Акæсæм фæстæмæ, цæмæй бамбарæм 2020 азы исты бæллæхтæм æнхъæлмæ кæсæн ис æви нæ, уый.

Даргъ азтæн ис æвзæр ном. Дзурынц, зæгъгæ, уыдон вæййынц æнамонд цаутæй йемыдзаг азтæ. Цæмæн афтæ дзурынц? Æрмæстдæр уый тыххæй æмæ азтæ иу бон даргъдæр æви цыппар азы иу хатт кæй вæййынц, уый тыххæй? Мах аскъуыддзаг кодтам,  ацы нысан реалон у, уый сбæрæг кæнын. Раздæхæм фæстæмæ бирæ азты размæ æмæ æркæсæм даргъ азты цаутæм. Нæ зæрдыл æрлæууын кодтам Уæрæсейæн уæлдай нысаниуæгджындæр цаутæ æмæ сын саргъ кодтам, азтæн нывæрдтам хорз æмæ æвзæр.

1916 аз. Цæуы Фыццаг дунеон хæст. Уырыссаг æфсæдтæ сарæзтой легендарон Брусиловаг атынд, уыдонæн сæ къухты бафтыд 100 км размæ ацæуын æмæ Волынь, Буковина æмæ Галицийы хай бацахсын. Фæлæ, инæлар Брусилов куыд нымадта, уымæ гæсгæ операци стратегион фæстиу-джытæ нæ радта. Мæскуыйы бындур æвæрд æрцыд автомобилон моторон заводæн (АМО) – фидæны ЗИЛ-æн.

Севастополы линкор «Императрица Мария»-йы айхъуыстысты 16 срæмыгъды. Нау фæдæлдон, 217 денджызонæй сконд экипаж фæмард. Верситы ‘хсæн – срæмыгъды размæ наумæ æнæмæт ахаст дарын, æцæгдзинад уæддæр не сбæрæг кодтой. Азæн æвæрæм æвзæр.

1920 аз. Сырх Æфсад пырх кæны урсгвардионты. Колчакы фехстой, Деникины æмæ Врангелы æфсæдтæ пырхгонд æрцыдысты. «Колчакы сыгъзæрин» ома, бæстæйы сыгъзæрины фæсауæрцтæ – 33 тоннæйы раздæхтысты советон хицауадмæ. Волоколамскы цур Кашинойы хъæуы ссыгъд фыццаг «Ильичы цырагъ». Фидар æрцыд ГОЭРЛО-йы план.

Мæскуыйы баконд æрцыд Жуковскийы номыл Æфсæддон-уæлдæфон академи. Азæн æргомæй æвæрæм хорз.

1924 аз. В.И.Ленины амæлæт æмæ фыц-цаг хъæдын мавзолейы арæзт. Ленинграды тæссаг донивылд: доны æмвæзад схызт 4 метры бæрц. Ацы азæн æвæрæм æвзæр.

1928 аз. Ницы ахæм æвирхъау цаутæ не ‘рцыд. Уый хыгъд Мæскуыйы байгом сты Горькийы номыл парк æмæ стадион «Динамо». Фыццаг атахт сарæзта зынгæ «Кукурузник» – У-2. Азæн æвæрæм хорз.

1932 аз. Байгом горæт Горькийы автозавод. Магнитогорск æмæ Кузнецкы комбинатты баконд æрцыдысты фыццаг домнæйы пецтæ. Ленинграды уадзын райдыдтой ра-диоаппаратурæтæ æмæ советон фыццаг те-левизортæ. Уым ма кусын райдыдта фыццаг автоматикон телефонон станц дæр. Хорз.

1936 аз. Легендарон тæхæг Михаил Водопьянов сарæзта фыццаг арктикон атахт Мæскуы – Франц-Иосифы зæхмæ æмæ фæстæмæ. Мæскуыйы арæзт æрцыдысты киностуди «Союзмультфильм» æмæ боныгъæды централон институт – ныртæккæ Гидрометцентр. Ногæй та хорз.

1940 аз. Ахст æрцыд Николай Вавилов. Мексикæйы амардтой Лев Троцкийы. Фæцис финаг хæст. Арктикæйы  фæцис ихсæттæн нау «Георгий Седов»-ы дрейф. Стахт Сергей Королевы фыццаг ракетоплан. Советон хицауад бакодта 8-сахатон кусгæ бон æмæ… куыстмæ 21 минутæй фылдæр байрæджы кæныны тыххæй уголовон бæрндзинад. Ацы азæн зын саргъгæнæн у, фæлæ дзы уæддæр хорзтæ фылдæр уыд.

