«Мегафон-Хуссар Ирыстон» рахызт ног тарифон плантæм

Хуссар Ирыстоны иунæг сотон оператор компани «Мегафон  Хуссар Ирыстон» рахызт ног тарифты плантæм. Уый тыххæй журналисттæн радзырдтой компанийы генералон директор Роман Коврига æмæ йæ коммерцион директор Санахъоты Ларисæ.

Уыдон лæмбынæг æрдзырдтой,  ног тарифтæ цы сты æмæ абоненттæн цæмæй уыдзысты хуыздæр, уыдæтты тыххæй. Тарифон планты ног хахх  «S», «М», «L», «XL» æмæ «XXL»-мæ компани рахызт июны æмбисы.

Уый размæйы тарифтæ та нымад æрцыдысты  «архивон»-тыл. Ног тарифтæ баиу кæныны аргъ у 350 сомæй 2500 соммæ. Уымæй дарддæр ма «абоненты куы фæнда йæ зæронд тарифон плантыл баззайын, уæд æй ницы хъыгдары, гæнæн ис,  зæронд тарифтæй дæр пайда кæна, цалынмæ ног тарифтæм нæ рахиза, уæдмæ. Фæлæ абон уа æви  сом, уæддæр уыцы тарифтæ нал бæздзысты æмæ сæ мах дæр нал пайда кæндзыстæм», – банысан кодта Коврига.

Ног абонентты та иу кæндзысты ног тарифтæм. Иу мæй æмæ æрдæгы рæстæджы дæргъы ног тарифтæм баиу сты 2000 абонентæй фылдæр. Уыцы нымæц бонæй-бон фылдæр кæны.

Уымæй дæр, Мегафоны кусджытæ куыд зæгъынц, афтæмæй ног пакетты мидис уый мидæг ис, æмæ абоненттæн æнцондæр у  иууон пакет балхæнын, уымæ хауынц телефонæй дзурын æмæ интернет, кæцыйы аргъ уыдзæн, уыцы опцитæ хицæнтæй куы æлхæна, уымæй бирæ асламдæр. Кæд нырмæ алы опци дæр æлхæдтой хицæнæй, уæд ныр та æппæт лæггæдтæ дæр иугонд цæудзысты иу тарифон планы, абонентæн йæхи кæцымæ фæнды, уымæ йæ иу кæндзысты. Уымæй дæр компани бахынцыдта, мобилон бастдзинад æмæ интернетæй минималонæй чи пайда кæны, уыдоны интерестæ дæр æмæ иууыл активонты интерестæ дæр.

Генералон директор куыд загъта, афтæмæй Мегафоны ног тарифон плантæй бæрæг фæхуыздæр уыдзысты абоненттæн лæггæдтæ.

«Ныры онг хицæнæй уæвынад кодтой бæрæггæнæнтæ адæттыны фæдыл опцитæ, дзурыны лæггæдтæ, SMS лæггæдтæ.  Ныр, абоненттæн æххæст пакет ратгæйæ, мах фæхуымæтæгдæр кодтам уавæр, цæмæй æмбарой, æхца цæй  тыххæй  фидынц,  уый», – загъта  Мегафоны  генералон директор. 

Уый  ма радзырдта компанийы ног лæггад «Интернет алы хæдзары дæр»-ы тыххæй. Уый хорз ахъаз фæуыдзæн, кабелон интернет цы хæдзæртты нæй, уыдонæн, афтæ ма районтæ æмæ хъæуты цæрджытæн дæр.

«Мах абоненттæн активонæй хъарын райдыдтам æнæ телæй интернет. Сæрмагонд хæдзармæ йæ æрбауадзæггаг у 4500 сомы аргъ, баиугæнæггаг та 1000 сомы», – бамбарын кодта Коврига.

Уый ма радзырдта,  роумингы интернеты уæвыны сæраппонд «Мегафон»-ы уникалон лæггады тыххæй дæр.

«Роумингы абонентты бæрæггæнæнтæ адæттыны тыххæй цы æргътæ æвæрæм, уыдон сты æнæ прецедентон, интернеты 1 мгб пакеты аргъ у 1 сом, æнæ пакетæй та  1 сом æмæ 75 капеччы», – загъта гендиректор.

Уый радзырдта ног бонусон программæйы тыххæй дæр.

Йæ ныхæстæм гæсгæ, ног бонусон программæ фæнд кæнынц ацы фæззæг ауадзын.

«Бонустæ лæвæрд цæудзысты, йæхи тарифон плантыл рагæй чи ис, уыцы абоненттæн. Програм-мæйæ пайда кæндзысты ног тарифон плантæм иугонд чи у, уыцы абоненттæ», – бамбарын кодта Коврига. Афтæ ма дыууæ иууыл гуырахстджындæр пакеты «XL», «XXL»  руаджы æнæ лимитæй пайдагæнæн уыдзæн иууыл популярондæр мессенджертæй æмæ ви-деохостингтæй. Ковригайы ныхæстæм гæсгæ, иннæ тарифон плантæй æнæ лимитæн хъæудзæн уæлæмхас фидын, уыимæ иумæ сын цæмæй сæ пайда æмæ æнцонвадатдзинад базонай, цæмæй уыцы хицæндзинад банкъарай, уый тыххæй йæ хъæуы бафæлварын.

