ДÆ ЦÆСТ АХÆСС ДУНЕЙЫЛ

Здæхынц сæ цæрæн бынæттæм

Сирийы фæрсты фидыдады фæдыл уæрæсейаг центр куыд хъусын кæны, уымæ гæсгæ Скæсæйнаг Гутамæ здæхын райдыдтой цæрджытæ. Горæт Думайы уынгтЫ сыгъдæг кæнынц минæтæй. Иу суткæйы дæргъы гуманитарон къæлидорыл рацыдысты иу минæй фылдæр экстермисты сæ бинонты уæнгтимæ. Уыдон сæ хæцæнгæрзтæ радтой уæрæсейаг æфсæддонтæм. Бынæттон цæрджытæн æндидзын кæнынц сæ хæдзæрттæ. Уæрæсе сын кæны гуманитарон æххуыс арæзтадон æрмæджытæ, электрокабелтæ, донуадзæн хæтæлтæй æмæ æндæртæй. Горæт Думайы гом кæнынц магазинтæ. Скæсæйнаг Гутайы æндидзын кæнынц электроифтонгад.

Хъæуы политикон баныхæстæ сæндидзын кæнын

РСирийы фæдыл  Брюсселы дунеон донорон конференцийы хайадисджытæ  бафидар кодтой, зæгъгæ, конфликтæн нæй хæстон æгъдауæй аскъуыддзаг кæнын. Уый тыххæй фехъусын кодта Евроцдисы дипломатийы сæргълæууæг Федерика Могерини. «Мах сбæрæг кодтам иумиаг позици иуæй-иу фарстыты фæдыл, зæгъæм, конфликтæн нæй гæнæн хæстон æгъдауæй аскъуыддзаг кæнынæн, æнæмæнгхъæуæг у политикон баныхæстæ сæндидзын кæнын», – загъта уый. ИНО-йы генералон секретары сæрмагонд æрвыст лæг Стаффан де Мистура фехъусын кодта, зæгъгæ, дунеон донорон конференцийы конфронтаци куыд нæ уыд, афтæ дзы нæ уыд политикон æнтыст  дæр.

Æдасдзинады конференци

Сочийы уагъдцæуæг æдасдзинады фæдыл конференцийы хайадисджытæ сты конфликттæ тыхон æгъдауæй скъуыддаг кæныны ныхмæ. Кризистæ бæстонгонд хъуамæ цæуой дунеон нормæтæ æмæ приницптæм  гæсгæ, – уый тыххæй журналисттæн фехъусын кодта Уæрæсейы Æдасдзинады советы секретарь Николай Патрушев. Конференцийы хайад райстой 118 бæстæйы минæвæрттæ. Мадзалы хайадисджытæ æруынаффæ кодтой террористон организациты ныхмæ архайдтыты, дунеон информацион æдасдзинады фарстытыл, афтæ ма наркотиктæ аразын æмæ сæ æнæлегалон æгъдауæй зилын кæныны тыххæй дæр.

Ныхас кодтой телефоны

УФ-йы Президент Владимир Путин телефоны ныхас кодта Сомихстоны президент Армен Саркисянимæ. Дыууæ президенты банысан кодтой, зæгъгæ, бæстæйы мидæггагон кризисы сæрты тагъддæр ахизыны тыххæй æппæт политикон тыхтæн ахсджиаг у хиуылхæцындзинад æмæ бæрндзинад, уæвæг проблмæтæ  констиуцион фæлгæтты конструктивон диалогы руаджы аскъуыддзаг кæнынмæ цæттæдзинад. Путин ма телефоны ныхас кодта Сомихстоны премьер-министры хæстæ рæстæгмæ æххæстгæнæг Карен Карапетянимæ. Ныхасы рæстæджы банысанчындæуыд, зæгъгæ, бæстæйы кризисон уавæр хъуамæ скъуыддзаг æрцуæа бæстæйы архайæг конституцийы фæлгæтты æмæ легитимон парламентон æвзæрстыты фæстиуджыты бындурыл.

Батыдтой резиденцимæ

Америкæйы хицауады минæвæрттæ батыдтой Сиэтлейы УФ-йы генералон консулады æхгæд резиденцимæ. Уыдон асастой бахизæны дуары гуыдыр æмæ бацыдысты бæстыхаймæ. «Америкæйаг фарс фæлвары æппæт дунеон дипломатон æмæ консулон конвенцитæ, афтæ ма хисæрмагонд закъондæттынад дæр фехалгæйæ, нæ территоримæ бахизын», – фехъусын кодта АИШ-ы УФ-йы минæварады консулон хайы сæргълæууæг Николай Пукалов, кæцы ныртæккæ ис Сиэтлейы. АИШ-ы хицауад Сиэтлейы УФ-йы консулад сæхгæдтой Уæрæсе америкæйаг дипломатты нымæц кæй фæкъаддæр кодта, уымæн дзуаппæн. Уый размæ Вашингтон рарвыста 60 уæрæсейаг дипломаты.

