ДÆ ЦÆСТ АХÆСС ДУНЕЙЛ

Германы домæн

Дзыллон информацийы фæрæзтæ куыд хъусын кæнынц, уымæ гæсгæ Германы хицауад æввахс рæстæджы бахатдзæн АИШ-ы президент Дональд Трампмæ, цæмæй немыцаг бизнесы  ссæрибар кæной ног антиуæрæсейаг санкциты хайадистæй.  Немыцаг компаниты  антиуæрæсейаг карз санкциты архайдæй ссæрибар кæныны тыххæй АИШ-мæ хъуамæ бахата Германы финансты министр Олаф Шольц Вашингтонмæ йæ визиты рæстæджы. Ацы фарсты фæдыл АИШ-ы президентимæ ныхас кæндзæн Германы канцлер Ангела Меркель дæр, кæцы хъуамæ фембæла Трампимæ апрелы кæрон.

Уынаффæ кодтой Сирийы деэскалацийы фæдыл

Австрийы канцлер Себастьян Курц фехъусын кодта, зæгъгæ, Уæрæсейы Президент Владимир Путинимæ æруынаффæ кодта Сирийы уавæры деэскалацийы фæдыл гæнæнуæвæг къахдзæфтыл. «Уæрæсейæн ис ахсджиаг нысаниуæг Сирийы уавæр æрбæстон кæныны. Уымæ гæсгæ Уæрæсе хъуамæ архайа  конфликты сабырадон æгъдауæй аскъуыддзаг кæныны тыххæй операцийы», – хъусын кæны уый. «Сирийы тыххæй æз ныхас кодтон Президент Путинимæ, фыццаджыдæр конфликт дипломатонæй аскъуыддзаг кæныны тыххæй». Курц уæрæсейаг лидерæн фехъусын кодта, зæгъгæ, Вена цæттæ у Сирийы фæдыл ба-дзырдон фæзуат суæвыны тыххæй.

Уæрæсе иунæг нæ уыд

Скрипалты хъуыддаджы фæдыл Химион хæцæнгарз ма уадзыны фæдыл организацийы æххæстгæнæн советы рабадты уæрæсейаг делегаци иунæг нæ уыд. Хъуыстысты раст ныхæстæ, сæрмагондæй Пакистан, Инди, Бразили æмæ Хуссар Африкæйаг Республикæйы минæвæрттæй. Уыдон домдтой æцæгдзинад сбæрæг кæныны тыххæй æппæтфарсон фæдагуырд ауадзын, цæмæй сбæрæг уа Солсберы цы æрцыд, уый.

Цæуынц горæт Думейрæй

Сирийаг боевиктæ æнæ хæцæнгарзæй цæуын райдыдтой горæт Думейрæй. Уыдон сразы сты сæ хæцæнгæрзтæ æрæвæрыныл. Сирийаг дзыллон информацийы фæрæзты зонæнæтæм гæсгæ Думейрæй иу боны мидæг ацыдысты фондз мин адæймаджы бæрц.

Фехъусын кодта  æвзæрстыты тыххæй

Туркы президент Эрдоган фехъусын кодта æмгъуыдæй раздæр президентон æмæ парламентон æвзæрстытæ ауадзыны тыххæй. Уый фæстиуæгæн сæрды туркаг æмбæстæгтæ сæхицæн æвзардзысты ног президент æмæ парламент. Фæлæ Эрдоган йæхæдæг хайад райсдзæн президентон æвзæрстыты, уый тыххæй ницы загъта. Бæстæйы Конституцимæ гæсгæ йын бар ис æвзæрстыты хайад райсынæн.

Ног лидер

Куба равзæрста паддзахады ног сæргълæууæджы. Бæстæйы Паддзахадон советы Сæрдар ссис Мигель Диас-Канель. Уый ацы бынаты раивта Рауль Кастройы. Сусæг хъæлæсæппæрсты фæстиуджыты тыххæй официалон æгъдауæй фехъусын кодтой Кубæйы национ æмбырды. Диас-Канелы кандидатурæ хорзыл банымадтой æмбырды 604 депутатæй  603 депутаты. Диас-Канель куыд фехъусын кодта, уымæ гæсгæ Рауль Кастро дарддæр дæр архайдзæн паддзахадон хъуыд-дæгты æмæ ахсджиаг уынаффæтæ исдзæн бæстæйæн. Уый баззайдзæн КПК ЦК-йы фыццаг секретары бынаты. Афтæ ма ног лидер фехъусын кодта, зæгъгæ, Кубæйы  капитализм æндидзыд не ‘рцæудзæн æмæ иудзинадмæ æрсидт бæстæйы æмбæстæгтæм.