 «Мах активонæй кусæм нæ клиенттимæ бастдзинадыл дæр. Уый тыххæй нын Instagram-ы хызæджы ис нæхи фарс. Нæ клиенттæй исты фарст кæмæ сæвзæра, уымæн йæ бон у уыцы фарсы банысан кæной сæ фарстатæ. Уый бæрæгбæрцæй фæтагъддæр кæндзæн нæ абонентты проблемæтæ сбæрæг кæныны æмæ сын сæ домæнтыл бакусыны процесс», – банысан кодта компанийы коммерцион директор Санахъоты Ларисæ. Йæ ныхæстæм гæсгæ, ног тарифон планты анализы руаджы рабæрæг уыдзысты абонентты домæнтæ æмæ ивындзинæдты æнæмæнгхъæуындзинад.

«Уый тыххæй хъуамæ рацæуа æппынкъаддæр æртæ мæйы бæрц. Мах цæттæ стæм диалогмæ, цæттæ стæм нæ клиентты фæндæттæм æмæ домæнтæм æркæсынмæ», – загъта коммерцион директор.

Роман Коврига ма радзырдта абонентты хыгъдтæй æхца фесæфты цауты тыххæй дæр.

«Иу рæстæджы-иу абонентты хыгъдтæй сфыстой æхцайы фæрæзтæ, уый баст уыд системæйы къуылымпыдзинæдтимæ, фæлæ æхцаты фæстæмæ раздæхтам нæ клиенттæн. Уыд ахæм цаутæ дæр, æмæ нæ компанийы æдзæсгом кусджытæ махинацитæ куы арæзтой, фæлæ сæ мах сбæрæг кодтам æмæ сæ сæ бынæттæй ссæрибар кодтам», – банысан кодта Роман Коврига.

Ногæй баконд тарифон планты оптималондæр æмæ пайдайаг лæггæдты уавæртæ бахынцгæйæ, зæронд тарифон планты æрцыд ивындзинæдтæ. Сæйраг уый у, æмæ хызæджы мидæг телефонæй фæдзурын æмæ СМС-ты æргътæ баззадысты æнæ ивгæйæ. Ног тарифон плантæм гæсгæ «Универсальный» æмæ «Универсальный VIP»-ы æргътæ баст сты, кæдæм дзурай, уыимæ:

ПАО «Мегафон»-ы Кавказы филиалы абоненттæм фæдзурыны аргъ у 3 сомы, ПАО «Мегафон»-ы Кавказы  филиалы  æмæ  Уæ-рæсейы Федерацийы ПАО «Мегафон»-ы абоненттæм SMS-ы аргъ та – 3 сомы;

æхсæнадæмон SMS-ы аргъ, Хæдбар паддзахадты æмхæла-рады оператортæ дæр сæм бафтаугæйæ, у 9,9 сомы;

тарифон плантæ «Южный», «Универсальный», «Универсальный VIP»-ы тарифон планæй Уæрæсейы Федерацийы «Мегафон»-ы абоненттæм фæдзурыны аргъ – 3 сомы;

тарифон план «Отличный», «Южный», «Универсальный», «Универсальный VIP»-ы абоненттæм дзурыны аргъ – 2 сомы.

Абонент сим-карта куы балхæны, уæд йæ бон у, баиу æй кæна æрмæстдæр ног пакетон тарифты плантæм. Ног тарифтæ сты пакетон. Уыдоны ис бæрæг лæггæдты æмбырдгондтæ: интернет, телефонæй фæдзурын æмæ а.д. Тарифтæ сты абонентты сæйраг хайæн – цифрæйон клиенттæн. Бæлвырддæрæй та смартфонтæн, мобилон интернеты активон архайджытæн, кæцтæ дзурынц мессенджерты, социалон хызæгты, кæцытæ фылдæр пайда кæнынц, традицион «гæххæтты»-ы бæсты онлайн-лæггæдтæй.

Пакетон хахх «S» иннæтимæ абаргæйæ, у стартон æмæ иууыл æнцонвадатдæр тарифон план, уым ис интернеты 0,5 Гб æмæ 150 минуты та хызæджы мидæг ныхас кæнын. Йæ аргъ у 360 сомы.

Ацы тарифон план у, функциты минималон æмбырдгондæй цы абоненттæ пайда кæнынц, уыдонæн. «Мегафон – Хуссар Ирыстон» тырны йæ абонентты рæзгæ домæнтæ хынцынмæ æмæ гом кæны ног фадæттæ.

Ног пакетон линейкæ «S», «L», «M», «XL», «XXL» -ы мидис уый мидæг ис, æмæ кæцыфæнды абонентæн дæр æнцондæр балхæ-нæн у иууон пакет, кæцыйы сты телефонæй ныхас кæнын æмæ интернет, йæ аргъ та у, уыцы опцитæ иунæджытæй куы æлхæна, уымæй бæрæг асламдæр.

Осиаты Индирæ