ДÆ ЦÆСТ АХÆСС ДУНЕЙЫЛ

Футболæй дунейы чемпионат

Планетæйы сæйрагдæр цау у Уæрæсейы уагъдцæуæг футболæй дунейы чемпионат. 14-æм июны Мæскуыйы цы цаутæ цыдысты, уыдонмæ кастысты æппæт континентты дæр. Иу мæйы дæргъы æппæт планетæ кæсдзæн футболмæ. Дунейы футболуарзджытæн арфæ ракодтой УФ-йы Президент Владимир Путин æмæ ФИФА-йы президент Джаннни Инфантино.

Фембæлдтытæ фæсарæйнаг лидертимæ

УФ-йы Президент Владимир Путинæн къорд фембæлды уыд фæсарæйнаг лидертимæ, кæцытæ Уæрæсемæ æрцыдысты футболæй дунейы чемпионатмæ. Путин фембæлд Азербайджаны лидер Ильхам Алиевимæ, Сомихстоны премьер-министр Никол Пашинянимæ, Парагвайы сæргълæууæг Марио Абдо Бенитесимæ, Панамæйы президент Хуан Карлос Варела Родригесимæ, Хъыргъызтаны президент Сооронбай Жээнбековимæ æмæ бирæ æндæртимæ.

Коллегæты баныхæстæ

Уæрæсейы æмæ Грецийы фæсарæйнаг хъуыддæгты министрадты сæргълæуджытæ Сергей Лавров æмæ Никос Котзиас æруынаффæ кодтой НАТО æмæ Евроцæдисимæ Мæскуыйы ахастытыл. Сергей Лавровы ныхæстæм гæсгæ Мæскуы æмæ Афинтæ хъуыды кæнынц æмхуызон, зæгъгæ, УФ æмæ Евроцæдисы ‘хсæн диалог хъæуы фæхуыздæр кæнын.

Ацæудзысты отставкæйы

Гуырдзыстоны премьер-министр Георги Квирикашвили фехъусын кодта, зæгъгæ, уынаффæ райста хицауады сæргълæууджы бынатæй ацæуыны тыххæй къухдариуæггæнæг парти «Грузинская мечта»-йы йе ‘мтохгæнджытимæ консультациты фæстæ. «Къухдариуæггæнæг командæимæ не ‘хсæн сæвзæрдысты быцæудзинæдтæ алыгъуызон здæхтыты. Сæрмагондæй, дзырд цыд мæ къухдариуæгады бын хицауады ауадзгæ экономикон политикæйы тыххæй», – фехъусын кодта Квирикашвили. Уый йæ отставкæйы тыххæй фехъусын кодта экстренон брифинджы.

Æркæсдзæн пенсион закъондæттынадмæ

Паддзахадон Думæйы пенсион реформæйы фæдыл закъоны проекты фыццаг бакаст гæнæн ис уа 19 июлы, – уый тыххæй фехъусын кодта закъоны проектты фæдыл фракци «Иугонд Уæрæсе»-йы къухдариуæггæнæджы фыццаг хæдивæг Андрей Исаев. Йæ ныхæстæм гæсгæ Паддзахадон Думæмæ документтæ бавдисдзысты 16 июны æртæфарсон къамисы рабадты фæстæ. Думæйы Совет сæм æркæсдзæн 18 июны. 14 июны хицауад хорзыл банымадта пенсион кар фæфылдæр кæныны тыххæй закъоны проекты. Афтæмæй 2028 азмæ план цæуы нæлгоймæгты пенсион кар 60 азæй 65 азмæ фæфылдæр кæнын, æмæ 2034 азмæ сылгоймæгтæн та 55 – азæй 63 азмæ.

Амард зынгæ режиссер

Дæргъвæтин рынчыны фæстæ 82 аздзыдæй  йæ цардæй ахицæн зынгæ кинорежиссер Станислав Говорухин. Йæ кинофильмтæ  «Место встречи изменить нельзя», «Вертикаль», «Ворошиловский стрелок», «Берегите женщину» æмæ æндæртæ раджы систы киноклассикæ. Уыд стæм курдиаты хицау адæймаг. Йæ сабибонты уарзондæр чингуытæ «О приключениях Робинзона Крузо и Тома Сойера», «О поисках капитана Гранта»-йы фестын кодта сывæллæты хуыздæр фильмтæ.

Уадзынц баныхæстæ

Хуссар Корея æмæ Кореяйы Адæмон Демократон Республикæйы ‘хсæн райдыдтой баныхæстæ арæны районы æфсæддон фарстыты æмæ æндыгъддзинад фæныллæгдæр кæныны фæдыл. «Мах план кодтам ахæм фарстытыл æруынаффæ кæнын, куыд дыууæ Кореяйы ‘хсæн æндыгъддзинад фæныллæгдæр кæнын, афтæ ма министрты æмвæзадыл фембæлд сорганизаци кæнын. Пханмунджомскаг декларацимæ гæсгæ æфсæддон фарстыты фæдыл бадзырдтæ царды ныбиноныг кæнын», – фехъусын кодта журналисттæн Хуссар Кореяйы делегацийы сæргълæууæг инæлар-майор Ким До Гюн. Декларацийыл къухтæ æрфыстæуыд 2018 азы 27 апрелы дыууæ Кореяйы саммиты хатдзæгтæм гæсгæ.

Ногæй та æртхъирæн кæны Китаймæ

АИШ-ы президент Дональд Трамп та æртхъирæн кæны Китаймæ базарадон хæст райдайынæй, кæцы гæнæн ис æмæ бандава дунеон экономикæйы уавæрыл. АИШ фæнд кæны иннæ къуыри китайаг экспортыл хъалонтæ фæфылдæр кæнын. Пекинæн лæвæрд æрцæудзæн иу мæй æмæ æрдæг ахъуыды кæнынæн æмæ компромисс куынæ ссардæуа, уæд дыууæ бæстæйы ‘хсæн райдайдзæн базарадон хæст. Китайаг экспортон товарты номхыгъд, кæцытыл фæнд кæнынц уæлæмхас тарифтæ бакæнын, мыхуыр æрцыд апрелы мæйы. Уæд АИШ фехъусын кодта, зæгъгæ, уыдон 25 проценты фæфылдæр кæндзысты фиддонтæ алыгъуызон товартыл, уыцы нымæцы телевизортæ, псулæхсæн æмæ митсыгъдæггæнæн машинæтыл.

 

Информацион агентадты хъусынгæнинæгтæм гæсгæ