1944 аз. Цæуы Стыр Фыдыбæстæйон хæст. Фæлæ ацы аз у Ленинграды блокадæ сисыны аз æмæ Сырх Æфсады æнтыстджын размæбырсты аз. Сæрибар æрцыдысты Одессæ, Хъырым, Минск, Ригæ. Советон æфсæдтæ бацыдысты Европæмæ, Нормандийы рахызтысты æмцæдисонтæ. Нывæрæм ын хорз.

1948 аз. Райдыдта космополитизмы ныхмæ тох. Композитортæ Сергей Прокофьев æмæ Арам Хачатурян бахаудтой критикæйы бын «музыкæйы бæрзонд æхсæнадон роль æрныллæг кæныны тыххæй». Критикæ кæнынц нывгæнджытæ Гоген æмæ Сезанны, композитортæ Дебюсси, Равель, Стравинский. Ленины номыл Хъæууонхæдзарадон æппæтцæдисон академийы сессийы генетикæ расидт æрцыд мæнгзонадæй. Æвзæр.

1952 аз. Фыццаг атахты ацыд реактивон бомбæкалæн хæдтæхæг Ту-16. Советон спортсментæ фыццаг хатт ацыдысты Олимпиадæмæ. Хельсинкийы советон æмбырдгонд рамбылдта 71 майданы (фылдæр майдантæ ис æрмæстдæр АИШ-æн) æмæ сæвæрдта дыууæ дунеон, фондз Олимпион, æртæ европæйон рекорды. Хорз.

1956 аз. Советон Цæдисы Коммунистон Партийы ХХ съезды Сталины гоймаджы культы банымадтой зианхæссæгыл. Антарк-тидæйы байгом фыццаг советон зонадон станц «Мирный» æмæ Арктикæйы та – дрейфгæнæг станц «Северный полюс-6». Растдæр уыдзæн хорз ын куы нывæрæм, уый.

1960 аз. Никита Хрущев ботинкæйæ хоста ИНО-йы трибунæ. Арæзт æрцыд космонавтты цæттæгæнæн центр. Космосмæ æнтыстджынæй атахтысты куыйтæ Белка æмæ Стрелка. Римы Олимпиадæйы Советон Цæдис рахаста иууыл фылдæр майдантæ – 43 сыгъзæрин майданы (АИШ-æн ис æрмæстдæр 34). Нывæрæм ын хорз.

1964 аз. Хрущевы раппæрстой æппæт бынæттæй, ныр бæстæйыл къухдариуæгад кодта Леонид Брежнев. Советон Цæдис космосмæ ауагъта цалдæр спутникы æмæ фыццаг бирæбынатон нау «Восход-1» 3 адæймаджы экипажимæ. Эфиры рацыд «Споконой ночи, малыши»-йы фыццаг рауагъд». Ацы азæн дæр нывæрæм хорз.

1968 аз. Тренировкæйон атахты фæмард Юрий Гагарин. Фæдæлдон дизелон донбындзугæнаг нау К-129, экипаж аирвæзт. Братскы æрхаудта рейсон хæдтæхæг Ил-18. Фыццаг автоматикон станц «Зонд-5» æрзылд Мæйы алыварс æмæ æрæздæхт Зæхмæ. Фæлæ уæддæр æвзæр.

1972 аз. Автоматикон æхсæнпланетон станц «Луна-20» Зæхмæ фæхæццæ кодта мæйы уæлцъары хуызæг. Советон спортсментæ дарддæр дæр æвдисынц иттæг хорз бæрæггæнæнтæ Олимпион хъæзтыты: Мюнхены Советон Цæдисы командæйæн ис 5- сыгъзæрин майданы. Хорз.

1976 аз. Конвейерæй рахызт фыццаг «КамАз», стахт фыццаг советон уæрæхфюзеляжон хæдтæхæг Ил-86. Централон Комитет æмæ министрты Совет рахастой уынаффæ кæсаджы продукци фæфылдæр кæныны тыххæй, баконд æрцыдысты «кæсаджы бонтæ». Уæд хъуыды кодтой: тыххæй нын цæмæн хъарынц ацы кæса-джы?! Фæлæ, ныртæккæйы æргътæм кæсгæйæ, уæддæр аргъ кæныс партион аудындзинадæн. Ацы азæн дæр æвæрæм хорз.

1980 аз. Андрей Сахаровæн байстой йæ хорзхæтæ æмæ йæ арвыстой горæт Горькимæ. Амард Владимир Высоцкий. Мæскуыйы уагъд цæуы Олимпиадæ-80 зæрдæмæхъаргæ талисман Арсимæ æмæ ног спортивон уæлахизтимæ. Плесецкы космодромы спырх ракетæ «Восток-2М», фæмард сты 48 адæймаджы. Зын саргъ-гæнæн у ацы азæн, банымайæм æй нейт-ралоныл.

