Кæд скусдзæн нымæцон телеуынынады дыккаг мультиплекс
Майы мæйы цы тæрккъæвдатæ уарыд, уыдон бахъыгдардтой нымæцон телеуынынады куыст. Арвы цæфы фæстæ «Паук»-ы бæрзæндыл телемæсыг лæвæрдта лæмæгъ сигнал. Ретранслятор аразынмæ аластой УФ-мæ. Уый адыл нæм цы 20 уæрæсейаг телеканал куыстой, уыдонæй сигнал нал цыд.
Иу къуырийы размæ Бастдзинад æмæ дзыллон коммуникациты комитет дзыллон информацийы фæрæзты фæрцы фехъусын кодта, боныфæстагмæ, хæлд ретранслятор кæй сырæзт æмæ йæ дыууæ боны æмгъуыдмæ фæстæмæ кæй смонтаж кæндзысты. Ныр, дам, телесигнал уыдзæн фондз хатты фылдæр æмæ тыхджындæр. Цалдæр боны рацыд – эфирон сигнал нæ фæхуыздæр. Ныр та рабæрæг, ифтонгады кæй разынд ноджы æндæр хъæн. Уыцы хай дæр арвыстой цалцæг кæнынмæ æмæ та йæм хъæуы æнхъæлмæ кæсын.
Куыд зонæм, афтæмæй нымæцон телеуынынадмæ нæ республикæ ахызт 2019 азы. Сарæзтой йæ РХИ-йы социалон-экономикон рæзтæн ахъазгæнæг Инвестицион программæйы фæлгæтты. Арæзтой йæ дыууæ этапæй. Фыццаг этапы, ома, 2018 азы теле-уынынады хызæгæн фондз объекты – Цхинвалы районы, Ленингоры райцентры, Цъинагары хъæуы æмæ Дзауы районы, Гуфтайы хъæуы æмæ Знауыры районы Малдайы хъæуы. Дыккаг этап та ахæм æнгæс объекттæ æмæ базæйон станцтæ сарæзтой горæт Къуайса, Знауыр æмæ Дзауы районты. Уый фæстæ «Паук»-ы бæрзæнды хызæгтæ монтаж æрцыдысты 70 метры бæрзæндæн антеннæмæ. Республикæйы цæрджытæн сæ бон уыд 22 нымæцон телеканалмæ кæсын. Уыцы нымæцы – ГТРК «Ир» æмæ «Осетия-Ирыстон»
Бастдзинады комитет уырнын кодта нымæцон сигнал æнцонвадат кæй у, хæццæ кæндзæн дæрддзæф хъæутæм æмæ бынаты сигнал кæй нал сæфдзæн. Нымæцон телеуынынад саразыны фарс уыд уæды президент Бибылты Анатоли дæр. Фæлæ нымæцон телесигналы æмрæнхъ хъуамæ куыстаид аналогон сигнал дæр. Уымæн æмæ нымæцон сигнал сæ бон райсын уыд, æрмæстдæр, фæстаг цалдæр азы ног телевизортæ чи балхæдта, уыдонæн. Ног рауагъд æрвгъуыз экрантæн сæ мидæг ис, нымæцон сигнал чи ахсы, ахæм адаптертæ. Фæлæ зæронд телевизорты хицæуттæн дæр сæ бон уыд сæрмагонд декодер балхæнын, кæцыйы ис цифрæйон сигнал. Æцæг, уыцы антеннæтæ дæрддзæф хъæуты цæрджытæй алкæмæн не сбæззыдысты. Ног телевизортæ кæмæн уыд, уыдон кастысты бынæттон каналтæм, зæронд телевизорты хицæуттæ та æмыр экрантæм. Иугæр ацы проект национыл нымад уыд, уæд паддзахад хъуамæ æвæгæсæг адæмы сифтонг кодтаид ног телевизортæй. Кæннод та ныууадзын хъуыд нымæцоны æмрæнхъ аналогон сигнал дæр.
Бастдзинады комитет ма ныфс æвæрдта, спутникон операторæй пайдагæнджытæй уæлдай, дам, нымæцон эфирон телеуынынад уыдзæн сыгъдæгдæр. Фæлæ та уый дæр сайд разынд. Спутникон операторæн йæ сигнал у сыгъдæгдæр. Ног телевизорты та DVB-72 мультиплекстæ кæй ис, уымæ гæсгæ сæ хуызтæ сты ирддæр.
Нæ уацх.