Дыууæ Кореяйы саммит

Дунеон политикæйы сæйраг цау у дыууæ Кореяйы саммит дыууæ паддзахады лидерты хайадистæй. Саммитмæ сæ хъус дардтой 40 бæстæйæ æртæ мин журналисты. Баныхæстæ уагъд цыдысты арæнгæрон зонæйы æмæ райдыдтой Кореяйы Адæмон Республикæйы сæрдар æмæ Хуссар Кореяйы президенты историон фембæлдæй. Мун Чже Ин йæ уазæгæн æгасцу загъта демаркацион хаххыл æмæ арæны сæрты кæрæдзийы къухтæ райсыны фæстæ Ким Чен Ын ахызт барьеры сæрты æмæ афтæмæй  ссис цæгаткореяг фыццаг лидер, кæцы уый сарæзта 65 азы мидæг бæстæты ‘хсæн конфликт райдианæй фæстæмæ. Хаххы фæстæ фестад Хуссар Кореяйы лидер дæр. Дыууæ лидеры кæрæдзийы къухтыл ныхæцгæйæ, ацыдысты сырх гауызыл бадзырдтæ уадзæн комплекс «Дом мира»-мæ. Хуссар Кореяйы президенты пресс-службæйы бæрæггæнæнтæм гæсгæ уынаффæ кодтой кæрæдзимæ визитты, дыууæ бæстæйы æфсæнвæндæгты баиу кæныныл æмæ æндæр фарстытыл. Фембæлды уыд Ким Чен Ыны хо, кæцы фæндон бахаста дыууæ Кореяйы тагъддæр баиу кæныны тыххæй. Саммит фæцис декларацийыл къухтæ æрфыссынæй.

Брифинг

Гаагайы уагъд æрцыд брифинг Сирийы «химион атакæйы» æвдисæнты хайадистæй. Химион хæцæнгарз ма уадзыны фæдыл оргаизацимæ Уæрæсе æрбакодта 17 æвдисæны, кæцытæн сæ бон у бафидар кæнын Думайы «химион атакæ» кæй уыд æрхъуыдыгонд сценари. Гаагамæ æрцыдысты цауты бынаты чи уыд, уыцы медицинон кусджытæ дæр, æдæппæтæй 17 сирийаджы, уыдонæй æртæ сты сывæллæттæ. Брифингмæ не ‘рбацыдысты НАТО æмæ Евроцæдисы бæстæты минæвæрттæ. Æрæмысгæ цаутæн æвдисæн чи систы, уыдон радзырдтой уыцы боны хабæртты тыххæй. Чысыл лæппу Хасан Диабайы фыд куыд радзырдта, уымæ гæсгæ йæ фырт æмæ йæ бинонты иннæ уæнгтæ сты сæрæгас æмæ æнæниз æмæ ницахæм химион атакæ нæ федтой.

Фæмард сты 13 æфсæддоны

Афганистаны Кундузы провиницийы æфсæддон блокпосты æхсæвы сатакæ кодтой радикалон змæлд «Талибан»-ы боевиктæ. Атакæйы фæстиуæгæн фæмард сты 13 æфсæддоны, фараст адæймаджы та фæцæфтæ сты. Фæстаг суткæйы Афганистаны æфсæддон-уæлдæфон тыхтæ бæстæйы 12 провинцийы ауагътой антитеррористон операцитæ 121 боевикы скуынгæг  æмæ 87 боевикы фæцæф кæнгæйæ. Мæрдты ‘хсæн уыдысты радикалон змæлд «Талибан»-ы 40 уæнджы.

Фæндагон транспортон цау

Индийы Уттар-Прадешы провиницийы поезд скъуырдта скъолайон автобусы, кæцыйы фæстиуæгæн фæмард сты 13 сывæллоны. Ноджы аст сывæллоны та райстой алыгъуызон травмæтæ, уыдонæй авд сты критикон уавæры. Сывæллттæн сæ фылдæры цыд 10 азæй къаддæр.

Информацион агентадты хъусынгæнинæгтæм гæсгæ