ДÆ ЦÆСТ АХÆСС ДУНЕЙЫЛ

Къухтæ æрфыстой сразыдзинадыл

Харбины (Китайы) уагъдцæуæг æхсæн-регионалон æмгуыстады уæрæсейаг-китайаг форумы къухтæ æрфыстæуыд Уæрæсейаг-китайаг юаны инвестицион фонды къухдариуæггæнæг компани саразыны тыххæй 5 миллиард юаны (781 милуан доллары бæрц)  уагæвæрдон капиталимæ. Йæ бындурæвæрджытæй ралæууыдысты Уæрæсейаг-китайаг инвестицон фонд, инвесткомпани «Суйюн» æмæ финансон холдингон компани «Дачжэн инвестмент». Уæрæсейаг-китайаг юаны фонды нысан у уæрæсейаг регионалон проекттæн инвестицион æххуыс бакæнын. Къухтæ æрфыссыны церемонийы банысанчындæуыд, зæгъгæ, инвестицийы сæйраг здæхтытæ суыдзысты энергетикæ æмæ инфраструктурæйы фадыджы проекттæ.

Фæфылдæр кодта фиддонтæ

Инди фæфылдæр кодта фиддонтæ америкæйаг товартыл. Нью-Дели ивы хатырон тарифтæ Иугонд Штатты 30 товар-тыл, индийаг æндон æмæ алюминийыл АИШ фиддонтæ кæй фæфылдæр кодта, уыцы уынаффæйæн дзуаппæн. Инди фехъусын кодта Дунеон базарадон организацийæн америкæйаг къорд товартыл фиддонтæ кæй фæфылдæр кодта, уый тыххæй.

Антидемпингон мадзæлттæ

Китайы хицауад фехъусын кодта,  АИШ æмæ Японы товарты ныхмæ рæстæгмæйон антидемпингон мадзæлттæ кæй бакодта, уый тыххæй. Развæлгъау уынаффæмæ гæсгæ, америкæйаг æмæ япойнаг компанитæ Китайы базармæ товартæ ластой фæкъаддæргонд æргътæм, кæцыйы фæстиуæгæн разианчындæуыд фыдыбæстæйон фа-дыгæн. Уый размæ АИШ-ы президент Дональд Трамп сфидар кодта номхыгъд китайаг 1100 товартыл, кæцытыл баконд æрцæудзысты 25 процентон фиддонтæ. Китайаг хицауад дзуаппæн  сфидар кодта номхыгъд америкæйаг 659 товартыл, уыцы нымæцы хъæууонхæдзарадон продукци, автомобилтæ æмæ денджызон продукттæ, кæцытыл фиддонтæ фæфылдæр уыдзысты 6 июлæй.

47 пункты денуклеаризацийы тыххæй

АИШ денуклеаризацийы тыххæй бадзырды фæлгæтты Кореяйы Адæмон Демократон Республикæйы раз æрæвæрдта 47 пункты сæххæст кæныны фæдыл домæнтæ, – уый тыххæй телеканал Эн-эйчкейæн фехъусын кодта япойнаг æддагон политикон ведомствойы сæргълæууæг Таро Коно. Йæ ныхæстæм гæсгæ, «АИШ-ы паддзахадон секретарь Майк Помпео Пхеньянмæ йæ визиты рæстæджы Цæгат Кореяйæн фехъусын кодта, зæгъгæ, Иугонд Штаттæ термин «æххæст денуклеаризаци»-йы банысан кодтой ядерон æмæ дзыллон æгъдауæй куынæггæнæг хæцæнгæрзты æндæр хуызты  химион, биологон, афтæ ма ракетæты æмæ æппæт æмбæлон объектты ликвидаци. «Уый банысан кодта, зæгъгæ, «æххæст денуклеаризацийы домæнтæ» æххæст куынæ æрцæуой, уæд Цæгат Кореяйы ахасты санкцитæ ист не ‘рцæудзысты.

Гуманитарон æххуыс

Уæрæсейаг æфсæддонтæ уарынц гума-нитарон æххуыс æмæ хос кæнынц сывæл-лæттæн сирийаг провинци Хамайы. «Абон знагиуæг фæрсты фидыдады фæдыл уæрæсейаг центр цæрæн пункт Эш-Шихайы уадзы гуманитарон акци. Алы пакеты дæр ис дзидзайы консервтæ, пырындз, ссад», – банысан кодта фидыдады фæдыл центры минæвар Артур Евсеев. Уæрæсейаг æфсæддонтæ куыд загътой, уымæ гæсгæ гуманитарон акцитæ сорганизаци кæндзысты Хамайы æндæр цæрæн пунктты дæр.

