Фæстаг азты нæ республикæйы астæуккаг ахуырадон уагдæтты рауæрæхдæр алыгъуызон аивадон кружокты куыст. Уыцы нымæцы гимнази «Альбион»-ы дæр. Æрæджы кружокты аивадон къухдариуæггæнæг Дзабиты Екатеринæ дзуаппытæ радта нæ уацхæссæджы фарстытæн.
– Уæрæсейы телеуынынады сывæллæтты алыгъуызон ралæвæрдтæм кæсгæйæ бирæ чидæртæ батæхуды кæнынц уыдоны зонындзинæдтæ, ныфсхастдзинад æмæ арæхстдзинæдтæм. Ахæм æнтыст алыгъуызон мадзæлтты равдисынц, кæмæн разамынд кæнут гимназийы, уыцы кафт æмæ зарды кружокты уæнгтæ. Зæгъут-ма, æнтыст уæ къухты цы амæлттæй æфты?
– Банысан хъæуы уый, æмæ алы сывæллонмæ дæр ис дзæвгар æвзыгъддзинæдтæ, фæлæ алкæмæн нæ вæййынц æнцон рахатæн. Сывæллæттæ кæмдæриддæр иугъуызон сты, семæ цас фылдæр кусай, цас сын фылдæр амонай æмæ сæ хорздзинæдтыл цайдагъ кæнай, уыйбæрц уыдзысты размæцыддæр. Æз уарзын сывæллæтты, семæ кусын, мæ дæсныйад æмæ нын цы æнтыст ис, уый сæйраджыдæр у, уый фæрцы.
– Не скъолаты сарæх сты аивадон æмæ сфæлдыстадон къордтæ. Цахæм нысаниуæг дæттыс ахæм ахастæн?
– Æз нымайын, æмæ ахæм ахастытæ æмæ архайдтытæ сты æнæмæнгхъæуæг. Сывæллон хорз æмæ пайдайы хъуыддагыл цайдагъ кæм цæуы, уым хистæр фæлтæр алы хатт дæр кæстæртæй вæййынц райгонд. Кафын æмæ зарын куыд аивад, афтæ ма сты фæтк æмæ æгъдауыл дзурæг дæр. Сывæллон цас фылдæр архайа хъомыладон архайдтыты, уыйбæрц уыдзæнис æгъдауджындæр. Æмæ æрмæст кафт æмæ зарды нæ, фæлæ ма хъуамæ хайад иса æндæр хъомыладон архайдтыты дæр. Уыцы нымæцы спорты дæр. Сывæллон йæ сæрибар рæстæгæй уынгты æнæхъуаджы, æнæхъусдардæй бирæ рæстæг ма хъуамæ хардз кæна.
– Ацы аз уæ кружокы уæнгтæ хорз арæхстдзинад равдыстой фæстаг дзæнгæрæджы рæстæджы. Залы цы бирæ адæм уыд, уыдонæй иуæй-иуты йедтæмæ æнæцæссыг ничи баззад. Уый та цæуыл дзурæг у?
– Залы уæвджытæ ахæм æнкъарæнтæ равдыстой сæйраджыдæр дыууæ миниуæджы тых-хæй. Фыццаг уый, æмæ иуæндæс азы, улæфт бонтæй дарддæр, æрвылбон дæр кæй цæстытæм кæсай, уый æнæбауарзгæ куыд хъуамæ фæуай. Ахуыргæнджытæ æмæ ахуыргæнинæгтæ кæрæдзийæн свæййынц иу бионтау адджын. Бинонтæй искæмæй фæхицæн уæвын та алы хатт дæр æрхæссы æнкъарддзинад. Ахæм рæстæджы та, хи бауромын, цæссыг ма рыппарын нæу хуымæтæджы хъуыддаг. Дыккаг миниуæг та уый у, æмæ залы уæвджытæй алкæй зæрдæмæ дæр арф бахъардтой сабиты хорз, арæхстджын æмæ уæндон архайдтытæ æмæ расайдтой цины цæссыгтæ.
– Зæгъ-ма, чи ма уын æххуыс кæны скъоладзауты афтæ хорз бацæттæ кæныны хъуыддаджы?
– Сæ хорз ахаст æмæ æххуысы тыххæй стыр бузныг зæгъын «Альбион»-ы директор Гуыцмæзты Иринæ, йæ хæдивæг Плиты Дзерассæ æмæ гимназийы хæдзарадон хъуыддæгты хайады сæргълæууæг Æрсойты Лавирæн. Стыр бузныг зæгъын ма мæ фæнды ахуыргæнинæгты ныййарджытæн. Уымæн æмæ сæ алчи дæр равдыста йæ цæтæдзинад мæнæн баххуыс кæныны хъуыддаджы.
– Уæ ахуыргæнинæгты арæхстдзинæдтæм кæсгæйæ мæм афтæ кæсы æмæ æнæхъæн аз æрмæстдæр уæхи цæттæ кодтат зард æмæ кафтæй. Æнтыст цы рæстæгмæ бафтыд уæ къухты?
– Нæхи цъус рæстæг нæ фæцæттæ кæнæм, фæлæ ахуырады программæ дæр нæ бахъыгдардтам. Фылдæр архайдтам урокты фæстæ. Пайда кодтам улæфты бонтæй дæр.
– Фæдис ма кодтон сценæйыл чи архайдта уыдон æмæ сымах æмбарындзинадыл дæр. Уæ алы ацамынд дæр уын уыдтой æмæ йæ æххæст кодтой уадид. Ахæм æмбарындзинад та уе хсæн куыд сфидар?
– Уæлдæр æй банысан кодтон. Адæймаг йæ куыст æмæ сывæллæтты куы уарза, уæд уый зын хъуыддаг нæу. Уыцы æнкъарæндзинæдтæ кæимæ куыстон, уыдон се ‘ппæт дæр бамбæрстой æмæ нын уый фæахъаз.
– Радзур-ма дæхи тыххæй, аивады кæд акодтай фыццаг къахдзæфтæ?
– Фыццаг къахдзæфтæ сарæзтон, æртыккаг къласы ма куы ахуыр кодтон, уæд. Уыцы азты бацыдтæн Сывæллæтты сфæлдыстадон галуанмæ. Хайад истон зарджыты къорды. Фæстæдæр сдæн фольклорон ансамбль «Фарн»-ы уæнг. Уый фæстæ та паддзахадон ансамбль «Симд»-ы артист.
– Дæ бинонтæ æмæ ма де ‘ввахс адæмæй исчи хайад исы аивады къабазы?
– Мæ фыд Дзабиты Роланд паддзахадон ансамбль «Симд»-ы фæкуыста къорд азы. Ныртæккæ мæ æввахс хиуæттæй ацы ансамблы архайынц цыппарæй.
– Сценæйыл ахæм арæхстдзинад чи равдыста, уыцы ахуыргæнинæгтимæ дын цахæм бастдзинæдтæ уыдзæнис сæрдыгон улæфтыты рæстæджы?
– Ныридæгæн хайад райстам дыууæ ахсджиаг мадзалы. Уыцы нымæцы паддзахады разамонджытæ æмæ горæты цæрджытимæ уыдыстæм 13 коммунары уæлмæрды. Хайад райстам «Свеча памяти»-йы. Дарддæр дæр куы бахъæуæм, уæд нæ базивæг кæндзыстæм, сæххæст кæндзыстæм, цы нын бахæс кæной, уый.
ГÆЗЗАТЫ Иван
Comments are closed, but trackbacks and pingbacks are open.