ.

ФЫЛДÆР КÆНЫ ÆФСÆДДОН НАУТЫ НЫМÆЦ

Сирийы донбылгæрæтты цур рæзы НАТО-йы æфсæддон науты нымæц. Арабаг Республикæйы денджызон арæнтæм бацыдысты Нидерландты, Канадæ æмæ Грецийы фрегаттæ, афтæ ма базырджын ракетæтимæ бритайнаг субмаринæ дæр. Уæрæсейаг æфсæддонты бæрæггæнæтæм гæсгæ, Пентагон Зæххыастæу денджызы фылдæр кæны базырджын ракетæтæ хæссæг науты.

ФÆНДОН БАХАСТА

Французаг парти «Национальное объединение»-йы лидер Марин Ле Пен фæндон бахаста Евроцæдис фехалыны тыххæй, йæ «æнæахъуыдыгонд миграцион политикæйы аххосæй йæ нысаниуæг кæй фесæфта, уымæ гæсгæ æмæ ног баиугæнд  «Европæйаг нациты цæдис» саразыны тыххæй. Йæ хъуыдымæ гæсгæ, Евроцæдис ныртæккæйы хуызы у диктатурæйы хуызæн, кæцы куынæг кæны адæмты æмæ нæ хъахъхъæны европæйаг идея.

ТАЙФУН «МАНГХУТ»-Ы АМÆТТÆГТÆ

Филиппинты тайфун «Мангхут»-ы фæстиуæгæн фæмард сты 64 адæймаджы, 33 адæймаджы хъыгдард баййæфтой æмæ 45 та нымад цæуынц æбæргæй сæфтыл. Тайфун бахæццæ Китайы хуссар донбылгæрæттæм дæр. Гуандуны провинцийы 2,45 милуан адæймаджы бахъуыд сæ хæдзæрттæ ныууадзын. Тайфун бахæццæ Гонконгмæ дæр.

Информацион агентадты хъусынгæнинæгтæм гæсгæ