Срæмыгъдтытæ

Террористон акты фæстиуæгæн,  афгайнаг провинци Нангархары  скæсæн хайы террорист-химар цы  террористон акт сарæзта, уый фæстиуæгæн фæмард сты 35 адæймаджы, цæфтæ та фесты 54 адæймаджы. Теракты тыххæй йæхимæ бæрндзинад райста «Пысылмон паддзахады» террористон къорд.

 

***

Венесуэлæйы Каракасы æхсæвыгон клубы гранатæ кæй спырхчындæуыд, уый фæстиуæгæн  фæмардуæвджыты нымæц схызт 21 адæймаджы онг, фондз адæймаджы та фесты алыгъуызон цæфтæ.

 

«Хъырым у уæрæсейаг территори»

Æрæджы «большая семерка»-йы рабадты рæстæджы АИШ-ы президент Дональд Трамп йæ коллегæты ногæй дисы баппæрста Хъырымы Уæрæсейы территори схонгæйæ. Дипломатон фæрæзты хъусынгæнинæгтæм гæсгæ, АИШ-ы президент йæ позицийы бындур рахуыдта æрдæгсакъадахы адæм уырыссагау кæй дзурынц, уый. Уыимæ, Урс хæдзары сæргълæууæг Украинæйы схуыдта «дунейы иууыл коррупциондæр бæстæтæй сæ иу». Трамп ма фелхынцъ кодта йæ размæ президенты æмæ банысан кодта, зæгъгæ, «номхуындæй, Обама бауагъта Хъырымы Уæрæсеимæ баиу кæнын». Уымæй дарддæр  ма Трамп фæндон бахаста, цæмæй Уæрæсе фæстæмæ хайад иса «большая восьмерка»-йы.

Не сразы сты церемонийыл

Английы æмбырдгонд командæ не сразы Волгограды аэропорты йыл цытджын æгъдауæй фембæлыны церемонийыл. Англисаг футболисттæ куыддæр æртахтысты аэропортмæ, афтæ уайтагъд ацыдысты уазæгдонмæ.

Протестон акцитæ

Македонийы цæрджытæ протестон акциты рацыдысты уынгтæм. Уыдон сты бæстæйы ном аивыны тыххæй сразыдзинады ныхмæ. Массон акци уыд бæстæйы столицæ Скопьейы. Акцийы хайадисджытæ парламенты бæстыхайы цур æмбонд батыдтой æмæ бафæлвæрдтой полициæгты къордон атонынмæ. Демонстранттæ полициæгтыл æппæрстой дуртæ æмæ петардтæ. Протестгæнджытæй сæ иу – «Единая Македония»-йы лидер Янко Бачев схызт полициаг машинæйы сæрмæ, йæ къухты уыд уæрæсейаг триколор, афтæмæй.

Политикон хъаугъа

Баварийы чырыстон-социалон цæдисы сæргълæууæг, Германы мидхъуыддæгты министр Хорст Зеехофер фæнд кæны Ангела Меркелы ныхмæ ультиматум раразмæ кæнын. Уый план кæны Германæй мигрантты арвитын, кæцытæ регистрацигонд сты Евроцæдисы æндæр бæстæты, афтæ ма ног лигъдæттæн арæн сæхгæнын. Мидхъуыддæгты министрады сæргълæууæг фæнд кæны Меркелæн дыууæ къуырийы æмгъуыд радтын, мигрантты пролемæйæн альтерна-тивон уынаффæ ссарыны тыххæй.

Апарахат фадынæг

УФ-йы «Роспотребнадзор» бафæдзæхста уæрæсейæгты, Евроцæдисы 28 бæстæйы фадынæг кæй апарахат, уый тыххæй. Ведомствойы куыд банысан кодтой, уымæ гæсгæ фадынæджы ныхмæ иунæг эффективон профилактикон фæрæз у вакцинаци. 2018 азы райдианæй фæстæмæ Украинæйы фадынæгæй фæрынчын сты 18 мин адæймаджы, уыдонæй 10 минæй фылдæр сты сывæллæттæ.

Информацион агентадты хъусынгæнинæгтæм гæсгæ