Сæрмагонд æфсæддон операцийы хайад цы ирон хæстонтæ исынц, уыдонæн та радон хатт æрвыст æрцæудзæнис гуманитарон æххуыс.
«Ацы хатт фылдæр балхæндзыстæм медикаменттæ. Зымæджы бонты хæстон лæппутæ арæх фæрынчын вæййынц инфекцион низтæй. Махæн семæ ис бастдзинад æмæ уый сæхи хъуыды у. Нæ зæрды ис хъарм дзаумæттæ дæр балхæнын», – зæгъы Парламенты депутат Къуезерты Арсен.
Уый ма зæгъы, зæгъгæ, гуманитарон æххуыс цы фæрæзтæй æлхæд æрцæудзæн, уымæн йæ иу хай хыгъдмæ бахаста, Знауыры районы скъолайы ахуыргæнинаг: «Конкурсы цы æхца рамбылдта – 50 мин сомы, уыдон радта, сæрмагонд æфсæддон операцийы хайад чи исынц, уыцы ирон лæппутæн. Ацы хыгъдмæ ма сæ хайбавæрд бахастой скъола «Альбион»-ы ахуыргæнинæгтæ, «Адæмон парти»-йы уæнгтæ æмæ сæрмагондæй РХИ-йы Президент Гаглойты Алан. Хыгъдмæ æрвылмæй фæрæзтæ æрвитынц Парламенты депутаттæ дæр».
Уæлахизмæ хæссынц сæ бавæрæн
2-æм скъолайы бархионтæ та ногæй бийынц маскировкæгæнæн хызтæ сæрмагонд æфсæддон операцийы хайад чи исынц, уыцы хæстонтæн.
Ныртæккæ нæ лæппуты ахæм хызтæ зæрдиагæй хъæуынц. Хызæгтæ сын арвыстой уалдзæджы дæр, уыдон уыдысты кæрдæгъхуыз хъуымацæй. Ныр та фæззæджы хъуамæ сæ хуыз уа змисгъуыз. Æфсæддонтæ хызтæй бамбæрзынц сæ техникæ, блиндажтæ, тепловизортæ.
Маскировкæгæнæн хызгтæ канд 2-аг скъолайы нæ бийынц. Нæ горæты цæрæг Хъæцмæзты бинонтæ сæ кæрты сæвæрдтой сæрмагонд цæджындзтæ, балхæдтой камуфляжон хъуымац, ныллыгтæ йæ кодтой æмæ бийынц, афтæ тынг фронты цы маскировкæгæнæн хызтæ хъæуы, уыдон. «Фронтæн хызтæ кæй хъæуы, уый мын загъта мæ мад. Фыццаг хатт уый хызæгтæ бийын райдыдта 2-æм скъолайы спортзалы. Мах бирæ бинонтæ стæм – мад, фыд, дыууæ хойы æмæ æртæ æфсымæры. Фæнды мæ уæлахизмæ не ‘вæрæн бахæссын», – зæгъы Хъæцмæзты Маринæ.
Хъæцмæзты бинонтæм хызтæ бийынмæ фæкæсынц сæ сыхæгтæ дæр. Зæгъынц, зæгъгæ, зымæгмæ хæстæг та урс хъуымацæй бийдзысты маскировкæгæнæн хызтæ. Бинонтæ курынц нæ республикæйы цæрджытæй, цæмæй уыдон дæр æрбаиу уой ацы хæрзаудæн хъуыддагмæ. «Хызтæ цас фылдæр сбийæм, уыйбæрц хуыздæр уыдзæн. Амæйразмæ нæ сыхаг лæппутæй сæ иу Цхуырбаты Азæмæт – 4-æм Æфсæддон базæйы хæстон, радон улæфты æрцыд йæ бинонтæм. Мах ын йæ ацыдмæ сцæттæ кодтам дыууæ хызы. Уый сæ æхсызгонæй ахаста йемæ. Уырдыгæй нæм бузныджы ныхæстæ рарвыстой йе ‘мтохгæнæг лæппутæ. Хызтæ, дам, сты хæрзгъæд не скъуыйынц, æфсæддон хызтæй, дам, бирæ фидардæр сты. Стæй, зæгъ, сæ Ирыстоны сæрмагондæй махæн кæй сбыдтой, уый та, дам, нын дæтты тыхтæ. Уымæ гæсгæ бинонтæ сидынц алкæмæдæр, цæмæй сæ сæрибар рæстæджы ма зивæг кæной ацы куыст кæнынмæ. Маскировкæйы хызтæ бийæн ис бирæуæладзыгон хæдзæртты кæртыты дæр. Ам фылдæр адæм æрбаиу уыдзæн уыцы куыстмæ.
УАЗÆГТЫ Марфæ
