Ленингоры районы уырыссаг скъолайы ахуырдзаутæ директор Битарты Лалиимæ, Украинæйы сæрмагонд æфсæддон операцийы цы ирон æфсæддон службæгæнджытæ хайад исынц, уыдонæн æртымбыл кодтой гуманитарон æххуыс — хъарм цъындатæ, хæлцады продукттæ.
Ахуырдзаутæй сæ иу, Хъороты Георги, хæстонтæн балæвар кодта Мады Майрæмы уаз ныв, цæмæй сæ уый хъахъхъæна æмæ сæ хæдзæрттæм дзæбæхæй æрыздæхой.
Уый размæ сæрмагонд æфсæддон операцийы хайадисджытæн гуманитарон æххуыс бакæныны рæстæджы Ленингоры районы æрæмбырд кодтой æрдæг милуан сомы онг.
Сабитæ æмæ хистæр фæлтæры Уарзондæр бæрæгбон Ленингоры
Цыппурсы мæйы 28 боны Ленингоры районы ногазон назбæласы цырæгъты ссыгъдыл уæлдай цин кодтой адæм иууылдæр — хистæрæй-кæстæрæй.
«Бирæтæ æрбацыдысты æнæхъæн бинонтæй, стырæй-чысылæй иумæ. Бæрæгбоны сæйраг архайджытæ — Митын Дада æмæ Митын Чызг дæр, кæй зæгъын æй хъæуы, уым уыдысты. Æмæ ногазон æгъдаумæ гæсгæ сывæллæттимæ иумæ Митын ногазон персонажтæ ссыгътой назбæласы цырæгътæ. Алкæмæндæр Ног аз у æппæты уарзондæр, æппæты тæмæссагдæр бæрæгбон. Сабитæ æмæ сæ ныййарджытæ цингæнгæйæ тымбылзылд кодтой назбæласы алфæмбылай, зарыдысты, кастысты æмдзæвгæтæ», — радзырдта журналисттæн районы администрацийы пресс-секретарь Кокойты Анжелæ.
Пресс-секретарь ма банысан кодта, зæгъгæ, бæрæгбонон концертон программæ бацæттæ кодта районы администрацийы культурæйы хайад.
«Сценæйæ хъуыстысты уарзон зарджытæ, бæрæгбонон арфæтæ. Районы цæрджытæн бæрæгбонон арфæтæ ракодтой администрацийы сæргълæууæг Гæджиты Иларион æмæ культурæйы хайады сæргълæууæг Жанна Епифанова. Алкæмæндæр сæ зæрдæ бауарзта фидар æнæниздзинад, исад, амонд, ног хæрзтæ æмæ бинонты фæрныгад», — загъта Кокойты Анжелæ.
Кæронбæттæны алы сывæллоны зæрдæ дæр барухс кодтой адджын ногазон лæвæрттæй.
