Уалдзæджы æрбалæудимæ нæ горæты сæвзæры нуазыны донæй цæрджыты ифтонг кæныны проблемæ. Дон фæкъаддæр вæййы, иуæй-иу уынгты цæрджытæ та йæ фæисынц графикмæ гæсгæ. Вæййы афтæ дæр, æмæ доны гъæд вæййы æвзæр, кърантæй фæцæуы змæст дон. Уый фæдыл цæрджытæ равдисынц се ‘нæразыдзинад. Арæх æрбарвитынц фыстæджытæ газет «Хурзæрин»-ы редакцимæ дæр. «Дон нæ хæццæ кæны бирæфатерон хæдзæртты уæллаг уæладзгуытæм. Мах, Кочысаты Розæйы (раздæры Заводы) æмæ Нæузæххонты уынгты цæрджытæ ныр дыккаг мæй æвзарæм доны цухдзинад», – фыссынц цæрджытæ сæ фыстæджы.
Мах бахатыдыстæм «Водоканал»-мæ, цæмæй лæмбынæгдæр радзурой уыцы фарстыл. «Алы уалдзæг дæр нæ горæты нуазыны доны фарст вæййы актуалон. Фæлæ ацы аз горæты иу хайы ифтонг кæнын райдыдта «Уанат-Цхинвал»-ы доны хахх. Куыд зонæм, афтæмæй Брытъаты дон уалдзæджы бынтондæр ахицæн кæнæм æмæ ма горæтмæ фæцæуы Едысы дон. Раздæр азты-иу уалдзæджы бонты горæты цæрджыты дон истой графикмæ гæсгæ, фæлæ ныртæккæ Уанаты хаххæй суткæйы мидæг цы 12 мин кубы ист цæуы, уый хорз ахъаз у, цæмæй горæты иу хай ифтонг цæуа донæй æмæ графикы сæр мауал хъæуа. Ныртæккæ сæрмагонд нывæстмæ раконд æрцыдысты æрмæст Дзау æмæ Цхинвалы цæгаттаг микрорайонтæ. Уым дæр дон æрлæууы æрмæст æнафоны – æхсæв фыццаг сахатæй райсом æхсæз сахатмæ», – загъта «Водоканал»-ы генералон директоры хæдивæг Джиоты Ингæ.
Уый ма куыд загъта, афтæмæй куыддæр Брытъаты дон расыгъдæг уа, афтæ фæстæмæ баиу æрцæудзæнис доны магистралмæ æмæ уæд уавæр зынгæ фæхуыздæр уыдзæн. Банысан кодта, зæгъгæ, ныртæккæ республикæмæ цы дон цæуы, уый уавæр æдзух бæрæг кæнынц специалисттæ.
Comments are closed, but trackbacks and pingbacks are open.