1984 аз. Фыццаг сылгоймаг Светлана Савицкая рахызт гом космосмæ. БАМ-ы байгом  поездты змæлд. Мæскуыйаг, Калининаг (Твераг), Ярославаг, Ивановаг областты уыд стыр уадтымыгътæ, бæлæсты æд уидæгтæ скъуынгæйæ, машинæтæ фæлдахгæйæ. Уадз, ацы аз дæр ма райсæт нæдæр хорз æмæ нæдæр æвзæр.

1988 аз. Овечкинты бинонтæ бацахстой Ту-154, террористты къухæй фæмард сты стюардессæ æмæ æртæ бæлццоны. Арзамасы станцы – уæзтæласæн поезды спырх гексоген (ластой йæ хæххон куыстуæттæн). Ныппырх  сты вагзал æмæ уымæ æввахс хæдзæрттæ. Фæмард сты 91 адæймаджы, фæцæфтæ сты 800 адæймаджы. Сомихстоны тыхджын зæххæнкъуыст: бынтондæр ныппырх горæт Спитак, 80% – Ленинакан, фæмард сты дæсгай мин адæймаджы. Иунысанонæй – æвзæр.

1992 аз. Шокон терапи: продуктты æргътæ схызтысты, биртæн сæ бон нал у продукттæ балхæнын. Уæрæсе æмæ Украинæ дих кæнынц Сауденджызон флот. Райдыдта чекон приватизаци. Æлгъыстаджы 90-азтæн – æвзæр.

1996 аз. Хъызлары рынчындоны бацахста Саламан Радуевы бандæ. Ногæй та æвзæр.

2000 аз. Фæдæлдон субмарина  «Курск», фæмард æнæхъæн экипаж. Зæххыбын ахизæн «Пушкинская»-йы уыд срæмыгъд. Æвæрæм ын æвзæр.

2004 аз. Автозаводская-Павелецкая метройы æмæ Ригайы станцы æрцыд теракт. Æркалд аквапарк «Трансвааль»-ы уæлхæдзар. Химартæ уæлдæфы спырх кодтой дыууæ хæдтæхæджы. Боевиктæ бацахстой  Беслæны скъола. Æвзæр.

2008 аз.  Гуырдзиæгтæ æрбабырстой Хуссар Ирыстонмæ æмæ райдыдта хæст, афтæ ма уыд финансон кризис дæр, кæцытæ шанстæ нæ уадзынц ацы азæн. Æвзæр .

2012 аз. Индонезийы демонстрацион атахты рæстæджы ныппырх «Суперджет 100». Тæссаг донивылдтытæ Крымскы. Æвзæр.

2016 аз. Уыцы азы æрцахстæуыд Уæрæсейы Экономикон рæзты министр Алексей Улюкаевы. Иуæй-иу бæрæггæнæнтæм гæсгæ, чиновник гæртам райста 2 милуан доллары. Афтæ ма уыцы аз Мидхъуыддæгты министрады экономикон æдасдзинады сæйраг управленийы хистæры хæдивæг, булкъон Дмитрий Захарченкойы фатер баджигул кæныны рæстæджы оперативон кусджытæ ссардтой 8 миллиард сомы. 2016 азы июны мæйы УФ-йы Æдасдзинады федералон службæйы оперативонтæ басгæрстой Федералон таможнæйон службæйы сæргълæууæг Андрей Бельяниновы хæдзар коттеджты поселок «Бачурино»-йы. Дзыбырты къоппыты ссардтой 9,5 милуан сомы, 390 мин доллары æмæ 350 мин евройы. Уыцы аз йæ цардæй ахицæн Кубæйаг революцийы лидер Фидель Кастро. Цардæй ма ахицæн Узбекистаны президент Ислам Каримов. АИШ-ы президентон æзæрстыты фæуæлахиз Дональд Трамп. Азæн нывæрæн ис хорз дæр æмæ æвзæр дæр.

Хатдзæгтæ: 13 минусы, 12 плюсы. Зæгъæн ис афтæ æмæ плюстæ æмæ минустæ сты æмхуызон. Уæдæ, цæй æмæ ма уæм пессимисттæ æмæ развæлгъау ма æнхъæлмæ кæсæм  даргъ  азæй  æвзæрдзинæдтæм.

Æрмæгыл бакуыста

ЧЕРТХЪОТЫ Жаннæ

Comments are closed, but trackbacks and pingbacks are open.