Октябры фыццаг бонтæй нæ республикæйы амалиуæггæнджытæ Уæрæсейæ продукттæ ласгæйæ, æмбæлынц зындзинæдтыл Зæрæмæджы таможнæйы.
Цы у сæ проблемæйы аххосаг æмæ сæ цы домдæуы, уый тыххæй мах бацымыдис кодтам æмæ райстам бæлвырддæр зонæнтæ. Куыд рабæрæг, афтæмæй 1-æм октябрæй фæстæмæ Уæрæсейæ ласæггаг товарты фиддонты процент фæфылдæр. Зæгъæм, раздæр кæд иу уæзласæн машинæйæн 10 мин сомы бафидын хъуыд, уæд ныр та схызт 25-30 мин сомы онг. Амалиуæггæнджытæй иуæй-иутæ, уæлдайдæр та æхсыры продукт чи ласы, уыдоны хъуыдымæ гæсгæ, нæ республикæйы уыдзæн æхсыры продуктты дефицит, уымæн æмæ фæстаг бонты ног таможнæйон уагæвæрдтæ цалынмæ æххæст цæуой, уæдмæ æхсыры продукттæн æрласæн нæ уыдзæн, сæ пайда кæныны æмгъуыд та у цъус æмæ тагъд сæвзæр уыдзысты. Таможнæйы ног уагæвæрдты фæстиуæгæн зындзинæдтæ æвзарынц, бирæ азты амалиуæгадон куыст чи кæны, уыдон дæр. Уымæн æмæ ныртæккæ ласæггæгты фиддонты аргъ схызт 7-12 проценты бæрц æмæ сын хъæуы онг документаци аразын. Уыдонæн та хъæуы рæстæг æмæ бирæ финансон хæрдзтæ.
Ацы хъуыддаг къаддæрбæрцæй нæ бандавдзæнис арæзтадон æрмæджытæй республикæйы чи ифтонг кæны, уыдоныл дæр. Арæзтадон æрмæджытæ дæр хаст сты фиддонты процент кæмæн фæфылдæр ис, уыцы номхыгъдмæ.
Ныридæгæн нæ республикæйы æмбæстæгтæ равдыстой сæ тыхстдзинад æмæ загътой: «Таможнæйы фиддонты фæзынаргъ, фыццаджыдæр, бандавдзæнис хуымæтæг адæмыл. Амалиуæггæнджытæ сæ проценты бæрц бафтаудзысты сæ продукцийы аргъыл, махæн та æнæмæнгхъæуæг продукттæн æнæлхæнгæ нæй, æмæ сæ æлхæндзыстæм цыфæнды зынаргъæй дæр. Уый тыххæй æхсæнады æвзæры æнæразыдзинады хъуыды».
Ацы проблемæ куыд аскъуыддзаг уыдзæн, уый тыххæй официалон хъусынгæнинаг нæма сарæзта Хицауад, кæд æмæ сæм бахатыдыстæм, уæддæр. Мах дарддæр дæр нæ хъус дардзыстæм проблемæмæ æмæ, гæнæнуæвгæйæ, бæлвырддæр информациимæ зонгæ кæндзыстæм нæ газеткæсджыты.
УАЗÆГТЫ Марфæ