Арфæйы тел

УФ-йы Президент Владимир Путин раарфæ кодта Кубæйы ног лидер Мигель Диас-Канелæн республикæйы паддзахадон советы сæргълæууæгæй йæ кæй равзæрстой, уый тыххæй. Путин банысан кодта, зæгъгæ, йæ ныфс ис  ног лидеримæ Кубæ дарддæр дæр кæй тырндзæн Кубæйаг революцийы расидгæ нысæнттæм, æмæ, зæгъ, кæй рахиздзæн социалон-экономикон рæзты ног этапмæ. Арфæйы телы ма дзырдæуы, зæгъгæ, Уæрæсе дарддæр дæр цæттæ у æппæт фадгуыты Кубæимæ æнгом æмæ конструктивон æмгуыстадмæ.

Хъæуы йæ объективонæй раиртасын

Китайы Адæмон Республикæйы Сæрдар Си Цзиньпин телефоны Стырбританийы премьер-министр Тереза Мэйимæ ныхас кæнгæйæ ралæууыд Сирийы химион хæцæнгарзæй спайда кæныны цау объективонæй раиртасыны æнæмæнгхъæуындзинады æвварс. Æрсидт сирийаг кризисы политикон æгъдауæй аскъуыддзаг кæнынмæ. «Китай æвзæрыл нымайы тыхæй спайда кæнын æмæ у паддзахады суверенитет æмæ территориалон æнæхъæндзинады æвварс. Китай лæмбынæг йæ хъус дары Сирийы уавæрмæ», – загъта уый. Уый ма банысан кодта, зæгъгæ, ныртæккæ хъæуы куыд гæнæн ис, афтæ ацы фарсты фæдыл дунеон æндыгъддзинад фæныллæгдæр кæнын æмæ алцыдæр саразын уæлдай серьезондæр ныхмæлæудтытæ ма æруадзыны тыххæй.

Бартхъирæн  кодта Туркмæ

АИШ-ы паддзахадон департамент бартхъирæн кодта Туркмæ санкцитæ  йæ ныхмæ бакæнынæй кæд æмæ бæстæ Уæрæсейæ балхæна ногдæр фæлтæры зенитон-ракетон комплекстæ С-400, уæд. 2017 азы Анкара æмæ Мæскуы сарæзтой сразыдзинад Туркы уæрæсейаг зенитон-ракетон системæтæ С-400 «Триумф»-ы цыппар дивизионæй сифтонг кæныны тыххæй, кæцыты аргъ у 2,5 миллиард доллары.

Фембæлдзæн йæ коллегæимæ

АИШ-ы президент Дональд Трамп фæнд кæны æввахсдæр къуыриты Цæгат Кореяйы лидер Ким Чен Ынимæ фембæлын, – уый тыххæй фехъусын кодта Японы премьер-министр Синдзо Абэимæ иумиаг пресс-конференцийы рæстæджы. Уыимæ ма уый йæ ныхасмæ бафтыдта, зæгъгæ, фембæлды ахсджиагдзинадмæ нæ кæсгæйæ, гæнæн ис æмæ уагъд ма æрцæуа, кæд æмæ  фембæлд æнтыстджынæй кæй ацæудзæн, уымæй АИШ-ы ныфс нæ уа, уæд.

Нефты баррелы аргъ ахызт 74 долларæй

Лондоны биржæйы базæртты рæстæджы  Brent-ы маркæйы нефты баррель ахызт 74 долларæй. Нефть афтæ зынаргъ фæстаг хатт уыд 2014 азы ноябры мæйы. Куыд хъусынчындæуы, уымæ гæсгæ нефты аргъ схызт АИШ-ы нефты фæсауæрцтæ кæй фæкъаддæр сты æмæ Саудоваг Арави та нефты ифтонгад кæй фæкъаддæр кодта, уымæ гæсгæ. Фæлæ афтæ дæргъвæтин рæстæджы нæ уыдзæн, инвестортæ архайдзысты аргъ фæкъаддæр кæныныл.

Коллегæты фембæлд

Мæскуы æмæ НАТО-йы ‘хсæн ахастытæ серьезонæй куы фæкарздæр сты, уымæй дæргъвтин рæстæджы фæстæ Уæрæсейы æфсæддон къухдариуæгад æмæ Цæгататлантикон альянс фæлварынц цахæмдæр контакттæ сæндидзын кæныныл. Бакуйы фембæлдысты Уæрæсейы Генштабы хистæр Валерий Герасимов æмæ Европæйы  НАТО-йы  баиугонд гарзджын тыхты сæйраг командæгæнæг Кертис Скапаротти. Уыдон æруынаффæ кодтой æфсæддон доктринæ æмæ ахуыртимæ баст фарстытыл, Афтæ ма бадзырдтой фидæны æфсæддон контакттæ адарддæр кæныны тыххæй.

Информацион агентадты хъусынгæнинæгтæм гæсгæ